Bigg Boss 7 Telugu Elimination: హౌస్‍లోకి వచ్చిన వారానికే కంటెస్టెంట్ ఎలిమినేట్.. శివాజీ విషయంలో భారీ ట్విస్ట్ ఉండనుందా!

Bigg Boss 7 Telugu Elimination: బిగ్‍బాస్ తెలుగు 7వ సీజన్ ఆరో వారం పూర్తయింది. ఆదివారం (సెప్టెంబర్ 15) ఎపిసోడ్‍లో ఓ కంటెస్టెంట్ ఎలిమినేట్ అయ్యారు. ముందుగా కంటెస్టెంట్‍లతో సరదా గేమ్స్ ఆడించారు హోస్ట్ నాగార్జున. భగవంత్ కేసరి సినిమా ప్రమోషన్ల కోసం వచ్చిన డైరెక్టర్ అనిల్ రావిపూడి, హీరోయిన్ శ్రీలీల కంటెస్టెంట్లతో సరదాగా మాట్లాడారు. కంటెస్టెంట్లకు పంచ్‍కు కూడా వేశారు అనిల్. ఇదంతా చాలా సరదాగా సాగింది. మరోవైపు ఎలిమినేషన్ ప్రక్రియ హీట్‍గా జరిగింది.

బిగ్‍బాస్ తెలుగు 7వ సీజన్ ఆరో వారంలో నయని పావని ఎలిమినేట్ అయ్యారు. హౌస్‍లోకి వచ్చిన వారంలోనే ఆమె బయటికి వెళ్లారు. వైల్డ్ కార్డ్ ద్వారా ఈ వారమే బిగ్‍బాస్ హౌస్‍లోకి నయని పావని వచ్చారు. అయితే, ఓటింగ్ తక్కువగా రావటంతో తొలి వారమే ఆమె ఎలిమినేట్ అయ్యారు. ఆరో వారం నామినేషన్లలో నయని పావని, అశ్వినీ శ్రీ, ప్రిన్స్ యావర్, అమర్‌దీప్, టేస్టీ తేజ, శోభ, పూజా మూర్తి నిలిచారు. ఐదుగురు సేవ్ అయ్యారు. ఎలిమినేషన్ ప్రక్రియ తుది అంకానికి రాగా.. నయని పావని, అశ్వినీ ఇద్దరూ డేంజర్‌లోకి వచ్చారు. చివరగా.. నయని పావని ఎలిమినేట్ అయినట్టు నాగార్జున ప్రకటించారు.

ఎమోషనల్‍గా..

ఎలిమినేట్ అయిన తర్వాత నయని పావని గుక్క పట్టి ఏడ్చేశారు. కంటెస్టెంట్లు ఆమెను ఓదార్చారు. తనకు కనీసం ఆట ఆడే అవకాశం కూడా దక్కలేదని బోరున విలపించారు నయని పావని. శివాజీ ఆమెను సముదాయించారు. హౌస్ నుంచి బయటికి వచ్చి స్టేజీపైకి వెళ్లాక కూడా కన్నీరు పెట్టుకున్నారు నయని పావని. శివాజీని డాడీ, ఆయనను చూస్తే తన నాన్న గుర్తు వస్తున్నారంటూ ఎమోషనల్ అయ్యారు నయని. ఆమె బదులు తాను ఎలిమినేట్ అవుతానని శివాజీ అన్నారు. అలా కుదరదని నాగ్ చెప్పారు. నయని పావని ఎలిమినేషన్ చాలా ఎమోషనల్‍గా సాగింది. హౌస్‍లోని ఒక్కో కంటెస్టెంట్ గురించి బాగా చెప్పారు పావని. వారంలోనే హౌస్‍లో ఇంత మంది మనసులను పావని గెలుచుకున్నారని, జీవితంలో ఆమె చాలా పైకి వస్తారని నాగార్జున అన్నారు. కాగా, బిగ్‍బాస్ 7వ సీజన్‍లో వరుసగా ఆరో వారం కూడా లేడీ కంటెస్టెంటే ఎలిమినేట్ అయ్యారు. నయని పావనిని అన్యాయంగా ఎలిమినేట్ చేశారని సోషల్ మీడియాలో కొందరు నెటిజన్లు ఆగ్రహం వ్యక్తం చేస్తున్నారు.

హౌస్ బయటికి శివాజీ?

ఆదివారం ఎపిసోడ్ తర్వాత తదుపరి రోజుకు సంబంధించి ఓ ప్రోమో వచ్చింది. శివాజీ విషయంలో ఏదో బిగ్ ట్విస్ట్ ఉండబోతున్నట్టు ఇందులో తెలుస్తోంది. బిగ్‍బాస్ హౌస్ నుంచి శివాజీ బయటికి వెళ్లిపోతున్నట్టుగా ఆ ప్రోమోలో ఉంది. కన్ఫెషన్ రూమ్‍లో శివాజీ కూర్చొని ఉండగా.. మిమ్మల్ని హౌస్ నుంచి బయటికి తీసుకెళ్తామని బిగ్‍బాస్ చెప్పారు. శివాజీ వెళ్లిపోతుండగా.. కంటెస్టెంట్లు అడ్డుకునేందుకు ప్రయత్నించారు. ఎట్టకేలకు శివాజీ బయటికి వెళ్లారు. మరి, శివాజీ ఎలిమినేట్ అయ్యారా.. ఆయన ఎందుకు బయటికి వెళ్లారన్నది సోమవారం ఎపిసోడ్‍లో తెలియనుంది.