David Warner | వార్నర్ భాయ్.. ఇక వదలవా.. వరుసగా పుష్ప రీల్స్ చేస్తున్న క్రికెటర్

వీలు చిక్కినప్పుడల్లా సోషల్ మీడియాలో వీడియోలో పోస్ట్ చేస్తూ అలరించే క్రికెటర్లలో డేవిడ్ వార్నర్ ముందు వరుసలో ఉంటారు. ముఖ్యంగా భారతీయ చిత్రాలకు సంబంధించిన ఫేస్ మార్ఫ్ వీడియోలతో అభిమానులతో పంచుకుంటూ ఉంటారు. అందులోనూ తెలుగు సినిమాలపై ప్రత్యేక అభిమానాన్ని చాటుకుంటూ పోస్టులు పెడుతుంటాడు. అల్లు అర్జున్ నటించిన పుష్ప వీడియోల గురించైతే వేరే చెప్పనక్కర్లేదు. ఇప్పుటికే ఆ సినిమాకు సంబంధించిన చాలా రీల్స్‌ను ఇన్‌స్టాగ్రామ్‌లో పోస్ట్ చేశారు. తాజాగా మరోసారి పుష్ప చిత్రంపై అభిమానాన్ని చాటుకుంటూ వీడియోను షేర్ చేశారు.

ఇందులో అల్లు అర్జున్ మాదిరిగా ఫేస్ మార్పింగ్ చేసి వార్నర్ అలరించారు. ప్రస్తుతం ఈ వీడియో సామాజిక మాధ్యమాల్లో వైరల్ అవుతోంది. 24 గంటల్లోనే 2 మిలియన్ల వ్యూస్‌ను అందుకుందీ వీడియో.

ఈ ఆస్ట్రేలియన్ క్రికెటర్‌కు అల్లు అర్జున్ అంటే వల్లమాలిన అభిమానం. లాక్‌డౌన్ సమయంలో బుట్ట బొమ్మ పాటతో సంచలనమే సృష్టించారు. అప్పట్లో ఎక్కడ చూసినా ఇదే పాటతో వార్నర్ అలరించారు. క్రికెట్ మైదానంలోనూ బుట్టబొమ్మ స్టెప్పేసి అదరగొట్టారు. ఇటీవలే పుష్ప చిత్రంలోని పాపులర్ డైలాగ్ అయిన పుష్ప అంటే ఫ్లవర్ అనుకుంటివా.. ఫైర్ అనే డైలాగ్ తన కూతురుతో కలిసి లిప్ సింక్ చేశారు. అయితే ఈ డైలాగ్‌ను పుష్ప హింది వెర్షన్‌లో చెప్పారు. అంతేకాకుండా సామి సామి అంటూ తన కూతుర్ల చేత బుల్లి బుల్లి స్టెప్పులు వేయించాడు.

గతేడాది వరకు సన్ రైజర్స్ హైదరాబాద్‌కు కెప్టెన్‌గా విశేష సేవలందించిన డేవిడ్ వార్నర్‌ను వేలానికి ముందే ఆ ఫ్రాంచైజీ వదిలేసింది. దీంతో ఇటీవల జరిగిన ఐపీఎల్ వేలంలో వార్నర్‌ను దిల్లీ క్యాపిటల్స్ కొనుగోలు చేసింది. త్వరలో జరగనున్న ఐపీఎల్ -2022 సీజన్‌లో దిల్లీ తరఫున ప్రాతినిధ్యం వహించనున్నాడు మన డేవిడ్ భాయ్.