Chandramukhi 2: చంద్రముఖి 2 వాయిదాకు షాకింగ్ కారణం చెప్పిన దర్శకుడు.. నమ్మేలా లేదంటున్న నెటిజన్లు

Chandramukhi 2: చంద్రముఖి 2 సినిమా రిలీజ్‍కు సిద్ధమైంది. బాలీవుడ్ స్టార్ కంగనా రనౌత్, రాఘవ లారెన్స్ కీలకపాత్రల్లో నటించిన ఈ మూవీ సెప్టెంబర్ 28వ తేదీన విడుదల కానుంది. ముందుగా సెప్టెంబర్ 15వ తేదీన ఈ చిత్రం రిలీజ్ కావాల్సి ఉండగా.. సడన్‍గా వాయిదా వేసింది చిత్రయూనిట్. సెప్టెంబర్ 28వ తేదీకి రిలీజ్‍ను మార్చింది. అయితే, 15న మార్క్ ఆంటోనీ ఉండటంతోనే పోటీ వద్దనుకొని చంద్రముఖి 2ను వాయిదా వేశారన్న వాదనలు వినిపించాయి. గ్రాఫిక్స్ ఆలస్యం కారణమని అప్పట్లో ఆ మూవీ యూనిట్ చెప్పింది. అయితే, చంద్రముఖి 2 విడుదలను ఎందుకు వాయిదా వేయాల్సి వచ్చిందో ఇప్పుడు మరో కారణాన్ని చెప్పారు ఈ సినిమా దర్శకుడు పి.వాసు.

చంద్రముఖి 2 తెలుగు ప్రమోషన్లలో భాగంగా ఆ చిత్ర యూనిట్ హైదరాబాద్ వచ్చింది. ఈ సందర్భంగా ఈ సినిమా వాయిదా గురించి దర్శకుడు పి.వాసు వివరణ ఇచ్చారు. సినిమా మొత్తం సిద్ధమయ్యాక ఫైనల్ కాపీ రెడీ చేసే సమయంలో ఏకంగా 480 షాట్స్ కనిపించకుండా పోయాయని అన్నారు. దాన్ని సరిచేసేందుకు 150 మంది టెక్నిషియన్లు ఐదు రోజులు కష్టపడి.. అన్ని షాట్లను సెర్చ్ చేసి.. సీక్వెన్స్ సరిచేశారని వాసు చెప్పారు. దీని కారణంగానే విడుదలను వాయిదా వేయాల్సి వచ్చిందని అన్నారు.

“రెడీ చేశాక సెప్టెంబర్ 8న ఫైనల్ కాపీని పూర్తిగా చూడాలనుకున్నాం. అప్పటికే 15వ తేదీ రిలీజ్ అని అనౌన్స్ చేశాం. అప్పటికే సెన్సార్ కోసం రఫ్ కాపీ సిద్ధం చేశాం. అయితే, ఆ తర్వాత 8వ తేదీ రాత్రి నాకు కాల్ వచ్చింది. 480 షాట్స్ కనిపించడం లేదని చెప్పారు. షాకయ్యా. ఇలా కూడా జరుగుతుందా అని ఏం చేయాలో అర్థం కాలేదు” అని వాసు చెప్పారు. మిస్ అయిన వాటి కోసం కంప్లీట్‍గా సెర్చ్ చేయాల్సి వచ్చిందని అన్నారు. ఒక్క సీక్వెన్స్ కోసం 150 మంది టెక్నిషియన్స్ పని చేసి, నాలుగు నుంచి ఐదు రోజుల్లో అంతా సరిచేశారని వాసు వెల్లడించారు. మరో సినిమా పోటీలో ఉన్నందుకు వాయిదా వేసుకోలేదని చెప్పారు.

డైరెక్టర్ వాసు చెప్పిన కారణం నమ్మేలా లేదని కొందరు నెటిజన్లు కామెంట్లు చేస్తున్నారు. హఠాత్తుగా ఏకంగా 480 షాట్స్ ఎలా మిస్ అవుతాయని ప్రశ్నిస్తున్నారు. ఒకవేళ షాట్స్ మిస్ అయి ఉంటే.. ఐదు రోజుల్లోనే రిట్రైవ్ చేయడం సాధ్యమేనా అని ప్రశ్నిస్తున్నారు. వాసు చెప్పిన కారణం అనుమానంగానే ఉందని ట్రోల్ చేస్తున్నారు.

చంద్రముఖి 2 సినిమాలో కంగనా రనౌత్, రాఘవ లారెన్స్ ప్రధాన పాత్రల్లో నటించారు. చంద్రముఖి చిత్రానికి 18 ఏళ్ల తర్వాత సీక్వెల్‍గా ఈ సినిమా వస్తోంది. పి.వాసు దర్శకత్వం వహించిన ఈ మూవీకి ఎంఎం కీరవాణి సంగీతం అందించారు. చంద్రముఖి 2 తెలుగు ప్రీ-రిలీజ్ ఈవెంట్ నేటి (సెప్టెంబర్ 24) సాయంత్రం హైదరాబాద్‍లో జరగనుంది. సెప్టెంబర్ 28న తమిళంతో పాటు తెలుగు, హిందీ, కన్నడ, మలయాళం భాషల్లో చంద్రముఖి 2 ఈ సినిమా రిలీజ్ కానుంది.