Miss Shetty Mr Polishetty: అనుష్క - నవీన్ పోలిశెట్టి మూవీ ఆ రోజున రావట్లేదు: అధికారికంగా ప్రకటించిన చిత్ర యూనిట్

Miss Shetty Mr Polishetty: అంచనాలు నిజమయ్యాయి. ‘మిస్ శెట్టి.. మిస్టర్ పోలిశెట్టి’ చిత్రం విడుదల వాయిదా పడింది. ఈ విషయాన్ని చిత్ర యూనిట్ అధికారికంగా ప్రకటించింది. దీంతో వెండితెరపై స్టార్ హీరోయిన్‍ అనుష్క శెట్టిని మళ్లీ ఎప్పుడెప్పుడు చూద్దామా అని వేచిచూస్తున్న అభిమానులకు నిరాశ ఎదురైంది. అనుష్క - యంగ్ హీరో నవీన్ పోలిశెట్టి కాంబినేషన్‍లో ‘మిస్ శెట్టి.. మిస్టర్ పోలిశెట్టి’ మూవీ ప్రకటించనప్పటి నుంచి చాలా ఆసక్తి నెలకొంది. టీజర్, పాటలు కూడా ఆకట్టుకున్నాయి. ఆగస్టు 4వ తేదీన ఈ సినిమాను రిలీజ్ చేయనున్నట్టు చిత్ర యూనిట్ గతంలో ప్రకటించింది. అయితే, ఈ మూవీ ఆ తేదీకి రావట్లేదని ఇప్పుడు వెల్లడించింది. వివరాలివే..

మిస్ శెట్టి.. మిస్టర్ పోలిశెట్టి సినిమాను ఆగస్టు 4వ తేదీన విడుదల చేయలేకున్నామని ఈ చిత్రాన్ని నిర్మిస్తున్న యూవీ క్రియేషన్స్ నేడు అధికారికంగా ప్రకటించింది. ఈ మేరకు ఓ ట్వీట్ చేసింది. “పోస్టు ప్రొడక్షన్ పనుల్లో ఆలస్యం కారణంగా ఆగస్టు 4వ తేదీన సినిమాను విడుదల చేయలేకున్నాం. రిలీజ్‍ను వాయిదా వేశాం. అన్‍లిమిటెడ్ ఫన్, ఎంటర్‌టైన్మెంట్‍తో అతి త్వరలో ముందుకు వస్తాం. కొత్త రిలీజ్ డేట్, థియేట్రికలల్ ట్రైలర్ డేట్‍ను త్వరలో ప్రకటిస్తాం” అని యూవీ క్రియేషన్స్ ట్వీట్ చేసింది. ట్రైలర్‌తో పాటే ఈ మూవీ కొత్త రిలీజ్ డేట్‍ను ప్రకటించే ఛాన్స్ ఉంది.

మిస్ శెట్టి.. మిస్టర్ పోలిశెట్టి చిత్రం వాయిదా పడుతుందని కొద్ది రోజులుగా వాదనలు వినిపిస్తుండగా.. ఇప్పుడు అధికారికంగా ఖరారైంది. ఈ చిత్రానికి పి.మహేశ్ బాబు దర్శకత్వం వహిస్తుండగా.. యూవీ క్రియేషన్స్ పతాకంపై వంశీ, ప్రమోద్ నిర్మిస్తున్నారు. రధన్ మ్యూజిక్ డైరెక్టర్‌గా ఉన్నాడు. కామెడీ, లవ్ ఎంటర్‌టైనర్‌గా ఈ చిత్రం ఉండనుందని టీజర్ చూస్తే అర్థమవుతోంది. ఇప్పటికే మూడు లిరికల్ సాంగ్స్ కూడా రిలీజ్ అయ్యాయి. తెలుగుతో పాటు తమిళం, కన్నడ, మలయాళం భాషల్లోనూ ఈ చిత్రాన్ని విడుదల చేయనున్నట్టు చిత్ర యూనిట్ ప్రకటించింది.

2020లో అనుష్క నిశ్శబ్దం మూవీ చేసింది. అయితే, అది ఓటీటీలో నేరుగా రిలీజ్ అయింది. 2019లో సైరా నరసింహా రెడ్డిలో అతిధి పాత్రలో అనుష్క వెండి తెరపై కనిపించింది. అయితే, ఆమె చివరగా పూర్తిస్థాయి పాత్ర చేసింది 2018లో వచ్చిన భాగమతి చిత్రంలో. సుదీర్ఘ విరామం తర్వాత మళ్లీ మిస్ శెట్టి.. మిస్టర్ పోలిశెట్టిలో హీరోయిన్‍గా చేస్తోంది అనుష్క. అందుకే ఈ చిత్రం కోసం ఆమె అభిమానులు ఎదురుచూస్తున్నారు. ఆగస్టు 4వ తేదీ నుంచి రిలీజ్ వాయిదా పడడంతో అనుష్కను వెండితెరపై మళ్లీ చూసేందుకు ఇంకొంత ఆలస్యం కానుంది. మరోవైపు, 2021లో జాతిరత్నాలు మూవీ సూపర్ హిట్ తర్వాత నవీన్ పోలిశెట్టి చేస్తున్న మూవీ కూడా ఇదే కావటంతో మరింత ఆసక్తి నెలకొని ఉంది.