Naveen Polishetty: మ‌రోసారి జాతిర‌త్నాలు కాంబినేష‌న్ - న‌వీన్ పొలిశెట్టి నెక్స్ట్ మూవీ డైరెక్ట‌ర్ ఇత‌డేనా?

Naveen Polishetty: మిస్ శెట్టి మిస్ట‌ర్ పొలిశెట్టి మూవీతో హ్యాట్రిక్ హిట్‌ను అందుకున్నాడు న‌వీన్ పొలిశెట్టి. అనుష్క హీరోయిన్‌గా స‌రోగ‌సీ కాన్సెప్ట్‌తో ఎమోష‌న‌ల్ ఎంట‌ర్‌టైన‌ర్‌గా రూపొందిన ఈ సినిమా నాలుగు రోజుల్లోనే బ్రేక్ ఈవెన్‌ను సాధించి నిర్మాత‌ల‌కు లాభాల్ని తెచ్చిపెట్టింది. ఈ సినిమాలో సిద్ధు అనే స్టాండ‌ప్ క‌మెడియ‌న్‌గా న‌వీన్ పొలిశెట్టి క‌నిపించాడు. అత‌డి కామెడీ టైమింగ్‌, పంచ్ డైలాగ్స్‌కు ఆడియెన్స్‌ను ఆక‌ట్టుకుంటున్నాయి. సినిమాలో అనుష్క కంటే అత‌డి యాక్టింగ్‌కే ఎక్కువగా ప్ర‌శంస‌లు ల‌భిస్తోన్నాయి .

ఏజెంట్ సాయి శ్రీనివాస ఆత్రేయ‌, జాతిర‌త్నాలు త‌ర్వాత మిస్ శెట్టి మిస్ట‌ర్ పొలిశెట్టితో హ్యాట్రిక్ స‌క్సెస్ అందుకున్న న‌వీన్ పొలిశెట్టి త‌దుప‌రి సినిమా ఏమిట‌న్న‌ది టాలీవుడ్ స‌ర్కిల్‌లో ఆస‌క్తిక‌రంగా మారింది. జాతిర‌త్నాలు సినిమాతో త‌న‌కు బిగ్గెస్ట్ హిట్ ఇచ్చిన ద‌ర్శ‌కుడు అనుదీప్‌తో న‌వీన్ పొలిశెట్టి నెక్స్ట్‌ మూవీ చేయ‌బోతున్న‌ట్లు టాలీవుడ్ వ‌ర్గాల్లో ప్ర‌చారం జ‌రుగుతోంది. జాతిర‌త్నాలు త‌ర‌హాలోనే ఔట్ అండ్ ఔట్ ఫ‌న్ స్క్రిప్ట్‌తో ద‌ర్శ‌కుడు అనుదీప్ ఓ క‌థ‌ను సిద్ధం చేసిన‌ట్లు స‌మాచారం.

పాయింట్ న‌చ్చ‌డంతో న‌వీన్ పొలిశెట్టి ఈ మూవీకి గ్రీన్‌సిగ్న‌ల్ ఇచ్చిన‌ట్లు చెబుతోన్నారు. త్వ‌ర‌లోనే న‌వీన్ పొలిశెట్టి, అనుదీప్‌ మూవీపై ఓ క్లారిటీ వ‌చ్చే అవ‌కాశం ఉన్న‌ట్లు తెలిసింది. ప్రిన్స్ త‌ర్వాత అనుదీప్ త‌న నెక్స్ట్ సినిమా ఏమిట‌న్న‌ది ఇప్ప‌టివ‌ర‌కు వెల్ల‌డించ‌లేదు. వెంక‌టేష్‌తో అత‌డు ఓ సినిమా చేయ‌బోతున్న‌ట్లు చాలా కాలంగా ప్ర‌చారం జ‌రుగుతోంది. సైంధ‌వ్ సినిమాతో వెంక‌టేష్ బిజీగా ఉండ‌టంతో అనుదీప్ మూవీ ఆల‌స్య‌మ‌య్యే అవ‌కాశం ఉన్న‌ట్లు స‌మాచారం.

మిస్ శెట్టి మిస్ట‌ర్ పొలిశెట్టి క‌లెక్ష‌న్స్‌

షారుఖ్‌ఖాన్ జ‌వాన్‌ పోటీని త‌ట్టుకుంటూ కామెడీతో మిస్ శెట్టి మిస్ట‌ర్ పొలిశెట్టి బాక్సాఫీస్ వ‌ద్ద విజ‌యాన్ని అందుకున్న‌ది. వ‌ర‌ల్డ్ వైడ్‌గా ఆరు రోజుల్లో ఈ సినిమాకు 31 కోట్ల‌కుపైగా గ్రాస్‌ను, 16 కోట్ల వ‌ర‌కు షేర్‌ను రాబ‌ట్టిన‌ట్లు స‌మాచారం. యూవీ క్రియేష‌న్స్ నిర్మించిన ఈ సినిమాకు మ‌హేష్ బాబు పి ద‌ర్శ‌క‌త్వం వ‌హించాడు.