ETV WIN offer: ఆ రెండు రోజులూ అన్నీ ఫ్రీగా చూసేయండి.. ఈటీవీ విన్ ఓటీటీ బంపర్ ఆఫర్

ETV WIN offer: ప్రముఖ తెలుగు ఎంటర్‌టైన్మెంట్ ఛానెల్ ఈటీవీకి చెందిన ఓటీటీ ఈటీవీ విన్ (ETV Win) ప్రేక్షకులకు ఓ బంపర్ ఆఫర్ ఇచ్చింది. రెండు రోజుల పాటు తమ ఓటీటీలో ఉన్న మొత్తం కంటెంట్ ను ఫ్రీగా చూసేయొచ్చని చెప్పింది. వాచ్ పార్టీ పేరుతో ఈ వీకెండ్ లో రెండు రోజుల పాటు ఈటీవీ విన్ ఓటీటీలో ఉన్న మొత్తం సినిమాలు, షోలను ఫ్రీగా చూడొచ్చని చెప్పడం విశేషం.

"మీ అందరి కోసం ఎంతో ఉత్సాహవంతమైన అనౌన్స్‌మెంట్. ఈటీవీ విన్ ఆగస్ట్ 26, 27 తేదీల్లో వాచ్ పార్టీ తీసుకొస్తోంది. ఈటీవీ విన్ లో అన్ని సినిమాలు, షోలను ఈ రెండు రోజుల పాటు ఫ్రీగా చూసేయండి. ఈ వీకెండ్ లో మీ ప్లాన్స్ అన్నీ క్యాన్సిల్ చేసుకొని ఈటీవీ విన్ లోని కంటెంట్ ను బింజ్ వాచ్ చేసేయండి" అని సోషల్ మీడియా ఎక్స్ (గతంలో ట్విటర్) ద్వారా అనౌన్స్ చేసింది.

ఈటీవీ విన్ ఓటీటీలో పార్థుడు, అన్నపూర్ణ ఫొటో స్టూడియో, అసలు, డియర్ మేఘలాంటి లేటెస్ట్ సినిమాలతోపాటు ఈటీవీలో వచ్చే అన్ని షోలు అందుబాటులో ఉన్నాయి. ఈటీవీలోని పాపులర్ షోలు జబర్దస్త్, శ్రీదేవి డ్రామా కంపెనీ, పాడుతా తీయగా, సుమ అడ్డా, డ్యాన్స్ షో ఢీలాంటివన్నీ ఈటీవీ విన్ యాప్ లో ఉన్నాయి.

మామూలుగా అయితే ఈ షోలు, సినిమాలను ఈటీవీ విన్ ఓటీటీ సబ్‌స్క్రైబ్ చేసుకుంటేనే చూసే అవకాశం ఉంటుంది. అయితే ఈ వీకెండ్ అంటే ఆగస్ట్ 26, 27 తేదీల్లో మాత్రం ఈ ఓటీటీలోని లేటెస్ట్ మూవీస్, షోలన్నింటినీ ఫ్రీగా చూసే వీలు కల్పించారు.

ఈటీవీ విన్ సబ్‌స్క్రిప్షన్ ఇలా..

ఈటీవీ విన్ ఓటీటీని మిగతా ఓటీటీల్లాగే సబ్‌స్క్రైబ్ చేసుకోవచ్చు. ఇందులో బేసిక్, ప్రీమియం ప్లాన్స్ అందుబాటులో ఉన్నాయి. బేసిక్ ప్లాన్ కోసం ఏడాదికి రూ.365 చెల్లించాల్సి ఉంటుంది. ఇక ప్రీమియం కావాలనుకుంటే నెలకు రూ.99 లేదంటే ఏడాదికి రూ.499 చెల్లించాలి.

బేసిక్ లో కేవలం మొబైల్ లో మాత్రమే అది కూడా హెచ్‌డీ క్వాలిటీ వీడియోలు చూడొచ్చు. అదే ప్రీమియంలో అయితే మూడు డివైస్ ల వరకూ ఫుల్ హెచ్‌డీ క్వాలిటీలో చూసే అవకాశం ఉంది. ఇక ఈ రెండు ప్లాన్స్ లోనూ లైవ్ టీవీతోపాటు టీవీ కంటే ముందే షోలు, సినిమాలను చూడొచ్చు.