KGF Chapter 2 | హిందీ మార్కెట్‌లో కేజీఎఫ్-2 సరికొత్త రికార్డులు

కేజీఎఫ్‌ చిత్రానికి సీక్వెల్‌గా వచ్చిన కేజీఎఫ్ ఛాప్టర్ 2 సరికొత్త రికార్డులను సృష్టిస్తోంది. కన్నడ హీరో యశ్ నటించిన ఈ చిత్రం అన్ని భాషల్లోనూ వసూళ్ల వర్షాన్ని కురిపిస్తోంది. ప్రశాంత్ నీల్ దర్శకత్వం వహించిన ఈ చిత్రం బాక్సాఫీస్ వద్ద దుమ్మురేపుతోంది. ముఖ్యంగా హిందీ మార్కెట్‌లో కలెక్షన్ల సునామీని సృష్టిస్తోంది. విడుదలైన రెండు రోజుల్లోనే ఇక్కడ రూ.100 కోట్ల వసూళ్లను రాబట్టి సౌత్ సినిమా స్టామినా ఏంటో నిరూపించింది.

హిందీ మార్కెట్‌లో బాహుబలి 2, దంగల్ లాంటి చిత్రాలకు కూడా సాధ్యం కాని వసూళ్లను రాబట్టిందీ చిత్రం. ఉత్తరాధిన బ్లాక్‌బాస్టర్ టాక్ దూసుకెళ్తోంది. విడుదలైన తొలి రోజు కేజీఎఫ్ ఛాప్టర్ 2 రూ.53.95 కోట్ల వసూళ్లను కురిపించింది. రెండో రోజు ఈ చిత్రం రూ.46.79 కోట్లతో కలెక్షన్లను కొల్లగొట్టింది. మొత్తంగా రూ.100 కోట్ల మైలురాయిని అధిగమించింది. యశ్ నటనకు ప్రేక్షకులు ఫిదా అవుతున్నారు. ఇదే కొనసాగితే విడుదలైన తొలివారాంతంలోనే హిందీ మార్కెట్‌లో రూ.200 కోట్ల మైలురాయిని అధిగమిస్తుందీ చిత్రం.

హిందీ మార్కెట్‌లో బాహుబలి 2 రికార్డును అధిగమిస్తుందని కొంతమంది ట్రేడ్ పండితులు అంచనా వేస్తున్నారు. అయితే ప్రారంభంలోనే ఇది సాధ్యమవుతుందని చెప్పలేమని స్పష్టం చేశారు. తొలి వారాంతం ముగిసిన తర్వాత వసూళ్లు ఎలా ఉంటుందాని బట్టి ఈ రికార్డు ఆధారపడి ఉంటుందని తెలిపారు.

హోంబలే ఫిల్మ్స్ పతాకంపై విజయ్ కిరగందూర్ నిర్మించిన ఈ చిత్రంలో శ్రీనిధి శెట్టి హీరోయిన్‌గా చేసింది. బాలీవుడ్ నటులు సంజయ్ దత్, రవీనా టాండన్ కీలక పాత్రలు పోషించారు. ప్రశాంత్ నీల్ దర్శకత్వం వహించిన ఈ సినిమా గురువారం ప్రేక్షకుల ముందుకు వచ్చి సూపర్ హిట్ టాక్ తెచ్చుకుంది.