Bhola Shankar Hindi Release Date: హిందీలోకి భోళాశంక‌ర్ - చిరంజీవి పాత్ర‌కు బాలీవుడ్‌ సీనియ‌ర్ హీరో డ‌బ్బింగ్

Bhola Shankar Hindi Release Date: తెలుగులో డిజాస్ట‌ర్ టాక్‌ను మూట‌గ‌ట్టుకున్న చిరంజీవి భోళాశంక‌ర్ మూవీ హిందీలో రిలీజ్ కాబోతుంది. ఆగ‌స్ట్ 25న భోళాశంక‌ర్ హిందీ వెర్ష‌న్ థియేట‌ర్ల‌ లో విడుదలకానుంది. హిందీ రిలీజ్ డేట్‌ను సోమ‌వారం ప్ర‌క‌టించారు. హిందీ వెర్షన్ టీజ‌ర్‌ను రిలీజ్ చేశారు. హిందీ వెర్ష‌న్‌లో చిరంజీవి పాత్ర‌కు బాలీవుడ్ సీనియ‌ర్ హీరో జాకీ ష్రాఫ్ డ‌బ్బింగ్ చెప్పాడు. చిరంజీవితో ఉన్న స్నేహం వ‌ల్లే భోళాశంక‌ర్ సినిమాకు అత‌డు డ‌బ్బింగ్ చెప్పిన‌ట్లు స‌మాచారం.

తెలుగు రిలీజ్‌కు ముందే ఈ సినిమాను హిందీలోకి డ‌బ్ చేయాల‌ని మేక‌ర్స్ నిర్ణ‌యించుకున్నారు.ఈ సినిమా డ‌బ్బింగ్ రైట్స్‌ను బాలీవుడ్ నిర్మాణ సంస్థ ఆర్‌కేడీ స్టూడియోస్‌ భారీ రేటుకు ద‌క్కించుకున్న‌ట్లు తెలిసింది. తొలుత తెలుగుతో పాటు హిందీ భాష‌లోనూ ఆగ‌స్ట్ 11న భోళాశంక‌ర్‌ను రిలీజ్ చేయాల‌ని ప్లాన్ చేశారు. కానీ డ‌బ్బింగ్‌, పోస్ట్ ప్రొడ‌క్ష‌న్ కార్య‌క్ర‌మాల డిలే వ‌ల్ల రెండు వారాలు ఆల‌స్యంగా ఆగ‌స్ట్ 25న భోళాశంక‌ర్ బాలీవుడ్ ప్రేక్ష‌కుల ముందుకు రాబోతోంది.

త‌మిళంలో అజిత్ హీరోగా న‌టించిన వేదాళం సినిమాకు రీమేక్‌గా భోళాశంక‌ర్‌ను రూపొందింది. అన్నాచెల్లెళ్ల అనుబంధానికి యాక్ష‌న్ అంశాల‌ను జోడించి ద‌ర్శ‌కుడు మెహ‌ర్ ర‌మేష్ ఈమూవీని తెర‌కెక్కించాడు. అవుట్‌డేటెడ్ కాన్సెప్ట్ వ‌ల్ల భోళాశంక‌ర్‌ ప్రేక్ష‌కుల్ని మెప్పించ‌లేక‌పోయింది. కామెడీ, సెంటిమెంట్‌, యాక్షన్‌తో పాటు ఏ అంశంలో కొత్త‌ద‌నం క‌నిపించ‌లేద‌నే విమ‌ర్శ‌లు వినిపిస్తోన్నాయి.

తొలిరోజు 15 కోట్ల వ‌ర‌కు షేర్ క‌లెక్ష‌న్స్ రాబ‌ట్టి ప‌ర్వాలేద‌నిపించింది. రెండో రోజు నుంచి క‌లెక్ష‌న్స్ భారీగా డ్రాప్ అయ్యాయి. శ‌ని, ఆదివారాల్లో మూడు కోట్ల లోపే వ‌సూళ్ల‌ను రాబ‌ట్టింది. దాదాపు 80 కోట్ల ప్రీ రిలీజ్ టార్గెట్‌తో రిలీజైన ఈ మూవీ ఇప్ప‌టివ‌ర‌కు ఇర‌వై ఐదు కోట్ల లోపే క‌లెక్ష‌న్స్‌ను సొంతం చేసుకున్న‌ది. భోళాశంక‌ర్ సినిమాను ఏకే ఎంట‌ర్‌టైన‌ర్‌మెంట్స్ ప‌తాకంపై అనిల్ సుంకర నిర్మించారు.

ఏజెంట్ త‌ర్వాత ఈ సినిమా కూడా అనిల్ సుంక‌ర‌కు పెద్ద షాక్ ఇవ్వ‌డం ఖాయమ‌నే ట్రేడ్ వ‌ర్గాలు చెబుతోన్నాయి. న‌ల‌భై కోట్ల‌కుపైగా భోళాశంకర్ న‌ష్టాల‌ను మిగిల్చే అవ‌కాశం ఉన్న‌ట్లు అంచ‌నా వేస్తోన్నారు.