Johnny Depp: 25 ఏళ్ల తర్వాత మెగాఫోన్‌ పట్టనున్న జానీ డెప్‌

జానీ డెప్‌ మళ్లీ మెగా ఫోన్‌ పట్టుకుంటున్నాడు. వచ్చే ఏడాది అతడు ఓ మూవీకి దర్శకత్వం వహించనున్నాడు. ఇటాలియన్‌ ఆర్టిస్ట్‌ అమెదియో మొదిలియానీ బయోపిక్‌ను తెరకెక్కించనున్నాడు. ఈ సినిమాకు డెప్‌తోపాటు నటుడు అల్‌ పచీనో నిర్మించనున్నట్లు సమాచారం. అయితే ఈ సినిమాలో నటీనటులు ఎవరు? జానీ డెప్‌ నటిస్తాడా లేదా అన్నది ఇంకా తెలియలేదు.

అమెదియో మొదిలియానీ ఓ ఇటాలియన్‌ పెయింటర్‌. అయితే అతడు బతికి ఉన్నప్పుడు రాని పేరు ప్రతిష్టలు చనిపోయిన తర్వాతే వచ్చాయి. తనను తాను ఓ విఫల పెయింటర్‌గా అతడు చెప్పుకునే వాడు. 1920లో మొదిలియానీ చనిపోయిన తర్వాత అతడు వేసిన పెయింటింగ్స్‌కు డిమాండ్‌ పెరిగిపోయింది. 20వ శతాబ్దం మొదట్లో పారిస్‌లో జీవించిన మొదిలియానీ జీవిత చరిత్రను ఈ మూవీ కళ్లకు కట్టనుంది.

వచ్చే ఏడాది ఫ్రాన్స్‌లోనే ఈ మొదిలియానీ మూవీ షూటింగ్ ప్రారంభం కానుంది. ఈ ఏడాది చివర్లోపు ఈ సినిమా నటీనటులను ప్రకటించనున్నారు. జానీ డెప్‌ తన కెరీర్‌లో ఒకే సినిమాకు దర్శకత్వం వహించాడు. 1997లో ది బ్రేవ్‌ అనే మూవీకి అతడే డైరెక్టర్‌. మార్లన్‌ బ్రాండోతో కలిసి జానీ డెప్‌ ఆ మూవీలో నటించాడు. ఇక కెరీర్‌లో 11 సినిమాలకు కూడా నిర్మాతగా వ్యవహరించాడు.