Mad Trailer: నో లాజిక్‌...ఓన్లీ ఫ‌న్ - మ్యాడ్ ట్రైల‌ర్‌ను రిలీజ్ చేసిన ఎన్టీఆర్‌

Mad Trailer: మ్యాడ్ మూవీతో ఎన్టీఆర్ బావ‌మ‌రిది నార్నేనితిన్ హీరోగా టాలీవుడ్‌లోకి అరంగేట్రం చేస్తున్నాడు. యూత్‌ఫుల్ ఎంట‌ర్‌టైన‌ర్‌గా రూపొందుతోన్న ఈ మూవీ అక్టోబ‌ర్ 6న రిలీజ్ కానుంది. మ్యాడ్ మూవీ ట్రైల‌ర్‌ను మంగ‌ళ‌వారం యంగ్ టైగ‌ర్‌ ఎన్టీఆర్ రిలీజ్ చేశాడు. ఫ‌న్‌, పంచ్ డైలాగ్స్‌తో ట్రైల‌ర్ ఆద్యంతం ఎంట‌ర్‌టైనింగ్‌గా సాగింది.

ఇంజినీరింగ్ కాలేజీ బ్యాక్‌డ్రాప్‌లో ముగ్గురు స్నేహితుల చుట్టూ ఈ క‌థ సాగిన‌ట్లుగా క‌నిపిస్తుంది. ఏసీ ప‌నిచేస్త‌లేదు మావ అని ఓ యువ‌కుడు చెప్ప‌గానే నీళ్లు పోయ‌లేదేమో అంటూ మ‌రో స్టూడెంట్ స‌మాధానం ఇవ్వ‌డం న‌వ్వుల‌ను పంచుతుంది. సూప‌ర్ కాలేజీ...గ్రేట్ ఫ్యాక‌ల్టీ...హండ్రెడ్ ప‌ర్సెంట్ ప్లేస్‌మెంట్‌...గొప్ప‌గొప్ప‌వాళ్లంద‌రూ ఇక్క‌డే చ‌దివారు...నేను కూడా ఇక్క‌డే చ‌దివాను అని కాలేజీ వాచ్‌మెన్ చెప్ప‌డం ట్రైలర్ లో ఆక‌ట్టుకుంటుంది.

అంత బాధ‌లో ఉంటే గోవా పోదామ‌ని అంటావు..గోకర్ణ పోదాం...నైట్ ఆల్కాహాలిక్‌...మార్నింగ్ వ‌ర్క్‌హాలిక్‌... అంటూ హీరోలు చెప్పిన ఫ‌న్‌ డైలాగ్స్ మెప్పిస్తున్నాయి. కాలేజీ స్టూడెంట్స్ మ‌ధ్య ఉండే గొడ‌వ‌లు, స‌ర‌దాలు, ల‌వ్ స్టోరీస్‌తో డైరెక్ట‌ర్ క‌ళ్యాణ్ శంక‌ర్ మ్యూడ్ మూవీని తెర‌కెక్కించాడు ఈ ట్రైల‌ర్‌లో డైరెక్ట‌ర్ అనుదీప్ కూడా క‌నిపించాడు.ఈ సినిమాలో అత‌డు గెస్ట్ రోల్ చేసిన‌ట్లు స‌మాచారం.

నార్నేనితిన్‌తో పాటు సంగీత్‌శోభ‌న్‌, రామ్ నితిన్ హీరోలుగా న‌టిస్తున్నారు. శ్రీ గౌరిప్రియారెడ్డి, అనంతిక‌, గోపికా ఉద్యాన్ హీరోయిన్లుగా క‌నిపించ‌నున్నారు. సితార ఎంట‌ర్‌టైన్‌మెంట్స్ బ్యాన‌ర్‌పై హారిక సూర్య‌దేవ‌ర‌, సాయిసౌజ‌న్య ఈ సినిమాను నిర్మిస్తున్నారు. భీమ్స్ సిసిరోలియో సంగీతాన్ని అందిస్తున్నాడు..