Bholaa Shankar Day 2 Collections: భోళా శంకర్ కలెక్షన్లలో రెండో రోజు భారీ డ్రాప్!

Bholaa Shankar Day 2 Collections: భోళా శంకర్ సినిమాకు బాక్సాఫీస్ వద్ద ఎదురుగాలి వీస్తోంది. శుక్రవారం (ఆగస్టు 11) రిలీజైన ఈ చిత్రానికి తొలి రోజుతో పోలిస్తే రెండో రోజు కలెక్షన్లు భారీగా పడిపోయినట్టు లెక్కలు వెల్లడవుతున్నాయి. మెగాస్టార్ చిరంజీవి హీరోగా నటించిన భోళాశంకర్ సినిమాకు మెహర్ రమేశ్ దర్శకత్వం వహించారు. తొలి షో నుంచే ఈ సినిమాకు మిక్స్డ్ టాక్ వచ్చింది. అది కాస్త నెగెటివ్‍గా మారింది. దీంతో ఈ ప్రభావం రెండో రోజు కలెక్షన్లపై భారీగానే పడింది.

భోళా శంకర్ సినిమా తొలి రోజు (ఆగస్టు 11) తెలుగు రాష్ట్రాల్లో సుమారు రూ.20కోట్ల మేర గ్రాస్ కలెక్షన్లను సాధించిందని లెక్కలు వెల్లడయ్యాయి. అయితే, ప్రపంచవ్యాప్తంగా ఈ చిత్రం ఫస్ట్ డే రూ.33కోట్లు సాధించిందని చిత్రయూనిట్ ప్రకటించింది. కాగా, రెండో రోజు (ఆగస్టు 12) భోళా శంకర్ సినిమా కలెక్షన్లు తెలుగు రాష్ట్రాల్లో భారీగా పడిపోయినట్టు ట్రేడ్ నిపుణులు లెక్కలు వెల్లడించారు. ఈ చిత్రం తెలుగు రాష్ట్రాల్లో రెండో రోజు కేవలం సుమారు రూ.7కోట్లను మాత్రమే వసూలు చేసిందని తెలుస్తోంది. అంటే తొలి రోజుతో పోలిస్తే 50శాతానికిపైగా కలెక్షన్లలో డ్రాప్ కనిపించింది. రెండో రోజు వరల్డ్ వైడ్ కలెక్షన్ల లెక్కలు రావాల్సి ఉంది.

ఖైదీ-150 మూవీతో చిరంజీవి రీఎంట్రీ ఇచ్చాక ఓ మూవీకి రెండో రోజు ఇంత తక్కువ కలెక్షన్లు రావడం ఇదే తొలిసారి. మరోవైపు వీకెండ్స్ అయిన శనివారం, ఆదివారం కూడా భోళా శంకర్ చిత్రానికి ఆక్యుపెన్సీ (నిండిన సీట్లు) బాగా తగ్గింది. ఆదివారం ఆక్యుపెన్సీ సుమారు 40శాతంగా ఉన్నట్టు ట్రెండ్స్ చూస్తే అర్థమవుతోంది. దీంతో మూడో రోజు కలెక్షన్లలోనూ డ్రాప్ ఉంటుందని అంచనాలు వేస్తున్నారు. మరోవైపు, రజినీకాంత్ హీరోగా నటించిన జైలర్ సినిమా తెలుగు రాష్ట్రాల్లోనూ దుమ్మురేపుతోంది. ఈ ప్రభావం కూడా భోళా శంకర్ చిత్రంపై ఉంటోంది.

భోళా శంకర్ సినిమాలో తమన్నా భాటియా హీరోయిన్‍గా నటించగా.. చిరంజీవి చెల్లెలి పాత్రలో చేశారు కీర్తి సురేశ్. తమిళ మూవీ వేదాళంకు రీమేక్‍గా ఈ చిత్రం తెరకెక్కింది. అయినా, భోళాశంకర్‌ను ఆసక్తికరంగా రూపొందించటంలో దర్శకుడు మెహర్ రమేశ్ తీవ్రంగా విఫలమయ్యారనే విమర్శలు వస్తున్నాయి. మహతీ స్వరసాగర్ ఈ చిత్రానికి సంగీతం అందించారు. ఏకే ఎంటర్‌టైన్మెంట్ పతాకంపై రాంబ్రహ్మం సుంకర ఈ చిత్రాన్ని నిర్మించగా.. అనిల్ సుంకర సమర్పకులుగా ఉన్నారు.