Chandramukhi 2 Runtime: చంద్రముఖి 2 రన్‍టైమ్ ఇదే.. సెన్సార్ పనులు పూర్తి

Chandramukhi 2 Runtime: రాఘవ లారెన్స్, బాలీవుడ్ స్టార్ కంగనా రనౌత్ ప్రధాన పాత్రల్లో నటించిన చంద్రముఖి 2 సినిమా విడుదలకు సిద్ధమవుతోంది. సెప్టెంబర్ 28వ తేదీన ఈ మూవీ తమిళంతో పాటు తెలుగు, హిందీ, మలయాళం, కన్నడ భాషల్లోనూ రిలీజ్ కానుంది. సెప్టెంబర్ 15న విడుదల కావాల్సిన ఈ మూవీ.. వాయిదా పడింది. వీఎఫ్ఎక్స్ పనుల్లో ఆలస్యంతో 28న థియేటర్లలోకి రానుంది. హర్రర్ కామెడీ డ్రామాగా.. చంద్రముఖి చిత్రానికి సీక్వెల్‍గా చంద్రముఖి 2 చిత్రం వస్తోంది. తాజాగా, ఈ సినిమా సెన్సార్ పనులు పూర్తయ్యాయి.

చంద్రముఖి 2 సినిమాకు యూ/ఏ సర్టిఫికేట్ ఇచ్చింది సెన్సార్ బోర్డు. ఈ మూవీ రన్‍టైమ్ (నిడివి) 2 గంటల 37 నిమిషాలు (157 నిమిషాలు)గా ఉండనుంది. ఈ విషయాన్ని ఈ చిత్రాన్ని నిర్మిస్తున్న లైకా ప్రొడక్షన్స్ నేడు అధికారికంగా వెల్లడించింది. ఈ మేరకు ట్వీట్ చేసింది. అయితే, సెన్సార్ సర్టిఫికేట్‍లో ఈ చిత్రం నిడివి 172 నిమిషాలుగా పేర్కొంది. రాఘవ లారెన్స్‌కు చంద్రముఖి-2 తొలి పాన్ ఇండియా మూవీగా ఉంది. కంగనా రనౌత్ ఈ చిత్రంలో చంద్రముఖిగా నటిస్తుండటంతో.. బాలీవుడ్‍లోనూ ఈ మూవీకి మంచి బజ్ ఉంది.

చంద్రముఖి 2 ట్రైలర్ కూడా ఆకట్టుకుంది. పి.వాసు ఈ చిత్రానికి దర్శకత్వం వహిస్తున్నారు. ఆస్కార్ అవార్డు విజేత మ్యూజిక్ డైరెక్టర్ ఎంఎం కీరవాణి ఈ నినిమాకు సంగీతం అందించారు. 2005లో వచ్చి సంచలన విజయం సాధించిన చంద్రముఖి చిత్రానికి 18ఏళ్ల తర్వాత సీక్వెల్‍గా చంద్రముఖి 2 వస్తోంది. దీంతో ఈ మూవీపై భారీ అంచనాలు ఉన్నాయి.

చంద్రముఖి 2 సినిమాలో వెట్టయాన్ రాజాగా రాఘవ లారెన్స్, చంద్రముఖిగా కంగనా నటించారు. వడివేలు, రాధికా శరత్ కుమార్, లక్ష్మి మీనన్, సుభిక్ష, రావురామేశ్ కీలకపాత్రలు పోషించారు. లైకా ప్రొడక్షన్స్ పతాకంపై సుభాస్కరన్ ఈ చిత్రాన్ని నిర్మించారు. సెప్టెంబర్ 28న ఈ చిత్రం థియేటర్లలో రిలీజ్ కానుంది.