National Flags : ఏపీలోని అన్ని పోస్టాఫీసుల్లో జాతీయ జెండాలు విక్రయం, ఆన్ లైన్ కూడా ఆర్డర్

National Flags : భారత స్వాతంత్య్ర దినోత్సవ వేడుకలు సందర్భంగా ఆంధ్రప్రదేశ్‌లోని అన్ని పోస్టాఫీసుల్లో తపాలా శాఖ జాతీయ జెండాలను విక్రయిస్తుంది. రాష్ట్రంలోని అన్ని పోస్టాఫీసుల్లో జాతీయ జెండాల విక్రయం ప్రారంభమైందని అసిస్టెంట్ పోస్ట్ మాస్టర్ జనరల్ కె.సుధీర్ బాబు తెలిపారు. ప్రజల మంచి స్పందన వస్తుందన్నారు. ప్రజలు తమ సమీపంలోని పోస్టాఫీసుల్లో జెండాలను కొనుగోలు చేయవచ్చు లేదా ఆన్‌లైన్‌లో ఆర్డర్ చేయవచ్చని కె. సుధీర్ బాబు తెలిపారు. రాష్ట్రవ్యాప్తంగా 10,550 పోస్టాఫీసుల్లో జాతీయ జెండాలు విక్రయిస్తున్నారని, ఒక్కో జెండా వెల రూ.25 అని చెప్పారు.

ఆన్ లైన్ లో కూడా ఆర్డర్ చేయవచ్చు

“ఆసక్తి ఉన్న వ్యక్తులు తమ పోస్టల్ చిరునామా, ఫోన్ నంబర్, ఇతర వివరాలను నమోదు చేసి e-postoffice.gov.inలో ఆర్డర్ చేయవచ్చు. స్థానిక పోస్ట్‌మాన్ గంటల్లో జెండాలను వారి ఇంటి వద్దకే అందజేస్తారు. ప్రజలు 5,000 నుంచి 10,000 జెండాల కోసం ఆర్డర్‌లను కూడా బుక్ చేసుకోవచ్చు ”అని అసిస్టెంట్ పోస్ట్ మాస్టర్ జనరల్ చెప్పారు. ఆగస్టు 13 కూడా జాతీయ జెండాలు విక్రయిస్తామని తెలిపారు. పోస్టాఫీసుల్లో ప్రత్యేక కౌంటర్లు ప్రారంభించామన్నారు. జాతీయ జెండాల విక్రయాలపై దృష్టి సారించాలని అన్ని పోస్టాఫీసుల్లో సిబ్బందికి సూచించారు. జాతీయ జెండాలు అన్ని పోస్టాఫీసుల్లో, ఆగస్టు 15 వరకు ఆన్‌లైన్‌లో విక్రయిస్తామన్నారు. ఆసక్తి ఉన్న వ్యక్తులు వారి స్థానిక పోస్ట్‌మ్యాన్ లేదా సమీపంలోని పోస్టాఫీసులను సంప్రదించవచ్చని సుధీర్ బాబు తెలిపారు.