Chiranjeevi: ‘కేబీసీ’లో కనిపించనున్న చిరంజీవి.. ‘గురూజీ’ అంటూ అమితాబ్‍కు పుట్టిన రోజు శుభాకాంక్షలు

Chiranjeevi - Amitabh Bachchan: బాలీవుడ్ లెజెండరీ యాక్టర్ అమితాబ్ బచ్చన్, టాలీవుడ్ మెగాస్టార్ చిరంజీవి మధ్య చాలా మంచి స్నేహం ఉంది. ఒకరినొకరు అమితంగా గౌరవించుకోవడంతో పాటు చాలా ఆప్యాయంగా ఉంటారు. చిరంజీవి హీరోగా నటించిన ‘సైరా నరసింహా రెడ్డి’ చిత్రంలో అమితాబ్ బచ్చన్ కీలక పాత్ర చేశారు. ఆ తర్వాత వీరిద్దరి బంధం మరింత బలపడింది. కాగా, నేడు (అక్టోబర్ 11) అమితాబ్ బచ్చన్ 81వ సంవత్సరంలో అడుగుపెట్టారు. ఈ సందర్భంగా అమితాబ్‍కు పుట్టిన రోజు శుభాకాంక్షలు చెప్పారు చిరంజీవి.

“వెరీ హ్యాపీ బర్త్ డే గురూజీ అమితాబ్ బచ్చన్. సుదీర్ఘ జీవితమంతా మీరు సంతోషంగా, మంచి ఆరోగ్యంతో ఉండాలని ఆకాంక్షిస్తున్నా. మరిన్ని చాలా సంవత్సరాలు మీరు మీ నటన ప్రతిభతో మా లాంటి కోట్లాది మందికి స్ఫూర్తిని ఇస్తూనే ఉండాలి. మీ ఈ పుట్టిన రోజు నాకు చాలా ప్రత్యేకమైనది. వర్చువల్‍గా కేబీసీ (కౌన్ బనేగా కరోడ్‍పతి) షోలో మిమ్మల్ని కలిసేందుకు ఎదురుచూస్తున్నా” అని చిరంజీవి ట్వీట్ చేశారు.

సైరా నరసింహా రెడ్డి షూటింగ్ సమయంలో అమితాబ్‍తో కలిసిన పని చేసిన జ్ఞాపకాల ఫొటోలను కూడా చిరంజీవి పోస్ట్ చేశారు. అలాగే, నేడు ప్రసారం కానున్న కౌన్ బనేగా కరోడ్‍పతి (కేబీసీ) స్పెషల్ ఎపిసోడ్‍లో వర్చువల్‍గా కనిపించనున్నట్టు చిరూ వెల్లడించారు. కేబీసీ గేమ్ షో సోనీ ఎంటర్‌టైన్‍మెంట్ ఛానెల్‍లో రాత్రి 9 గంటలకు ప్రసారం అవుతుంది.

ఎనిమిది పదుల వయసులోనూ వరుసగా చిత్రాలు చేస్తున్నారు అమితాబ్ బచ్చన్. సినిమాలపై తనకు ఉన్న ఇష్టాన్ని, అంకితభావాన్ని చాటిచెబుతున్నారు. ప్రస్తుతం గణపత్, కల్కి 2898 ఏడీ, బటర్‌ఫ్లై, తలైవర్ 170 చిత్రాలు చేస్తున్నారు అమితాబ్ బచ్చన్. ఈ అన్ని సినిమాల్లో కీలకమైన పాత్రలు పోషిస్తున్నారు. గణ్‍పత్ సినిమా అక్టోబర్ 20వ తేదీనే రిలీజ్ కానుంది.