War 2 Update: ఎన్టీఆర్ - హృతిక్ రోషన్ ‘వార్ 2’ మూవీపై లేటెస్ట్ అప్‍డేట్.. కీలక మీటింగ్

War 2 Update: టాలీవుడ్ యంగ్ టైగర్ జూనియర్ ఎన్టీఆర్, బాలీవుడ్ స్టార్ హీరో హృతిక్ రోషన్ కాంబినేషన్‍లో ‘వార్ 2’ సినిమా రూపొందనుంది. ఈ మూవీ అనౌన్స్‌మెంట్ వచ్చినప్పటి నుంచి ఫుల్ బజ్ నెలకొంది. ఈ క్రేజీ ప్రాజెక్ట్ అప్‍డేట్ల కోసం అందరూ ఎదురుచూస్తున్నారు. ఎన్టీఆర్ ప్రస్తుతం దేవర మూవీ షూటింగ్‍లో బిజీగా ఉన్నారు. ఈ తరుణంలో.. వార్ 2 చిత్రానికి దర్శకత్వం వహిస్తున్న అయాన్ ముఖర్జీ నేడు ఎన్టీఆర్‌ను కలిశారు. ఆ వివరాలివే..

జూనియర్ ఎన్టీఆర్‌ను హైదరాబాద్‍లో నేడు కలిశారు దర్శకుడు అయాన్ ముఖర్జీ. వార్ 2 సినిమా ప్రీ ప్రొడక్షన్ పనుల గురించి తారక్‍తో చర్చించారు. ఎంత వరకు పూర్తయ్యాయో వివరించారు. వార్ 2 షూటింగ్ ప్రారంభం గురించి కూడా ఇద్దరి మధ్య కీలక చర్చ జరిగిందని తెలుస్తోంది.

ప్రీ ప్రొడక్షన్ పనులు పూర్తయ్యాక.. వార్ 2 సినిమా షూటింగ్ ఈ ఏడాది నవంబర్‌లోనే మొదలయ్యే అవకాశాలు ఉన్నాయి. అయితే, ఎన్టీఆర్ ప్రస్తుతం దేవర చిత్రం చేస్తున్నారు. ఈ మూవీ చిత్రీకరణ వచ్చే ఏడాది జనవరి వరకు ఉంటుందని అంచనాలు ఉన్నాయి. దీంతో, దేవర పూర్తయ్యాకే వార్ 2 షూటింగ్‍లో ఎన్టీఆర్ పాల్గొనే అవకాశాలు ఉన్నట్టు టాక్.

హృతిక్ రోషన్, టైగర్ ష్రాఫ్ నటించిన వార్ చిత్రానికి సీక్వెల్‍గా వార్ 2 మూవీ రూపొందుతోంది. ఈ చిత్రంలో ఎన్టీఆర్ నెగెటివ్ రోల్ చేస్తారని వినిపిస్తోంది. అయితే, ఈ విషయంపై ఇంకా క్లారిటీ రాలేదు. కాగా, వార్ 2 సినిమాను 2025 జనవరి 24న రిలీజ్ చేయాలని మేకర్స్ ఆలోస్తున్నారు. యశ్ రాజ్ ఫిల్మ్స్ ఈ సినిమాను నిర్మిస్తోంది.

కాగా, వార్ చిత్రం రిలీజై నేటికి సరిగ్గా నాలుగేళ్లయింది. 2019 అక్టోబర్ 2న వార్ సినిమా విడుదలైంది. హృతిక్, ష్రాఫ్ నటించిన ఈ చిత్రం బాక్సాఫీస్ వద్ద భారీ విజయం సాధించింది. రూ.150 కోట్ల బడ్జెట్‍తో తెరకెక్కిన వార్ మూవీ.. సుమారు రూ.475 కోట్ల కలెక్షన్లను సాధించి బ్లాక్‍బాస్టర్ అయింది.

దేవర గురించి..

కొరటాల శివ దర్శకత్వంలో ప్రస్తుతం దేవర సినిమా చేస్తున్నారు ఎన్టీఆర్. ఆర్ఆర్ఆర్ గ్లోబల్ హిట్ అయ్యాక ఎన్టీఆర్ చేస్తున్న సినిమా కావటంతో భారీ అంచనాలు ఉన్నాయి. దేవర చిత్రంలో జాన్వీ కపూర్ హీరోయిన్‍గా నటిస్తున్నారు. అలాగే బాలీవుడ్ స్టార్ యాక్టర్ సైఫ్ అలీఖాన్ విలన్ పాత్ర పోషిస్తున్నారు. దేవర మూవీలో అండర్ వాటర్ ఫైట్స్ అబ్బుర పరుస్తాయని తెలుస్తోంది. ఈ సినిమా వచ్చే ఏడాది ఏప్రిల్ 4వ తేదీన రిలీజ్ కానుంది. దేవర మూవీకి అనిరుధ్ రవిచందర్ సంగీతం అందిస్తున్నారు.