Aamir khan |ట్రెండింగ్ గా మారిన బాయ్‌క‌ట్ లాల్‌సింగ్ చద్ధా హ్యాష్‌ట్యాగ్‌...కాపీ సినిమా చూడొద్దంటూ నెటిజ‌న్లు ట్రోల్‌..

ఆమిర్‌ఖాన్  హీరోగా న‌టించిన లాల్‌సింగ్‌చ‌ద్ధా ట్రైల‌ర్ ఆదివారం ఐపీఎల్ ఫైన‌ల్ మ్యాచ్ సందర్భంగా విడుద‌లైంది. ఎమోష‌న‌ల్ ఫ‌న్ రైడ‌ర్ గా సాగిన ఈ ట్రైల‌ర్ అభిమానుల‌ను ఆక‌ట్టుకుంటోంది. ఇందులో డిఫ‌రెంట్ షేడ్స్ ఉన్న క్యారెక్ట‌ర్‌లో ఆమిర్‌ఖాన్ క‌నిపిస్తున్నారు. అత‌డితో పాటు  టాలీవుడ్ హీరో నాగ‌చైత‌న్య కూడా కొత్త లుక్‌ల‌లో ట్రైల‌ర్‌లో ద‌ర్శ‌న‌మిచ్చారు. 1994లో విడుద‌లైన హాలీవుడ్ క్లాసిక్ చిత్రం ఫారెస్ట్ గంప్ ఆధారంగా ఈ సినిమా తెర‌కెక్కుతోంది. ప‌ది గంట‌ల్లోనే ఈ ట్రైల‌ర్‌కు కోటిన్న‌ర వ్యూస్ వ‌చ్చాయి. ట్రైలర్ కు ప్ర‌శంస‌ల‌తో పాటు విమ‌ర్శ‌ల‌ను కూడా భారీగానే వస్తున్నాయి.

 సోష‌ల్ మీడియా వేదిక‌గా ట్రైల‌ర్‌తో పాటు ఆమిర్‌ఖాన్‌, క‌రీనాక‌పూర్‌ల‌ను నెటిజ‌న్లు ట్రోల్స్ చేస్తున్నారు. బాయ్‌క‌ట్‌లాల్‌సింగ్‌చ‌ద్ధా హ్యాష్‌ట్యాగ్ ట్విట్ట‌ర్‌లో ట్రెండింగ్‌గా మారింది. కాపీ సినిమా చూడ‌టం అన‌వ‌స‌రం అంటూ నెటిజన్లు పేర్కొంటున్నారు. ఆమిర్‌ఖాన్ సినిమాల్ని బ్యాన్ చేయ‌డం బెస్ట్ అని విమ‌ర్శిస్తున్నారు. దేశంలో మ‌త అస‌హ‌నం పెరిగిపోయింద‌ని, ఇండియాలో నివ‌సించాలంటే రోజురోజుకు భ‌యం పెరిగిపోతుందంటూ  2015ఆమిర్‌ఖాన్ చేసిన వ్యాఖ్య‌ల తాలూకు పాత వీడియోల‌ను షేర్ చేస్తున్నారు. దేశాన్ని వ్య‌తిరేకించే హీరోలు సినిమాలు చూడ‌వ‌ద్దంటూ కామెంట్స్ చేస్తున్నారు. 

స‌త్య‌మేవ‌జ‌య‌తే షోతో పాటు పీకే సినిమాలో దేవుళ్ల‌పై సెటైర్లు వేసిన ఆమీర్‌ఖాన్ పాత వీడియోలు వైర‌ల్‌గా మారాయి. దేవుళ్ల‌కు పాలాభిషేకాలు చేసే బ‌దులు ఆక‌లితో అల‌మ‌టించే చిన్నారుల‌కు ఆ పాల‌ను అందిస్తే మంచిదంటూ స‌త్య‌మేవ‌జ‌య‌తేలో ఆమిర్‌ఖాన్ పేర్కొన్నారు. ఆ వీడియోను షేర్ చేసిన నెటిజ‌న్లు లాల్‌సింగ్‌చ‌ద్ధాకు 200 పెట్టి టికెట్ కొన‌డం కంటే వాటిని సామాజిక సేవ‌కు ఉప‌యోగించ‌డం మంచిదంటూ కౌంట‌ర్ ఇస్తున్నారు. 

అలాగే బాలీవుడ్‌లోని నెపోటిజంపై క‌రీనాక‌పూర్ గ‌తంలో ఆస‌క్తిక‌ర వ్యాఖ్య‌లు చేసింది. వార‌సుల సినిమాలు చూడొద్దంటూ ఆమె పేర్కొన్న‌ది. ఆ వీడియో కూడా ఇప్పుడు వైర‌ల్‌గా మారింది. క‌రీనా కూడా వార‌స‌త్వంతోనే ఇండ‌స్ట్రీలో అడుగుపెట్టింది కాబ‌ట్టి ఆమె సినిమా కూడా చూడొద్దంటూ కామెంట్స్ చేస్తున్నారు. లాల్ సింగ్ చద్ధా చిత్రానికి అద్వైత్ చంద‌న్ ద‌ర్శ‌క‌త్వం వ‌హించారు. క‌రీనాక‌పూర్ క‌థానాయిక‌గా న‌టించింది. ఆగ‌స్ట్ 11న ఈ సినిమా విడుద‌ల‌కానుంది.