Anushka Shetty: గుడ్‌న్యూస్ వినిపించిన అనుష్క‌...కొత్త సినిమా షూటింగ్ మొద‌లుపెట్టిందిగా...

అనుష్కశెట్టి కెమెరా ముందుకొచ్చి రెండేళ్లు దాటిపోయింది. చివ‌ర‌గా నిశ్శ‌బ్దం సినిమాతో ఓటీటీ ద్వారా ప్రేక్ష‌కుల్ని ప‌ల‌క‌రించింది. అనంతరం వ్య‌క్తిగ‌త కార‌ణాల‌తో పాటు క‌రోనా విరామం కార‌ణంగా సినిమాల‌కు దూరంగా ఉంది. లాంగ్ గ్యాప్ తర్వాత అనుష్క తిరిగి సెట్స్ లో అడుగుపెట్టింది. కొత్త సినిమా షూటింగ్ మొద‌లుపెట్టింది. అనుష్క‌,న‌వీన్ పొలిశెట్టి హీరోహీరోయిన్లుగా యు.వి.క్రియేష‌న్స్ సంస్థ ఓ సినిమాను నిర్మిస్తోంది.

వయసు అంతరాలు ఉన్న ఓ జంట ప్రేమకథతో డిఫ‌రెంట్ క‌మ‌ర్షియ‌ల్ ఎంట‌ర్‌టైన‌ర్‌గా తెర‌కెక్కుతున్న ఈ చిత్రానికి పి.మ‌హేష్‌బాబు ద‌ర్శ‌క‌త్వం వ‌హిస్తున్నారు. అనుష్క పుట్టిన‌రోజు సంద‌ర్భంగా గత ఏడాది ఈ సినిమాను అఫీషియ‌ల్‌గా అనౌన్స్ చేశారు. ఆ త‌ర్వాత నిర్మాణ సంస్థ‌తో పాటు నాయకానాయికల నుండి ఎలాంటి అప్‌డేట్ రాక‌పోవ‌డంతో సినిమా ఆగిపోయిన‌ట్లు ప్ర‌చారం జ‌రిగింది. కాగా బుధ‌వారం ఈ సినిమాపై న‌వీన్ పొలిశెట్టి ఆస‌క్తిక‌ర పోస్ట్ చేశారు. ఈ సినిమా షూటింగ్ కొనసాగుతున్నట్లు పేర్కొన్నాడు. బుధ‌వారం నాటితో అనుష్క న‌టించిన తొలి సినిమా సూప‌ర్ విడుద‌లై 17 ఏళ్లు అవుతోంది.

ఈ సంద‌ర్భంగా కొత్త సినిమా సెట్స్‌లో స్పెష‌ల్ సెల‌బ్రేష‌న్స్ నిర్వ‌హించారు. ఇందులో భాగంగా 17 ఇయ‌ర్స్ ఇండ‌స్ట్రీ ఇక్క‌డ అనే అక్ష‌రాల‌తో డిజైన్ చేసిన కేక్‌ను అనుష్క చేతిలో ప‌ట్టుకొని ఉన్న ఫొటోను న‌వీన్ పొలిశెట్టి ట్విట్ట‌ర్ లో పోస్ట్ చేశారు.ఈ 17 ఇయ‌ర్స్ లో నేనే బెస్ట్ కో స్టార్ అంటా అంటూ ఈ ట్వీట్ ను ఉద్దేశించి పేర్కొన్నాడు. ఈ సినిమా షూటింగ్ కొన‌సాగుతుంద‌ని చెప్పాడు. మ‌ళ్లీ యూవీ క్రియేష‌న్స్ రౌట‌ర్ ఆఫ్ చేసేలోపు నేనే అప్‌డేట్ ఇచ్చాశా అంటూ ఫ‌న్నీ గా కామెంట్ చేశాడు. న‌వీన్ పొలిశెట్టి పోస్ట్ చేసిన ఈ ట్వీట్ సోష‌ల్ మీడియాలో వైర‌ల్‌గా మారింది. అనుష్క హీరోయిన్‌గా న‌టిస్తున్న 48వ సినిమా ఇది. కాగా ద‌ర్శ‌కుడు మ‌హేష్‌బాబు గ‌తంలో సందీప్‌కిష‌న్‌తో రారా కృష్ణ‌య్య అనే సినిమా చేశాడు. అత‌డికి ఇది రెండో సినిమా.