Prabhas | ప్ర‌భాస్ హాలీవుడ్ అరంగేట్రం.. సోష‌ల్ మీడియా వార్తల్లో నిజమెంత?

‘బాహుబ‌లి’ సినిమాతో పాన్ ఇండియ‌న్ స్టార్ గా మారిపోయారు ప్ర‌భాస్. ఎస్‌.ఎస్‌. రాజ‌మౌళి ద‌ర్శ‌క‌త్వంలో రూపొందిన ఈ విజువల్ వండర్ ఇండియ‌న్ సినిమా హిస్ట‌రీలోనే అత్య‌ధిక వ‌సూళ్ల‌ను సాధించిన చిత్రాల్లో ఒక‌టిగా నిలిచింది. తెలుగు సినిమా ఖ్యాతిని ప్ర‌పంచ‌స్థాయిలో చాటిచెప్పింది. విదేశాల్లో ప్ర‌భాస్‌కు భారీగా ఫ్యాన్ ఫాలోయింగ్ ను సంపాదించిపెట్టింది. ‘బాహుబ‌లి’ త‌ర్వాత ప్ర‌భాస్ తో సినిమా చేసేందుకు దేశంలోని అగ్ర ద‌ర్శ‌కులంద‌రూ ఆస‌క్తిని చూపుతున్నారు.

తాజాగా  ప్రభాస్ హాలీవుడ్‌లో అరంగేట్రం చేయ‌బోతున్న‌ట్లు వార్త‌లొస్తున్నాయి. అగ్ర నిర్మాణ సంస్థ యూనివ‌ర్స‌ల్ స్టూడియోస్ ద్వారా ప్ర‌భాస్ హాలీవుడ్  అడుగుపెట్ట‌నున్న‌ట్లు సోష‌ల్ మీడియాలో ప్ర‌చారం జ‌రుగుతోంది. సూప‌ర్ హీరో చిత్రాల‌తో యూనివ‌ర్స‌ల్ స్టూడియో భారీ విజ‌యాల్ని అందుకున్న‌ది. ఆ బాట‌లోనే ప్ర‌భాస్‌తో సూప‌ర్ హీరో క‌థాంశంతో ఓ సినిమాను తెరకెక్కించేందుకు ప్లాన్ చేస్తున్నట్లు వార్తలు వినిపిస్తున్నాయి.  

ఈ చిత్రానికి సంబంధించిన చ‌ర్చ‌లు జ‌రుగుతున్న‌ట్లు తెలిసింది. ప్ర‌భాస్ హాలీవుడ్ అరంగేట్రం వార్త‌ల్లో నిజ‌మెంతా అన్న‌ది ప్ర‌స్తుతం చ‌ర్చ‌నీయాంశంగా మారింది. త్వ‌ర‌లో దీనిపై ఓ క్లారిటీ రానున్న‌ట్లు చెబుతున్నారు. 

 ప్ర‌స్తుతం ప్ర‌శాంత్ నీల్ ద‌ర్శ‌క‌త్వంలో ‘స‌లార్‘ సినిమా చేస్తున్నారు ప్ర‌భాస్‌. దీనితో పాటు నాగ్ అశ్విన్‌తో చేయ‌నున్న‘ ప్రాజెక్ట్‌-కే’ షూటింగ్ జ‌రుగుతోంది. ప్ర‌భాస్ బాలీవుడ్‌లో అరంగేట్రం చేస్తున్న మైథ‌లాజిక‌ల్ చిత్రం ‘ఆదిపురుష్’ టాకీపార్ట్ పూర్త‌యింది. వ‌చ్చే ఏడాది ఈ సినిమా ప్రేక్ష‌కుల ముందుకు రాబోతున్న‌ది.