Conjuring Kannappan OTT Date: ఓటీటీలో వచ్చేస్తున్న కోలీవుడ్ హారర్ కామెడీ మూవీ.. తెలుగులోనూ స్ట్రీమింగ్

Conjuring Kannappan OTT Date: హారర్ కామెడీ జానర్‌లో తమిళ సినిమా కన్‍జ్యూరింగ్ కన్నప్పన్ డిసెంబర్ 8వ తేదీన థియేటర్లలోకి వచ్చింది. ఈ చిత్రంలో సతీశ్, రెజీనా కసాండ్ర ప్రధాన పాత్రలు పోషించారు. ఈ మూవీకి మంచి టాక్ వచ్చింది. కోలీవుడ్‍లో మోస్తరు హిట్ అయింది. కొత్త డైరెక్టర్ సెల్విన్ రాజ్ జేవియర్ ఈ చిత్రాన్ని తెరకెక్కించారు.

ఇప్పుడు ఈ కన్‍జ్యూరింగ్ కన్నప్పన్ సినిమా ఓటీటీలోకి అడుగుపెట్టనుంది. ఈ సినిమా స్ట్రీమింగ్ గురించి ప్రముఖ ఓటీటీ ప్లాట్‍ఫామ్ నెట్‍ఫ్లిక్స్ అధికారికంగా ప్రకటించింది. జనవరి 5వ తేదీన ఈ సినిమా నెట్‍ఫ్లిక్స్ ఓటీటీలో స్ట్రీమింగ్‍కు రానుంది. దీంతో థియేటర్లలో రిలీజైన నెల రోజుల్లోనే ఓటీటీలోకి ఈ మూవీ వస్తున్నట్టయింది.

తెలుగులో కూడా..

కన్‍జ్యూరింగ్ కన్నప్పన్ సినిమా తమిళంతో పాటు తెలుగు, మలయాళం, కన్నడ భాషల్లోనూ జనవరి 5న స్ట్రీమింగ్‍కు రానుంది. ఈ విషయాన్ని నెట్‍ఫ్లిక్స్ అధికారికంగా వెల్లడించింది.

కన్‍జ్యూరింగ్ కన్నప్పన్ చిత్రంలో సతీశ్, రెజీనాతో పాటు నాజర్, ఆనంద్ రాజ్, శరణ్య పొన్వనన్, గణేశ్, రెజిన్ కింగ్‍స్లే కీరోల్స్ చేశారు. దెయ్యాలు ఉండే పీడకలల్లో చిక్కుకోవడం చుట్టూ ఈ మూవీ కథ తిరుగుతుంది. ఈ సినిమాకు యువన్ శంకర్ రాజా సంగీతం అందించారు. ఏజీఎస్ ఎంటర్‌టైన్‍మెంట్స్ పతాకం ఈ చిత్రాన్ని నిర్మించింది.

కలల్లో దెయ్యాలు

తాను చేసిన ఓ పని వల్ల పీడకలల్లో చిక్కుకుంటుంటాడు కన్నప్పన్ (సతీశ్). నిద్రించిన ప్రతీసారి అతడి కలల్లో దెయ్యాలు వస్తుంటాయి. అవి నిజజీవితంపై కూడా ప్రభావం చూపిస్తుంటాయి. అతడి కుటుంబ సభ్యులకు సమస్యలు వస్తాయి. మరి ఈ కలల నుంచి తప్పించుకునే మార్గాన్ని కన్నప్పన్ కనుగొన్నాడా? దెయ్యాల నుంచి తనను, తన కుటుంబాన్ని కాపాడుకున్నాడా? అనేదే కన్‍జ్యూరింగ్ కన్నప్పన్ మూవీ ప్రధాన కథగా ఉంది.

కన్‍జ్యూరింగ్ కన్నప్పన్ చిత్రానికి పాజిటివ్ టాక్ వచ్చింది. హారర్ ఎలిమెంట్లతో పాటు కామెడీ కూడా ఈ మూవీలో వర్కౌట్ అయిందనే అభిప్రాయాలు వ్యక్తమయ్యాయి. హారర్ కామెడీ అయిన డ్రీమ్ క్యాచర్ అనే కాన్సెప్ట్ ఆకట్టుకుంది. ఈ చిత్రంతో కొత్త డైరెక్టర్ సెల్విన్ రాజ్ మంచి మార్కులే కొట్టేశారు.