TS SET Key: టీఎస్ సెట్ ప్రాథమిక ‘కీ’ విడుదల - స్కోర్ ఇలా చూసుకోండి

Telangana SET Exams 2022: తెలంగాణ స్టేట్ ఎలిజిబిలిటీ టెస్ట్- 2022కు సంబంధించిన ప్రాథమిక ‘కీ’ వచ్చేసింది. ఈ మేరకు అధికారులు ప్రకటన విడుదల చేశారు. మార్చి 14, 15, 17వ తేదీల్లో ఈ పరీక్షలను పూర్తి చేసిన సంగతి తెలిసిందే. అయితే తాజాగా విడుదలైన ప్రాథమిక కీ లో ఏమైనా అభ్యంతరాలు ఉంటే…తెలపాలని అధికారులు పేర్కొన్నారు. మార్చి 27వ తేదీ లోపు అభ్యర్థులు పంపాలని ప్రకటనలో తెలిపారు.

ఈ ఏడాది జరిగిన సెట్ పరీక్షలకు మొత్తం 50,256 మంది దరఖాస్తు చేసుకోగా.. 40,128 మంది హాజరయ్యారు. ఈ సెట్ పరీక్షకు 80 శాతం హాజరైనట్లు అధికారులు పేర్కొన్నారు.

ఇలా డౌన్లోడ్ చేసుకోండి….

ముందుగా అభ్యర్థులు http://telanganaset.org/ అధికారిక వెబ్ సైట్ ను సందర్శించాలి.

preliminary key అనే ఆప్షన్ పై క్లిక్ చేయాలి.

మీ అప్లికేషన్ నంబర్, పుట్టిన తేదీ వివరాలు నమోదు చేసి లాగిన్ కావాలి.

మీ ప్రాథమిక కీని చెక్ చేసుకోవచ్చు. మీ మార్కులు కూడా తెలుసుకోవచ్చు. మీ పేరు, హాల్ టికెట్ నెంబర్ తో పాటు సాధించిన మార్కులు కూడా కనిపిస్తాయి. ఇక్కడే రిస్పాన్స్ షీట్లు కూడా ఉంటాయి.

డౌన్లోడ్ ఆప్షన్ పై క్లిక్ చేసి కీ పొందవచ్చు.

రాష్ట్రంలో అసిస్టెంట్‌ ప్రొఫెసర్లు, డిగ్రీ కళాశాలల లెక్చరర్ల ఉద్యోగాలకు అర్హత సాధించేందుకు రాష్ట్ర ప్రభుత్వం టీఎస్‌ సెట్‌ నిర్వహిస్తోంది. ఉస్మానియా విశ్వవిద్యాలయం ఆధ్వర్యంలో ఈ పరీక్షలు జరుగుతున్నాయి. వివిధ సబ్జెక్టులకు గాను ఈసారి నిర్వహించిన టీఎస్ సెట్ కోసం 50 వేలకుపైగా దరఖాస్తులు వచ్చాయి. పరీక్షల కోసం తెలంగాణ రాష్ట్రవ్యాప్తంగా 10 కేంద్రాలు... ఏపీలోని విశాఖపట్నం, తిరుపతి, కర్నూలు, విజయవాడలో ఒక్కో కేంద్రాన్ని ఏర్పాటు చేశారు. కంప్యూటర్‌ ఆధారిత టెస్టు(సీబీటీ) పద్ధతిలో జరిగే టీఎస్‌ సెట్‌కు రెండు పేపర్లు ఉంటాయి.

కంప్యూటర్ ఆధారితంగా (Computer based test -CBT) నిర్వహించే పరీక్షలో రెండు పేపర్లు ఉంటాయి. 3 గంటల వ్యవధిలో జరిగే పరీక్షలో.... పేపర్ 1 లో 50 ప్రశ్నలకు గాను 100 మార్కులు.. పేపర్ 2 లో 100 ప్రశ్నలకు 200 మార్కులు ఉంటాయి. 29 సబ్జెక్టులలో ఈ టెస్ట్ జరుగుతుంది. ఈ పరీక్షలో అర్హత సాధించిన వారు.. ఆయా సబ్జెక్టులకు సంబంధించిన పోస్టుల రిక్రూట్మెంట్ లో పోటీ పడే అవకాశం ఉంటుంది. టీఎస్ సెట్ ను చివరిసారిగా 2019లో నిర్వహించారు.పేపర్ 1 లో చూస్తే... జనరల్ పేపర్ ఆన్ టీచింగ్ అండ్ రిసెర్చ్ ఆప్టిట్యూడ్ (పేపర్-1) ఉంటుంది. రెండో పేపర్ పూర్తిగా ఎంపిక చేసుకున్న సబ్జెక్టు ఉంటుంది .

సబ్జెక్టులు ఇవే...

జాగ్రఫీ, కెమికల్ సైన్సెస్, కామర్స్, కంప్యూటర్ సైన్స్ & అప్లికేషన్స్, ఎకనామిక్స్, ఎడ్యుకేషన్, ఇంగ్లిష్, ఎర్త్ సైన్స్, లైఫ్ సైన్సెస్, జర్నలిజం & మాస్ కమ్యూనికేషన్, మేనేజ్‌మెంట్, హిందీ, హిస్టరీ, లా, మ్యాథమెటికల్ సైన్సెస్, ఫిజికల్ సైన్సెస్, ఫిజికల్ ఎడ్యుకేషన్, ఫిలాసఫీ, పొలిటికల్ సైన్స్, సైకాలజీ, పబ్లిక్ అడ్మినిస్ట్రేషన్, సోషియాలజీ, తెలుగు, ఉర్దూ, లైబ్రరీ అండ్ ఇన్ఫర్మేషన్ సైన్స్, ఎన్విరాన్‌మెంటల్ స్టడీస్, లింగ్విస్టిక్స్.సంస్కృతం, సోషల్ వర్క్ సబ్జెక్టులకు సెట్ నిర్వహిస్తున్నారు.