Bigg Boss Shivaji Web Series: వెబ్‌సిరీస్‌తో యాక్ట‌ర్‌గా బిగ్‌బాస్‌ శివాజీ రీఎంట్రీ - ఫ‌స్ట్ లుక్ రిలీజ్‌

Bigg Boss Shivaji Web Series: లాంగ్ గ్యాప్ త‌ర్వాత బిగ్‌బాస్ షో ద్వారా తెలుగు ప్రేక్ష‌కుల ముందుకొచ్చాడు హీరో శివాజీ. బిగ్‌బాస్ తెలుగు సీజ‌న్ 7 లో స్ట్రాంగ్ కంటెస్టెంట్‌ల‌లో ఒక‌రిగా కొన‌సాగుతోన్నాడు. తొలిరోజు నుంచే స్ట్రాట‌జిక్‌గా గేమ్ ఆడుతూ బిగ్‌బాస్ ఫ్యాన్స్‌ను మెప్పిస్తోన్నాడు. తాజాగా న‌టుడిగా శివాజీ రీఎంట్రీ ఇవ్వ‌బోతున్నాడు. నైంటీస్ అనే వెబ్‌సిరీస్‌తో ఏడేళ్ల త‌ర్వాత మ‌ళ్లీ తెలుగు ఆడియెన్స్ ముందుకు రాబోతున్నాడు.

ఈ సిరీస్‌లో చంద్ర‌శేఖ‌ర్ అనే పాత్ర‌లో శివాజీ క‌నిపించ‌బోతున్నాడు. అత‌డి ఫ‌స్ట్ లుక్ పోస్ట‌ర్ రిలీజైంది. ఈ సిరీస్‌లో శివాజీ మ్యాథ్స్ టీచ‌ర్ పాత్ర‌లో క‌నిపించ‌బోతున్న‌ట్లు ఈ పోస్ట‌ర్‌లో చూపించారు. వ‌న‌ప‌ర్తి అనే ఊరి బ్యాక్‌డ్రాప్‌లో పీరియాడిక‌ల్ డ్రామా క‌థాంశంతో తెర‌కెక్కుతోన్న ఈ సిరీస్‌కు ఆదిత్య హ‌స‌న్ ద‌ర్శ‌క‌త్వం వ‌హిస్తున్నాడు.

నైంటీస్ సిరీస్ టైటిల్‌ కింద ఉన్న ఏ మిడిల్ క్లాస్ బ‌యోపిక్ అనే క్యాప్ష‌న్ ఆస‌క్తిని పంచుతోంది. ఈ సిరీస్‌కు సురేష్ బొబ్బిలి సంగీతాన్ని అందిస్తోన్నాడు. త్వ‌ర‌లో ఈటీవీ విన్ ఓటీటీలో ఈ వెబ్‌సిరీస్ స్ట్రీమింగ్ కానుంది. తెలుగులో క్యారెక్ట‌ర్ ఆర్టిస్ట్‌గా కెరీర్‌ను మొద‌లుపెట్టిన శివాజీ ఆ త‌ర్వాత హీరోగా మారాడు.

మిస్స‌మ్మ‌, మంత్ర‌, అమ్మాయిబాగుందితో పాటు మ‌రికొన్ని సినిమాల‌తో క‌మ‌ర్షియ‌ల్ స‌క్సెస్‌ల‌ను అందుకున్నాడు. 2016లో రిలీజైన సీసా త‌ర్వాత టాలీవుడ్‌కు దూర‌మ‌య్యాడు శివాజీ. ప‌రాజ‌యాల కార‌ణంగా అత‌డి కెరీర్‌కు బ్రేక్ ప‌డింది.