Aamir Khan: శ్రీదేవితో సినిమా తిరస్కరించిన ఆమీర్ ఖాన్.. ఎందుకో తెలుసా?

బాలీవుడ్ మిస్టర్ పర్ఫెక్ట్ ఆమిర్ ఖాన్ స్టార్ డమ్ గురించి ఎంత చెప్పినా తక్కువే. కథల ఎంపికలో ఎంతో జాగ్రత్తగా ఉంటారు. సినిమాల మధ్య గ్యాప్ ఇచ్చినా అద్భుతమైన చిత్రాన్ని ప్రేక్షకుల ముందుకు తీసుకురావాలని ఎంతగానో కష్టపడతారు. వాటి ఫలితాలే లగాన్, రంగ్ దే బసంతి, గజిని, 3 ఇడియట్స్, దంగల్ లాంటి చిత్రాలు. అలాంటి ఆమిర్ ఖాన్ కెరీర్ ప్రారంభంలోనే స్టార్ హీరోయిన్ తో నటించే అవకాశాన్ని వదులుకున్నాడు. ఇంతకీ ఆమె ఎవరో కాదు.. అతిలోక సుందరి శ్రీదేవి. 90వ దశకం ప్రారంభంలో హిందీ చిత్రసీమలో స్టార్ హీరోయిన్ గా ఉన్న శ్రీదేవి పక్కన నటించడాన్ని తిరస్కరించాడు.

అవును మీరు విన్నది నిజమే. 1988లో వచ్చిన ‘కయామత్ సే కయామత్ తక్’ లాంటి సినిమాతో ఓవర్ నైట్ స్టార్ అయిన ఆమిర్ కు జోడీగా తదుపరి చిత్రంలో స్టార్ హీరోయిన్ ను తీసుకోవాలని దర్శక నిర్మాతలు భావించారట. అప్పట్లో శ్రీదేవి పాపులారిటీని దృష్టిలో ఉంచుకొని ఆమిర్ పక్కన నటింపజేయాలని అనుకున్నారట. అంతేకాకుండా వీరిద్దరితో కలిసి ఫొటోషూట్ కూడా తీశారు. అయితే అనంతరం మన మిస్టర్ పర్ఫెక్ట్.. శ్రీదేవితో నటించడాన్ని సున్నితంగా తిరస్కరించారట. ఇందుకు కారణం లేకపోలేదు. ‘కయామత్ సే కయామత్ తక్’ చిత్రంలో కాలేజీ యువకుడి పాత్రను పోషించిన ఆమిర్ కు జోడీగా ఫ్రెష్ ఫేస్ జూహీ చావ్లాను తీసుకున్నారు. వీరి జోడీకి మంచి గుర్తింపు లభించింది. అయితే శ్రీదేవి పక్కన ఆమిర్ చిన్నగా కనిపిస్తున్నారని, శ్రీదేవి పెద్దగా కనపిస్తుందనే కారణంగా ఆమిర్ ఆ అవకాశాన్ని వదులుకున్నారట. ప్రేక్షకులు కూడా ఇదే విధంగా ఆలోచిస్తారని ఆయన భావించరట. దీంతో వీరు ఇరువురు కలిసి నటించలేకపోయారు.

ప్రస్తుతం ఆమిర్ ఖాన్ ‘లాల్ సింగ్ ఛద్దా’ అనే చిత్రంలో నటిస్తున్నారు. ఇది హాలీవుడ్ లో టామ్ హ్యాంక్స్ నటించిన ‘ఫారెస్ట్ గంప్’ సినిమాకు రీమేక్. అంతేకాకుండా ఆమిర్ సరసన కరీనా కపూర్ నటిస్తోంది. వీరిద్దరూ కలిసి ఇంతకుముందు 3-ఇడియట్స్, తలాష్ లాంటి సినిమాల్లో నటించారు. లాల్ సింగ్ ఛద్దాలో టాలీవుడ్ హీరో నాగచైతన్య కూడా కీలక పాత్ర పోషిస్తున్నారు. ఈ సినిమా 2022, ఏప్రిల్ 14న ప్రేక్షకుల ముందుకు రానుంది. అద్వైత్ చందన్ దర్శకత్వం వహిస్తున్నారు. ఆమిర్ ఖాన్ తన సొంత బ్యానర్ లో ఈ సినిమాను నిర్మిస్తున్నారు.