Miss Shetty Mr Polishetty: ‘మిస్ శెట్టి.. మిస్టర్ పోలిశెట్టి’ ఉచిత షో.. వారికి మాత్రమే: వివరాలివే

Miss Shetty Mr Polishetty: సీనియర్ హీరోయిన్ అనుష్క శెట్టి, యంగ్ హీరో నవీన్ పోలిశెట్టి నటించిన ‘మిస్ శెట్టి.. మిస్టర్ పోలిశెట్టి’ సినిమా మంచి విజయం దిశగా సాగుతోంది. సెప్టెంబర్ 7న ఈ చిత్రం రిలీజ్ కాగా.. ఆరంభం నుంచి పాజిటివ్ టాక్ వచ్చింది. క్రమంగా ఈ చిత్రానికి కలెక్షన్లు పెరుగుతున్నాయి. మిస్ శెట్టి.. మిస్టర్ పోలిశెట్టి మూవీకి రివ్యూలు కూడా అధిక శాతం పాజిటివ్‍గా వచ్చాయి. ముఖ్యంగా విభిన్న కథాశంతంలో ఉన్న ఈ కామెడీ లవ్ ఎంటర్‌టైనర్‌ అందరినీ ఆకట్టుకుంటోంది. కాగా, మహిళల కోసం ‘మిస్ శెట్టి.. మిస్టర్ పోలిశెట్టి’ సినిమా ఉచిత షో ప్రదర్శించాలని చిత్ర యూనిట్ నిర్ణయించింది. రెండు తెలుగు రాష్ట్రాల్లోని కొన్ని థియేటర్లలో ఈ ఫ్రీ షో ఉండనుంది. ఈ వివరాలను మూవీ యూనిట్ వెల్లడించింది.

తెలంగాణ, ఆంధ్రప్రదేశ్‍లోని కొన్ని నగరాల్లోని కొన్ని థియేటర్లలో సెప్టెంబర్ 14న మహిళల కోసం ‘మిస్ శెట్టి.. మిస్టర్ పోలిశెట్టి’ సినిమా ఓ ఉచిత షో ఉంటుందని యూవీ క్రియేషన్స్ వెల్లడించింది. సిటీలు, థియేటర్ల వివరాలను ట్వీట్ చేసింది. 14వ తేదీన ఈ స్పెషల్ మార్నింగ్ షోను ఎంపిక చేసిన థియేటర్లలో మహిళలు ఉచితంగా వీక్షించవచ్చని తెలిపింది.

“క్యాలెండర్లలో మార్క్ చేసుకోండి. ఆంధ్రప్రదేశ్, తెలంగాణల్లో ఎంపిక చేసిన థియేటర్లలో మహిళల కోసం మిస్ శెట్టి మిస్టర్ పోలిశెట్టి సినిమా స్పెషల్ స్క్రీనింగ్ ఉండనుంది. లిస్ట్ చెక్ చేసుకోండి ” అని యూవీ క్రియేషన్స్ ట్వీట్ చేసింది. ఫ్రీ షో ఉండనున్న థియేటర్ల జాబితాను పోస్ట్ చేసింది.

మిస్ శెట్టి మిస్టర్ పోలిశెట్టి చిత్రానికి యంగ్ డైరెక్టర్ పి.మహేశ్ బాబు దర్శకత్వం వహించారు. ఈ సబ్జెక్టులను వినోదాత్మకంగా తెరకెక్కించిన అతడిపై ప్రశంసలు దక్కుతున్నాయి. యూవీ క్రియేషన్స్ పతాకంపై వంశీ, ప్రమోద్ ఈ చిత్రాన్ని నిర్మించగా.. రధన్, గోపీసుందర్ సంగీతం అందించారు. ఈ సినిమాలో అనుష్క చెఫ్‍గా నటించగా.. స్టాండప్ కమెడియన్‍గా నవీన్ చేశాడు.