Bhamakalapam 2 OTT: ప్రియమణి ‘భామాకలాపం 2’ ఓటీటీ మూవీ టీజర్ డేట్ ఇదే

Bhamakalapam 2 OTT: భామాకలాపం సినిమా 2022లో నేరుగా ఆహా ఓటీటీ ప్లాట్‍ఫామ్‍లోకి వచ్చి బాగా పాపులర్ అయింది. ఈ కామెడీ క్రైమ్ థ్రిల్లర్ చిత్రంలో సీనియర్ హీరోయిన్ ప్రియమణి ప్రధాన పాత్ర పోషించారు. ఆహాలో భామాకలాపం మంచి క్రేజ్ తెచ్చుకుంది. దీంతో ఈ సినిమాకు సీక్వెల్‍ను కూడా ఆహా ఓటీటీ ప్లాట్‍ఫామ్ తీసుకొస్తోంది. ఇటీవల ‘భామాకలాపం 2’ గ్లింప్స్ వచ్చింది. ఇది ఈ మూవీపై ఆసక్తిని మరింత పెంచింది. కాగా, భామాకలాపం 2 టీజర్ రిలీజ్ డేట్‍ను ఆహా తాజాగా ప్రకటించింది.

భామాకలాపం 2 మూవీ టీజర్ జనవరి 30వ తేదీన రిలీజ్ కానుంది. ఈ విషయాన్ని ఆహా ఓటీటీ ప్లాట్‍ఫామ్ నేడు (జనవరి 28) అధికారికంగా ప్రకటించింది. “ఈసారి మా అనుపమ (ప్రియమణి) వెజిటబుల్స్‌తో పాటు బుల్లెట్లు కూడా లోడ్ చేసింది. భామాకలాపం 2 టీజర్ జనవరి 30న రిలీజ్ కానుంది” అని ఆహా ట్వీట్ చేసింది. ప్రియమణి ఓ చేతిలో కూరగాయల బుట్టు.. మరో చేత్తో గన్ పట్టుకున్న పోస్టర్ పోస్ట్ చేసింది.

అయితే, భామాకలాపం 2 మూవీ స్ట్రీమింగ్ డేట్‍ను ఆహా ఇంకా వెల్లడించలేదు. సర్వింగ్ సూన్ అంటూ త్వరలో అని పేర్కొంది. అయితే, టీజర్‌తో పాటే స్ట్రీమింగ్ తేదీని ప్రకటించే అవకాశాలు ఉన్నాయి. డేంజరస్ హౌజ్‍వైఫ్ అంటూ వస్తున్న ఈ చిత్రంపై మంచి అంచనాలు ఉన్నాయి.

భామాకలాపం 2 మూవీకి అభిమన్యు తాడిమేటి దర్శకత్వం వహిస్తున్నారు. బాపినీడు బీ, సుధీర్ ఈదర ఈ చిత్రాన్ని నిర్మిస్తున్నారు. ప్రశాంత్ ఆర్ విహారీ సంగీతం అందిస్తున్నారు. రుచికరమైన దొంగతనం ఫీస్ట్ అనే ట్యాగ్‍లైన్‍తో భామాకలాపం 2 వస్తోంది. ఈ చిత్రంలో ప్రియమణితో పాటు శరణ్య ప్రదీప్ కూడా ప్రధాన పాత్ర పోషిస్తున్నారు.

భామాకలాపం 2 గ్లింప్స్ ఇటీవలే వచ్చింది. అనుపమ (ప్రియమణి), శిల్ప (శరణ్య) కలిసి ఓ దొంగతనానికి ప్లాన్ చేస్తారన్నట్టుగా గ్లింప్స్‌లో ఉంది. “పని మనిషి నుంచి ప్రమోషన్ ఇచ్చి పార్ట్ నర్ చేస్తానంటే హోటల్‍లో అనుకున్నా అక్కా.. ఇలాంటి బంపర్ ఆఫర్ ఇస్తావనుకోలేదు” అని శరణ్య చెప్పే డైలాగ్‍తో గ్లింప్స్ మొదలైంది. తనకు భయమేస్తుందని ప్రియమణి చెబుతుంది. అయితే, చెరో పాతిక లక్షలంటే రూ.50లక్షలని, ఎన్ని ఇడ్లీలు అమ్మితే ఇంత సంపాదిస్తామంటూ శరణ్య చెబుతుంది. “అంత అమాయకంగా నటించకు అక్కా.. ఇదంతా మొదలుపెట్టిందే నువ్వు” అంటూ శరణ్య చెబుతుంది. భామాకలాపంలో ప్రియమణి చేసిన పనులను గుర్తు చేస్తుంది. ఆ తర్వాత ముఖానికి ముసుగు వేసుకొని ఇద్దరూ దోపిడీకి బయలుదేరుతారు. ఇలా.. గ్లింప్స్ ఉంది.

గ్లింప్స్ ఇంట్రెస్టింగ్‍గా ఉండటంతో భామాకలాపం 2 అప్‍డేట్‍ల కోసం ప్రేక్షకులు ఎదురుచూస్తున్నారు. ఈ తరుణంలో జనవరి 30న టీజర్ తీసుకొస్తున్నట్టు ఆహా ప్రకటించింది.

భామాకలాపం ఫస్ట్ మూవీలో అనుపమ (ప్రియమణి) యూట్యూబ్‍లో వంటలు చేస్తూ ఫేమస్‍గా ఉంటుంది. ఆ తర్వాత ఓ హత్య కేసులో అనుకోకుండా చిక్కుకుంటుంది. గ్యాంగ్‍స్టర్స్ వెంటబడతారు. ఈ మిస్టరీ ఏంటనేదే ఆ మూవీలో ఉంది. ఇప్పుడు రానున్న ‘భామాకలాపం 2’ సినిమా దొంగతనం బ్యాక్‍డ్రాప్‍లో ఉండనుంది. ఈ సీక్వెల్‍లో 'అనుపమ ఘుమఘుమ' అనే హోటల్ నిర్వహిస్తుంటుంది అనుపమ.