Chiranjeevi Venkatesh: వెంకటేష్‌తో చిరంజీవి మల్టీ స్టారర్ మూవీ.. వెంకీ 75 ఈవెంట్‌లో మెగాస్టార్

Chiranjeevi At Venky 75 Event: తెలుగు సినీ ఇండస్ట్రీలో ఫ్యామిలీ హీరోగా పేరు తెచ్చుకున్నాడు విక్టరీ వెంకటేష్. ఆయన తాజాగా నటిస్తున్న చిత్రం సైంధవ్. హిట్ సిరీస్ డైరెక్టర్ శైలేష్ కొలను తెరకెక్కిస్తున్న సైంధవ్‌పై భారీ అంచనాలే నెలకొన్నాయి. నిహారిక ఎంటర్టైన్‌మెంట్ బ్యానర్‌లో వెంకట్ బోయినపల్లి నిర్మిస్తున్న ఈ సినిమాలో వెంకటేష్‌కు జోడీగా జెర్సీ హీరోయిన్ శ్రద్ధా శ్రీనాథ్ నటిస్తోంది.

సైంధవ్ మూవీలో విలన్‌గా పాపులర్ బాలీవుడ్ యాక్టర్ నవాజుద్ధీన్ సిద్ధిఖీ చేస్తోండగా.. హీరోయిన్స్ రుహానీ శర్మ, ఆండ్రియా కీలక పాత్రలు పోషిస్తున్నారు. అయితే వెంకటేష్‌కు సైంధవ్ 75వ సినిమా. వెంకటేష్ కలియుగ పాండవులు సినిమాతో తెలుగు చిత్రపరిశ్రమకు హీరోగా పరిచయం అయిన విషయం తెలిసిందే. ఈ సందర్భంగా కలియుగ పాండవులు టు సైంధవ్ పేరుతో బుధవారం (డిసెంబర్ 27) రాత్రి వెంకటేష్ సినిమాల ప్రయాణాన్ని వేడుకగా నిర్వహించారు.

వెంకీ 75 పేరుతో జరిగిన ఈ కార్యక్రమానికి ముఖ్య అతిథిగా చిరంజీవి విచ్చేశారు. ఈ సందర్భంగా "నా సోదరుడు వెంకీతో ఓ సినిమా చేయాలని ఉంది. మా కాంబోకి ఒక స్టోరీ రావాలని నేను కోరుకుంటున్నాను" అని మెగాస్టార్ చిరంజీవి తెలిపారు. ఈ విషయంపై అక్కడే వెంకటేష్ కూడా స్పందించాడు. "చిరంజీవి గారితో సినిమా ఉంటుంది. ఆ సినిమా అదిరిపోతుంది. గుర్తు పెట్టుకోండి" అని మరింత బలంగా వెంకటేష్ చెప్పుకొచ్చాడు.

చిరంజీవి, వెంకటేష్ కామెంట్స్ విన్న ఫ్యాన్స్ సంతోషంతో పండుగ చేసుకుంటున్నారు. కచ్చితంగా ఏదో ఒక రోజు వెంకటేష్, చిరంజీవి కాంబినేషన్‌లో ఓ మల్టీ స్టారర్ మూవీ వస్తుందని ఆశపడుతున్నారు. ఇదిలా ఉంటే సైంధవ్ మూవీని పాన్ ఇండియా స్థాయిలో తెలుగుతోపాటు హిందీ, తమిళం, కన్నడ, మలయాళ భాషల్లో విడుదల చేయనున్నారు.