Guntur Kaaram: గుంటూరు కారంలో ఆ 45 నిమిషాలు ‌ఫ్యాన్స్‌కు పండగే: ప్రొడ్యూసర్ నాగ వంశీ

Guntur Kaaram: ఈ ఏడాది సంక్రాంతి సినిమాల్లో ఒకటిగా వస్తోంది సూపర్ స్టార్ మహేష్ బాబు నటించిన గుంటూరు కారం. త్రివిక్రమ్, మహేష్ కాంబినేషన్ లో వస్తున్న మూడో సినిమా ఇది. దీంతో సినిమాపై భారీ అంచనాలు ఉన్నాయి. పైగా ఈ సంక్రాంతి సినిమాల్లో అన్నింటి కంటే పెద్ద మూవీగా గుంటూరు కారం వస్తోంది. అయితే ఈ సినిమా గురించి తాజాగా ప్రొడ్యూసర్ నాగవంశీ ఇంట్రెస్టింగ్ విషయాలు వెల్లడించాడు.

సంక్రాంతికి ఐదు సినిమాలు రిలీజ్ కానుండటంతో గుంటూరు కారం మూవీకి ఊహించిన స్థాయిలో థియేటర్లు దొరకడం అనుమానంగా మారింది. ఇదే విషయంపై ఆందోళన వ్యక్తం చేస్తూ మహేష్ బాబు ఫ్యాన్స్ ప్రొడ్యూసర్ నాగవంశీతో సోషల్ మీడియా ఎక్స్ ద్వారా మాట్లాడారు. ఈ సందర్భంగా థియేటర్ల విషయంలో వాళ్లకు భరోసా ఇస్తూ సినిమా గురించి కూడా కొన్ని ఇంట్రెస్టింగ్ విషయాలు అతడు వెల్లడించాడు.

ఆ 45 నిమిషాలు ఫుల్ యాక్షన్

గుంటూరు కారం మూవీలో చివరి 45 నిమిషాలు చాలా అద్భుతంగా ఉంటుందని నాగవంశీ తెలిపాడు. "ఈ సినిమాలో చివరి 45 నిమిషాలు అద్భుతం. మొత్తం ఫైట్ సీక్వెన్స్‌లు, ఎమోషన్స్, కుర్చీ మడతపెట్టి సాంగ్ తో ఫ్యాన్స్ ను ఉర్రూతలూగిస్తుంది. గుంటూరు కారంతో పెద్ద హిట్ కొట్టబోతున్నాం. థియేటర్ల సంగతి నేను చూసుకుంటాను. సినిమాను నెక్ట్స్ లెవల్ కు తీసుకెళ్లే బాధ్యత అభిమానులదే" అని అతడు స్పష్టం చేశాడు.

ఇక మరో ఇంటర్వ్యూలో నాగవంశీ మాట్లాడుతూ.. ప్రతి ఏరియాలో రాజమౌళి సినిమా నంబర్లకు దగ్గరగా వెళ్తున్నామని చెప్పడం విశేషం. గతంలో అల వైకుంఠపురంలో మూవీతోనూ ఇలాగే దగ్గరగా వెళ్లామని, ఇప్పుడు గుంటూరు కారంతో మరో భారీ హిట్ కొట్టబోతున్నట్లు చెప్పాడు. ఈ సినిమాకు ఉన్న థియేటర్ల సమస్య జనవరి 7 లేదా 8లోగా ఓ కొలిక్కి వస్తుందని కూడా నాగవంశీ తెలిపాడు.

త్రివిక్రమ్ డైరెక్షన్ లో వస్తున్న ఈ సినిమాలో శ్రీలీల, మీనాక్షి చౌదరి ఫిమేల్ లీడ్స్ గా నటించారు. తమన్ మ్యూజిక్ అందించాడు. ఈ మధ్యే రిలీజైన థర్డ్ సింగిల్ కుర్చీ మడతపెట్టి సాంగ్ కు ఫ్యాన్స్ నుంచి మంచి రెస్పాన్స్ వచ్చింది. గుంటూరు కారం మూవీలో జగపతి బాబు, ప్రకాశ్ రాజ్, రమ్య కృష్ణ, రాహుల్ రవీంద్రన్, వెన్నెల కిశోర్ ముఖ్యమైన పాత్రల్లో కనిపించనున్నారు.