Ajith Movies Remake in Telugu: అప్పుడు ప‌వ‌ర్ స్టార్‌- ఇప్పుడు మెగాస్టార్ - ఇద్ద‌రూ అజిత్ బాధితులే!

Ajith Movies Remake in Telugu: మెగా హీరోల‌కు అజిత్ మూవీస్ అస‌లు అచ్చిరాలేదు. అజిత్ హీరోగా న‌టించిన వేదాళం సినిమాను భోళాశంక‌ర్ పేరుతో చిరంజీవి రీమేక్ చేశాడు. గ‌త శుక్ర‌వారం ప్రేక్ష‌కుల ముందుకొచ్చిన ఈ సినిమా డిజాస్ట‌ర్ టాక్‌ను తెచ్చుకున్న‌ది. క‌థ‌, క‌థ‌నాల‌తో పాటు జ‌బ‌ర్ధ‌స్థ్ బ్యాచ్ తో చిరంజీవి చేసిన కామెడీ సీన్స్‌పై పెద్ద ఎత్తున ట్రోల్స్, మీమ్స్ వ‌స్తోన్నాయి.

చిరంజీవి సెకండ్ ఇన్నింగ్స్‌లో అతి పెద్ద డిజాస్ట‌ర్‌గా భోళాశంక‌ర్ నిలిచే అవ‌కాశం ఉన్న‌ట్లు ట్రేడ్ వ‌ర్గాలు అంచ‌నా వేస్తోన్నాయి. తొలిరోజు 20 కోట్ల కు పైగా వ‌సూళ్ల‌ను రాబ‌ట్టిన ఈ సినిమా రెండురోజు ఏడు కోట్ల లోపే క‌లెక్ష‌న్స్ రాబ‌ట్టింది. ఆదివారం రోజు వ‌సూళ్లు మ‌రింత త‌గ్గే అవ‌కాశం ఉన్న‌ట్లు చెబుతోన్నారు. అజిత్ సినిమాల్ని మెగా హీరోలు రీమేక్ చేయ‌డం ఇదే తొలిసారి కాదు.

గ‌తంలో అజిత్ కెరీర్‌లోనే బిగ్గెస్ట్ హిట్‌ల‌లో ఒక‌టిగా నిలిచిన వీర‌మ్ సినిమాను ప‌వ‌న్ క‌ళ్యాణ్ కాట‌మ‌రాయుడు పేరుతో రీమేక్ చేశారు. 2017లో రిలీజైన ఈ మూవీ ప‌వ‌న్‌కు షాకిచ్చింది. కిషోర్ కుమార్ పార్థ‌సాని (డాలీ) ద‌ర్శ‌క‌త్వంలో భారీ అంచ‌నాల‌తో రిలీజైన సినిమా ప్రేక్ష‌కుల్ని మెప్పించ‌లేక బాక్సాఫీస్ వ‌ద్ద చ‌తికిలా ప‌డింది. ప‌వ‌న్ యాక్టింగ్ స్టైల్స్‌, యాక్టింగ్ మిన‌హా ఈ సినిమా క‌థ విష‌యంలో అప్ప‌ట్లో చాలా విమ‌ర్శ‌లొచ్చాయి.

చిరంజీవి, ప‌వ‌న్ క‌ళ్యాణ్‌కు మాత్ర‌మే కాకుండా రాజ‌శేఖ‌ర్ కూడా గ‌తంలో అజిత్ హీరోగా న‌టించిన విల‌న్ సినిమాను అదే పేరుతో తెలుగులో రీమేక్ చేశాడు. ఈ సినిమా కూడా రాజ‌శేఖ‌ర్‌కు చేదు ఫ‌లితాన్నే మిగిల్చింది. అలా మెగా హీరోల‌తో పాటు రాజ‌శేఖ‌ర్ కూడా అజిత్ బాధితులుగా మిగిలిపోయారు.