Akhil on Agent failure: మంచి సినిమా తీయలేకపోయాం.. ఏజెంట్ డిజాస్టర్‌పై అఖిల్

Akhil on Agent failure: అఖిల్ అక్కినేని నటించిన ఏజెంట్ మూవీ బాక్సాఫీస్ దగ్గర దారుణంగా బోల్తా పడిన విషయం తెలుసు కదా. అతని కెరీర్లోనే అతిపెద్ద డిజాస్టర్ గా మిగిలిపోయింది. భారీ అంచనాల మధ్య రిలీజైన ఈ మూవీ.. అభిమానులను ఏమాత్రం మెప్పించలేకపోయింది. అయితే ఈ ఫెయిల్యూర్ పై అఖిల్ సోమవారం (మే 15) ట్విటర్ ద్వారా స్పందించాడు.

తాము అనుకున్న విధంగా సినిమా ఆడలేదని, మంచి సినిమా తీయలేకపోయామని అన్నాడు. "మా ఏజెంట్ సినిమాను తీయడానికి తమ శాయశక్తులా కృషి చేసిన ప్రతి ఒక్కరికీ ధన్యవాదాలు. మేము మాకు సాధ్యమైనంత వరకూ ప్రయత్నించినా.. దురదృష్టవశాత్తూ సినిమా మేము అనుకున్నట్లు ఆడలేకపోయింది. మేము మీకోసం మంచి సినిమా చేయలేకపోయాం" అని అఖిల్ అన్నాడు.

ఈ సందర్భంగా ప్రొడ్యూసర్, డిస్ట్రిబ్యూటర్లకు కూడా అఖిల్ థ్యాంక్స్ చెప్పాడు. ఈ మూవీ ఫలితంతో నిరాశ చెందకుండా మరో మంచి మూవీతో మీ ముందుకు వస్తానని అతడు చెప్పాడు. మరోవైపు ఏజెంట్ ఫెయిల్యూర్ పై ఇప్పటికే ప్రొడ్యూసర్ అనిల్ సుంకర కూడా స్పందించాడు. అభిమానులకు అతడు క్షమాపణలు చెప్పాడు. మంచి స్క్రిప్ట్ లేకుండానే సినిమా మొదలుపెట్టి పెద్ద తప్పు చేశామని అతడు అనడం గమనార్హం.

ఏజెంట్ మూవీ మూడేళ్లుగా అభిమానులను ఊరిస్తూ వచ్చింది. ఎన్నోసార్లు వాయిదా పడింది. భారీ బడ్జెట్ తో తీసిన ఈ సినిమా నష్టాలను మిగిల్చింది. అఖిల్ ఈ సినిమా కోసం బాగానే కష్టపడినా ఫలితం లేకుండా పోయింది.