Baby: 'బేబి' దర్శకుడికి బంపర్ గిఫ్ట్.. లగ్జరీ కారును ఇచ్చిన నిర్మాత: ఈ కారు ధర ఎంతంటే!

Baby: ఆనంద్ దేవరకొండ, వైష్ణవి చైతన్య, విరాజ్ అశ్విన్ ప్రధాన పాత్రల్లో నటించిన ట్రయాంగిల్ లవ్ మూవీ ‘బేబి’ ఈ ఏడాది సెన్సేషనల్ హిట్ కొట్టింది. జూలైలో చిన్న చిత్రంగా థియేటర్లలోకి వచ్చి భారీ విజయాన్ని సాధించింది. మెగాస్టార్ చిరంజీవి, ఐకాన్ స్టార్ అల్లు అర్జున్ సహా చాలా మంది హీరోలు, సినీ నటులు, ప్రముఖులు బేబి సినిమాను ప్రశంసించారు. హార్డ్ హిట్టింగ్ ఎమోషనల్ లవ్ స్టోరీగా 'బేబి' సినిమాను తెరకెక్కించిన దర్శకుడు సాయి రాజేశ్‍ను అభినందించారు. కల్ట్ బ్లాక్‍బాస్టర్ పేరుతో బేబి మూవీ యూనిట్ సంబరాలు కూడా చేసుకుంది.

బేబి సినిమా సుమారు రూ.95కోట్లకు పైగా గ్రాస్ కలెక్షన్లను రాబట్టింది. సుమారు రూ.8కోట్ల బడ్జెట్‍తో రూపొందిన ఈ చిత్రం బాక్సాఫీస్ వద్ద సంచలన విజయం సాధించింది. ఈ బంపర్ హిట్‍ నేపథ్యంలో బేబి సినిమా నిర్మాత శ్రీనివాస కుమార్ (SKN).. దర్శకుడు సాయి రాజేశ్‍కు ఇప్పుడు ఓ విలువైన బహుమతి ఇచ్చారు. మెర్సెడెస్ బెంజ్ కారును గిఫ్ట్‌గా ఇచ్చారు. మెర్సెడెస్ బెంజ్ ఏ200 లగ్జరీ కారును సాయి రాజేశ్‍కు ఎస్‍కేఎన్ అందించారని తెలుస్తోంది.

మెర్సెడెస్ బెంజ్ ఏ200 కారు ఎక్స్-షోరూమ్ ధర సుమారు రూ.45.80లక్షలుగా ఉంది. ఈ మోడల్ వైట్ కలర్ వేరియంట్‍ను సాయి రాజేశ్ అందుకున్నారు. ఈ లగ్జరీ కారు కీని రాజేశ్‍కు ఎస్‍కేఎన్ అందించారు. అందుకు సంబంధించిన వీడియో సోషల్ మీడియాలో బయటికి వచ్చింది.

మొత్తంగా బేబి సినిమాతో కల్ట్ బ్లాక్‍బాస్టర్‌ను అందించిన దర్శకుడు సాయి రాజేశ్‍కు నిర్మాత ఎస్‍కేఎన్ భారీ బహుమతినే ఇచ్చారు. షో రూమ్‍కు తీసుకెళ్లి మరీ కారును ఇచ్చారు.

కాగా, తదుపరి సినిమాను కూడా సాయి రాజేశ్.. ఎస్‍కేఎన్ నిర్మాణంలోనే చేస్తారని టాక్ వినిపిస్తోంది. సినీ ఇండస్ట్రీకి రాకముందే ఎస్‍కేఎన్, సాయి రాజేశ్ స్నేహితులుగా ఉన్నారు.

బేబి సినిమా ఈ ఏడాది జూలై 14న థియేటర్లలో రిలీజ్ అయింది. సుమారు రూ.95కోట్ల వరకు కలెక్షన్లను సాధించింది. ఆ తర్వాత ఆహా ఓటీటీ ప్లాట్‍ఫామ్‍లో స్ట్రీమింగ్‍కు అడుగుపెట్టింది. ఓటీటీ రికార్డులను కూడా బేబి సినిమా బద్దలుకొట్టింది. డిజిటల్ స్ట్రీమింగ్‍లోనూ భారీ ఆదరణ దక్కించుకుంది.