Guntur Kaaram Runtime: గుంటూరు కారం ర‌న్‌టైమ్ రివీల్ - అత‌డు, ఖ‌లేజా కంటే త‌క్కువే!

Guntur Kaaram Runtime: గుంటూరు కారంతో సినిమాతో సంక్రాంతి కానుక‌గా జ‌న‌వ‌రి 12న ప్రేక్ష‌కుల ముందుకు రాబోతున్నాడు మ‌హేష్ బాబు. ఈ సినిమాతో సంక్రాంతి రేసులో ఏడోసారి నిలిచాడు మ‌హేష్ బాబు. గుంటూరు కారం మూవీకి త్రివిక్ర‌మ్ ద‌ర్శ‌క‌త్వం వ‌హిస్తున్నాడు. అత‌డు, ఖ‌లేజా త‌ర్వాత మ‌హేష్ బాబు, త్రివిక్ర‌మ్ కాంబోలో రూపొందుతోన్న హ్యాట్రిక్ మూవీ ఇది. గుంటూరు కారం సెన్సార్ కార్య‌క్ర‌మాలు పూర్త‌య్యాయి. యూ.ఏ స‌ర్టిఫికెట్ ల‌భించింది.

మ‌హేష్ మూవీ ర‌న్ టైమ్ ఎంత‌న్న‌ది కూడా రివీలైంది. 159 నిమిషాల నిడివితో గుంటూరు కారం ప్రేక్ష‌కుల ముందుకురాబోతోంది. రీసెంట్ టైమ్‌లో మ‌హేష్ బాబు కెరీర్‌లో గుంటూరు కారం చిన్న సినిమా కావ‌డం గ‌మ‌నార్హం. స‌ర్కారువారి పాట‌, మ‌హ‌ర్షి, స‌రిలేరు నీకెవ్వ‌రు, భ‌ర‌త్ అనే నేను సినిమాలు రెండున్న‌ర గంట‌ల కంటే ఎక్కువ నిడివితోనే ప్రేక్ష‌కుల ముందుకొచ్చాయి.

అంతే కాదు మ‌హేష్ బాబు, త్రివిక్ర‌మ్ కాంబినేష‌న్‌లో వ‌చ్చిన అత‌డు, ఖ‌లేజా కంటే గుంటూరు కారం ర‌న్ టైమ్ త‌క్కువ కావ‌డం గ‌మ‌నార్హం.

ప‌ద‌మూడేళ్ల త‌ర్వాత‌...

ఖ‌లేజా త‌ర్వాత దాదాపు ప‌డ‌మూడేళ్ల గ్యాప్ అనంత‌రం మ‌హేష్‌తో గుంటూరు కారం సినిమా చేస్తున్నాడు డైరెక్ట‌ర్ త్రివిక్ర‌మ్‌. గుంటూరు మిర్చి యార్డ్ బ్యాక్‌డ్రాప్‌లో సాగే ఈ క‌థ‌లో మ‌హేష్ పాత్ర కంప్లీట్ మాస్ కోణంలో క‌నిపించ‌బోతున్న‌ట్లు స‌మాచారం. త్రివిక్ర‌మ్ గ‌త సినిమాలకు మించి గుంటూరు కారంలో మాస్‌, యాక్ష‌న్ అంశాలు ఉండ‌బోతున్న‌ట్లు చెబుతున్నారు. దాదాపు రెండు వంద‌ల కోట్ల బ‌డ్జెట్‌తో హారిక హాసిని క్రియేష‌న్స్ ప‌తాకంపై రాధాకృష్ణ గుంటూరు కారం మూవీని నిర్మిస్తోన్నాడు.

ఫ‌స్ట్ టైమ్ శ్రీలీల‌..మీనాక్షి...

గుంటూరు కారం సినిమాలో మ‌హేష్ బాబుకు జోడీగా శ్రీలీల‌, మీనాక్షి చౌద‌రి హీరోయిన్లుగా న‌టిస్తున్నారు. మ‌హేష్ మ‌ర‌ద‌లి పాత్ర‌లో శ్రీలీల న‌టిస్తోండ‌గా...జ‌ర్న‌లిస్ట్ క్యారెక్ట‌ర్‌లో మీనాక్షి క‌నిపించ‌నున్న‌ట్లు తెలుస్తోంది. తొలుత ఈ సినిమాలో పూజాహెగ్డే హీరోయిన్‌గా ఎంపికైంది. కానీ షూటింగ్ కాక‌ముందే అనివార్య కార‌ణాల వ‌ల్ల పూజా హెగ్డే ఈ సినిమా నుంచి త‌ప్పుకుంది. ఆమె స్థానాన్ని మీనాక్షి చౌద‌రితో భ‌ర్తీ చేశారు.

ప్ర‌మోష‌న్స్‌లో మ‌హేష్‌...

గుంటూరు కారం ప్రీ రిలీజ్ ఈవెంట్‌ను జ‌న‌వ‌రి 6న హైద‌రాబాద్‌లో నిర్వ‌హించ‌బోతున్నారు. అదే రోజు గుంటూరు కారం ట్రైల‌ర్‌ను కూడా రిలీజ్ చేయ‌నున్నారు. ప్ర‌స్తుతం న్యూ ఇయ‌ర్ వెకేష‌న్‌లో మ‌హేష్ శుక్ర‌వారం హైద‌రాబాద్‌కు రానున్నాడు. ప్రీ రిలీజ్ ఈవెంట్ నుంచే ఈ సినిమా ప్ర‌మోష‌న్స్ మొద‌లుపెట్ట‌బోతున్నాడు.

గుంటూరు కారం సినిమాకు త‌మ‌న్ సంగీతాన్ని అందిస్తోన్నాడు. ఈ సినిమా బుకింగ్స్ ఆదివారం నుంచి ఓపెన్ కాబోతున్నాయి. సంక్రాంతి సినిమాల్లో మిగిలిన స్టార్ హీరోల సినిమాల‌తో పోలిస్తే గుంటూరుకారం ఎక్కువ థియేట‌ర్ల‌లో రిలీజ్ అవుతోంది. తెలుగు రాష్ట్రాల్లో ఫ‌స్ట్ వీకెండ్‌లో ఈ సినిమా టికెట్ ధ‌ర‌లు పెరిగే అవ‌కాశం ఉన్న‌ట్లు స‌మాచారం.