Bigg Boss Sivaji: విల‌న్ రోల్స్ కోసం ఎదురుచూస్తున్నా - సినిమాల్లోకి రీఎంట్రీపై శివాజీ కామెంట్స్ వైర‌ల్‌

Bigg Boss Sivaji: బిగ్‌బాస్ తెలుగు సీజ‌న్ 7లో టైటిల్ ఫేవరేట్ల‌లో ఒక‌రిగా హౌజ్‌లోకి అడుగుపెట్టాడు శివాజీ. చివ‌రి వ‌ర‌కు అత‌డే విన్న‌ర్ అవుతాడ‌ని నెటిజ‌న్ల‌తో పాటు బిగ్‌బాస్ అభిమానులు భావించారు. కానీ అనూహ్యంగా శివాజీ థ‌ర్డ్ ప్లేస్‌తో బిగ్‌బాస్ నుంచి ఎలిమినేట్ అయ్యాడు. ఫైన‌ల్ రోజు శివాజీ ఎలిమినేష‌న్‌ను నాగార్జున ప్ర‌క‌టించ‌గానే అత‌డి కొడుకు రిక్కీ స్టేజ్‌పైనే క‌న్నీళ్లు పెట్టుకున్నాడు. కొడుకును శివాజీ ఓదార్చాడు.ఫైన‌ల్ ఎపిసోడ్‌కు తండ్రీకొడుకు బాండింగ్ హైలైట్‌గా నిలిచింది.

ప్రేక్ష‌కుల మ‌న‌సులు గెలుచుకున్నా...

త‌న కొడుకు రిక్కీ ఎమోష‌న‌ల్ కావ‌డంపై శివాజీ ఇంట్రెస్టింగ్ కామెంట్స్ చేశాడు. తండ్రి ఓడిపోవ‌డం ఏ కొడుకుకు న‌చ్చ‌ద‌ని శివాజీ అన్నాడు. తాను థ‌ర్డ్ ప్లేస్‌లో రావ‌డాన్ని రిక్కీ జీర్ణించుకోలేక‌పోయాడ‌ని, అందుకే స్టేజ్‌పైనే క‌న్నీళ్లు పెట్టుకున్నాడ‌ని శివాజీ అన్నాడు. విన్నింగ్‌, లాస్ కంటే ప్రేక్ష‌కుల మ‌న‌సుల్ని గెల‌చుకోవ‌డం ఆనందంగా అనిపించింద‌ని శివాజీ అన్నాడు.

బిగ్‌బాస్ లాట‌రీ లాంటిది...

బిగ్‌బాస్ విన్న‌ర్ కావ‌డం అంటే లాట‌రీలో గెల‌వ‌డం లాంటిద‌ని శివాజీ చెప్పాడు. ఫైన‌ల్‌కు చేరిన అంద‌రూ విన్న‌ర్స్ గానే తాను భావిస్తున్న‌ట్లు శివాజీ పేర్కొన్నాడు. ప్రేక్ష‌కులు ప్ర‌శాంత్‌ను విన్న‌ర్‌ను చేయాల‌ని అనుకున్నారు. అదే చేశార‌ని తెలిపాడు. మూడో ప్లేస్ నుంచి తాను ఎలిమినేట్ కావ‌డంతో మా అబ్బాయి రిక్కీ ఎమోష‌న్స్ కంట్రోల్ చేసుకోలేక స్టేజ్‌పైనే క‌న్నీళ్లు పెట్టుకున్నాడు. ఆ బాధ‌ను బిగ్‌బాస్ స్టేజ్‌పైనే మ‌ర్చిపోయాడ‌ని,ఆ ఆ త‌ర్వాత నార్మ‌ల్‌గా మారిపోయాడ‌ని శివాజీ అన్నాడు. బిగ్‌బాస్ తెలుగు సీజ‌న్ 7 టైటిల్‌ను ప‌ల్ల‌వి ప్ర‌శాంత్ గెలుచుకున్నాడు. అమ‌ర్‌దీప్ చౌద‌రి సెకండ్ ప్లేస్‌లో నిలిచాడు. శివాజీ స‌పోర్ట్‌తోనే ప‌ల్ల‌వి ప్ర‌శాంత్ టైటిల్ విన్న‌ర్‌గా నిలిచాడు.

రీఎంట్రీకి రెడీ...

సినిమాల్లోకి రీఎంట్రీ ఇవ్వ‌డానికి తాను సిద్ధంగా ఉన్నాన‌ని శివాజీ అన్నాడు. ఆ రోజు తొంద‌ర‌లోనే వ‌స్తుంద‌ని చెప్పాడు. హీరోగానే న‌టించాల‌నే నియ‌మం ఏది పెట్టుకోలేద‌ని తెలిపాడు. మంచి క్యారెక్ట‌ర్ దొరికితే విల‌న్‌గా న‌టించ‌డానికి సిద్ధంగా ఉన్నాన‌ని చెప్పాడు. డిఫ‌రెంట్‌ క్యారెక్ట‌ర్స్ కోసం తాను ఎదురుచూస్తున్న‌ట్లు తెలిపాడు.

మిడిల్ క్లాస్ బ‌యోపిక్‌...

బిగ్‌బాస్ నుంచి బ‌య‌ట‌కు వ‌చ్చిన శివాజీ నైంటీస్ మిడిల్ క్లాస్ బ‌యోపిక్‌ పేరుతో ఓ వెబ్ సిరీస్ చేస్తున్నాడు. ఈ సిరీస్‌తోనే లాంగ్ గ్యాప్ త‌ర్వాత యాక్టింగ్‌లోకి రీఎంట్రీ ఇస్తున్నాడు. ఈ సిరీస్‌లో చంద్ర‌శేఖ‌ర్ అనే మ్యాథ్స్ టీచ‌ర్ పాత్ర‌లో శివాజీ క‌నిపించ‌బోతున్నాడు. అత‌డి వైఫ్ పాత్ర‌లో తొలి ప్రేమ ఫేమ్ వాసుకి క‌నిపిస్తోంది. ఫ్యామిలీ ఎమోష‌న్స్ కామెడీ క‌ల‌బోత‌గా తెర‌కెక్కుతోన్న ఈ సిరీస్‌కు ఆదిత్య హ‌స‌న్ ద‌ర్శ‌క‌త్వం వ‌హిస్తున్నాడు. నైంటీస్ మిడిల్ క్లాస్ బ‌యోపిక్ సిరీస్ ఈటీవీ విన్ ఓటీటీలో జ‌న‌వ‌రి 5 నుంచి స్ట్రీమింగ్ కాబోతోంది.

మాస్ట‌ర్‌తో...

చిరంజీవి మాస్ట‌ర్ సినిమాతో యాక్ట‌ర్‌గా త‌న కెరీర్‌ను మొద‌లుపెట్టాడు శివాజీ. ఆ త‌ర్వాత హీరోగా మారిన అత‌డు మిస్స‌మ్మ‌, అమ్మాయి బాగుంది, మంత్ర‌తో క‌మ‌ర్షియ‌ల్ స‌క్సెస్‌ల‌ను అందుకున్నాడు. ప‌రాజ‌యాల కార‌ణంగా 2016 త‌ర్వాత న‌ట‌న‌కు దూర‌మైన శివాజీ చాలా రోజుల త‌ర్వాత బిగ్‌బాస్‌తో మ‌ళ్లీ తెలుగు ప్రేక్ష‌క‌లు ముందుకొచ్చాడు.