Jhoome Jo Pathaan First Look: ఓవైపు బేషరమ్‌ రంగ్‌ వివాదం.. మరోవైపు ఝూమే జో పఠాన్‌ ఫస్ట్ లుక్‌ రిలీజ్‌

Jhoome Jo Pathaan First Look: బాలీవుడ్‌ బాద్‌షా షారుక్ ఖాన్‌ నటించిన పఠాన్‌ మూవీ తన తొలి సాంగ్‌తోనే తీవ్ర దుమారం రేపిన విషయం తెలుసు కదా. ఈ పాటలో దీపికా పదుకోన్‌ డ్రెస్సింగ్‌, కాషాయ బికినీలపై పెద్ద ఎత్తున విమర్శలు వస్తున్నాయి. సినిమాలో నుంచి ఈ పాటను తీసేయాలని డిమాండ్‌ చేస్తుండగా.. అసలు సినిమానే నిషేధించాలన్న పిలుపులూ మొదలయ్యాయి.

ఈ నేపథ్యంలో ఇదే మూవీ నుంచి ఝూమే జో పఠాన్‌ సాంగ్‌ ఫస్ట్‌ లుక్‌ రిలీజైంది. మంగళవారం (డిసెంబర్‌ 20) మేకర్స్‌ ఈ ఫస్ట్‌ లుక్‌ రిలీజ్‌ చేశారు. ఇది వెంటనే సోషల్‌ మీడియాలో వైరల్‌గా మారింది. ఈ సాంగ్‌ను మేకర్స్‌ రిలీజ్‌ చేయాల్సి ఉండగా.. అంతకుముందే షారుక్‌ ఖాన్‌ అభిమాని ఒకరు తన వెరిఫైడ్‌ ట్విటర్ అకౌంట్‌లో ఫస్ట్ లుక్‌ పోస్ట్‌ చేయడం విశేషం.

అయితే ఈ సాంగ్‌లోనూ దీపికా తన అరకొర దుస్తులతోనే కనిపించినట్లు ఫస్ట్‌ లుక్‌ చూస్తేనే స్పష్టమవుతోంది. బేషరమ్‌ రంగ్‌ సాంగ్‌పై ఎన్ని వివాదాలు ఉన్నా.. ఆ పాట సూపర్‌ హిట్‌ అయింది. ఇప్పుడు ఝూమే జో పఠాన్‌ సాంగ్‌ కూడా రానుండటంతో దీనిపై భారీ అంచనాలు ఉన్నాయి. ఈ ఝూమే జో పఠాన్‌ సాంగ్‌ ఓ ఆధునిక ఖవాలీలా ఉంటుందని ఆ ఫ్యాన్‌ పేజ్‌ చెప్పడం విశేషం.

డిసెంబర్‌ 12న బేషరమ్‌ రంగ్‌ సాంగ్‌ రిలీజ్‌ అయిన విషయం తెలిసిందే. ఈ పాట మొత్తం దీపికా బికినీల్లోనే కనిపించింది. ఆమె మరీ రెచ్చిపోయి ఇలాంటి దుస్తులు వేసుకోవడంతోపాటు ఓ సందర్భంలో కాషాయ రంగు బికినీ ధరించడం, ఆమె పక్కన షారుక్‌ ఆకుపచ్చ డ్రెస్‌లో కనిపించడం వివాదానికి కారణమైంది. ఈ పాటపై మధ్యప్రదేశ్‌ మంత్రి తీవ్ర అసంతృప్తి వ్యక్తం చేస్తూ సినిమాను నిషేధిస్తామనీ హెచ్చరించారు.

పఠాన్‌ మూవీపై భారీ అంచనాలే ఉన్నాయి. ఈ సినిమా జనవరి 25న రిలీజ్‌ కాబోతోంది. సిద్ధార్థ్‌ ఆనంద్‌ డైరెక్ట్‌ చేసిన ఈ మూవీని యశ్‌ రాజ్‌ ఫిల్మ్స్‌ ప్రొడ్యూస్‌ చేసింది. ఈ మూవీలో దీపికా పదుకోన్‌, జాన్‌ అబ్రహం కూడా నటించారు. హిందీతోపాటు తెలుగు, తమిళంలోనూ ఈ సినిమా రిలీజ్‌ కాబోతోంది. ఇప్పటికే ఓం శాంతి ఓం, చెన్నై ఎక్స్‌ప్రెస్‌, హ్యాపీ న్యూ ఇయర్‌లాంటి సినిమాల్లో కలిసి నటించిన షారుక్‌, దీపికా.. నాలుగోసారి కలిసి సిల్వర్‌ స్క్రీన్‌పై సందడి చేయబోతున్నారు.