Kushi in OTT: ఓటీటీలో దూసుకెళ్తున్న ఖుషీ.. టాప్ 2 ట్రెండింగ్స్‌లో ఈ మూవీయే..

Kushi in OTT: ఖుషీ మూవీ ఎన్నో అంచనాల మధ్య సెప్టెంబర్ 1న రిలీజైంది. విజయ్ దేవరకొండ, సమంతలాంటి క్రేజీ కాంబినేషన్.. రిలీజ్ కు ముందే పాటలకు మంచి రెస్పాన్స్ రావడంతో అదే స్థాయిలో సినిమా కూడా ఉంటుందని ఫ్యాన్స్ భావించారు. కానీ సినిమా మాత్రం తీవ్రంగా నిరాశ పరిచింది. తొలి రోజు నుంచే నెగటివ్ టాక్ రావడంతో బాక్సాఫీస్ దగ్గర బోల్తా కొట్టింది.

థియేటర్లలో రిలీజైన సరిగ్గా నెల రోజుల తర్వాత ఓటీటీలోకి వచ్చింది ఖుషీ మూవీ. అక్టోబర్ 1 నుంచి నెట్‌ఫ్లిక్స్ లో స్ట్రీమ్ అవుతోంది. అయితే డిజిటల్ ప్లాట్‌ఫామ్ లో మాత్రం ఈ సినిమాకు మంచి రెస్పాన్స్ వస్తోంది. తొలి మూడు రోజులూ ఈ మూవీని ఎగబడి చూశారు. నెట్‌ఫ్లిక్స్ లో ఉన్న తెలుగు కంటెంట్ లో ఈ ఖుషీ మూవీ టాప్ లో ఉండటం విశేషం.

ఇండియాలోని టాప్ ట్రెండింగ్ మూవీస్ లో ఖుషీ టాప్ 1, 2లో ఉంది. తెలుగు వెర్షన్ టాప్ లో ఉండగా.. హిందీ వెర్షన్ రెండోస్థానంలో ఉంది. ఇక ఖుషీ తమిళ వెర్షన్ ఆరో స్థానంలో ఉండటం విశేషం. అంటే టాప్ 10లో ఖుషీ మూవీ వివిధ భాషల వెర్షన్లే మూడు ఉన్నాయి. ఈ సినిమా స్టోరీ, స్క్రీన్ ప్లే చాలా మంది అభిమానులకు నచ్చలేదు.

మ్యూజిక్, సినిమాటోగ్రఫీ కోసం చూసేవాళ్లు కొందరైతే.. విజయ్, సమంత మధ్య కెమెస్ట్రీ కోసం చూస్తున్న వాళ్లు మరికొందరు ఉన్నారు. ఎప్పుడూ దైవారాధన చేస్తూ ప్రవచనాలు చెప్పే వ్యక్తి ఇంట్లో పుట్టిన హీరోయిన్.. పరమ నాస్తికుడైన వ్యక్తి ఇంట్లో పుట్టిన హీరో మధ్య లవ్ స్టోరీ, పెళ్లి, తర్వాత వచ్చే సమస్యల చుట్టూ ఖుషీ కథ తిరుగుతుంది. అయితే కాస్త ఇంట్రెస్టింగ్ సబ్జెక్టే అయినా.. దీనిని ప్రేక్షకులను ఆకట్టుకునేలా తెరకెక్కించడంలో దర్శకుడు శివ నిర్వాణ పూర్తిగా విఫలమయ్యాడు.

వినసొంపైన పాటలే ఈ సినిమాను కాస్త నిలబెట్టాయి. మైత్రీ మూవీ మేకర్స్ బ్యానర్ పై రవిశంకర్, నవీన్ యెర్నేని ఈ మూవీని తెరకెక్కించారు. విజయ్, సమంతతోపాటు లక్ష్మి, మురళీ శర్మ, సచిన్ ఖేడ్కర్, అలీ, రోహిణి, వెన్నెల కిశోర్, రాహుల్ రామకృష్ణలాంటి నటీనటులున్నా.. సినిమా మెప్పించలేకపోయింది.