Nagarjuna Birthday: నాగార్జున‌కు సాయికుమార్ డ‌బ్బింగ్ చెప్పిన తెలుగు సినిమా ఏదో తెలుసా!

Nagarjuna Birthday: టాలీవుడ్‌లో ప్ర‌యోగాల‌కు పెట్టింది పేరు నాగార్జున‌. కొత్త ద‌ర్శ‌కుల్ని ప్రోత్స‌హిస్తూ న‌వ్య‌మైన క‌థాంశాల‌తో నాగార్జున చేసిన ఎన్నో సినిమాలు తెలుగులో ట్రెండ్ సెట్ట‌ర్స్‌గా నిలిచాయి. బాలీవుడ్‌లో సినిమాలు చేసి స‌క్సెస్‌ను అందుకున్న అతి త‌క్కువ మంది టాలీవుడ్ హీరోల్లో నాగార్జున ఒక‌రు.

అమితాబ్‌బ‌చ్చ‌న్‌, శ్రీదేవి, నాగార్జున కాంబోలో 1992లో రిలీజైన బాలీవుడ్ మూవీ ఖుదా గ‌వా బిగ్గెస్ట్ బ్లాక్‌బాస్ట‌ర్‌గా నిలిచింది. పీరియాడిక‌ల్ డ్రామాగా రూపొందిన ఈ అప్ప‌ట్లోనే దాదాపు ఎనిమిది కోట్ల‌కుపైగా బ‌డ్జెట్‌తో రూపొందింది.

15 కోట్ల‌కుపైగా క‌లెక్ష‌న్స్ రాబ‌ట్టింది. ఈ సినిమాలో అమితాబ్ బ‌చ్చ‌న్ బాద్‌షా ఖాన్ అనే పాత్ర‌లో న‌టించ‌గా నాగార్జున రాజా మీర్జా అనే పోలీస్ ఆఫీస‌ర్‌గా క‌నిపించాడు. శ్రీదేవి డ్యూయ‌ల్ రోల్ చేసింది. ఆఫ్ఘ‌నిస్తాన్‌లో ఖుదా గ‌వా షూటింగ్ చేశారు. బాలీవుడ్‌లో హిట్టైన ఈ మూవీని తెలుగులో కొండ‌వీటి సింహం పేరుతో డ‌బ్ చేశారు.

కాగా ఈ సినిమాలో నాగార్జున పాత్ర‌కు సాయికుమార్ డ‌బ్బింగ్ చెప్ప‌డం గ‌మ‌నార్హం. నాగార్జున సినిమాల్లో అత‌డి ఓన్ వాయిస్ కాకుండా మ‌రొక‌రి గొంతు వినిపించే ఏకైక తెలుగు సినిమా కొండ‌వీటి సింహం కావ‌డం గ‌మ‌నార్హం. ఖుదా గ‌వాలోనే తొలిసారి అమితాబ్ బ‌చ్చ‌న్‌తో క‌లిసి న‌టించారు నాగార్జున.

ఆ త‌ర్వాత లాంగ్ గ్యాప్ అనంత‌రం గ‌త ఏడాది రిలీజైన బ్ర‌హ్మాస్త్ర‌లో నాగార్జున‌, అమితాబ్ బ‌చ్చ‌న్ మ‌రోసారి వీరిద్ద‌రు క‌లిసి సిల్వ‌ర్ స్క్రీన్‌పై క‌నిపించారు. అక్కినేని హీరోలు అంద‌రూ క‌లిసి న‌టించిన మ‌నం సినిమాలో అమితాబ్ బ‌చ్చ‌న్ గెస్ట్ పాత్ర‌లో న‌టించాడు.