TG Cabinet Decisions : హైడ్రాకు చట్టబద్ధత.. సన్నవడ్లకు రూ. 500 బోనస్, 3 వర్శిటీలకు కొత్త పేర్లు - కేబినెట్ నిర్ణయాలివే

Telangana Cabinet Key Decisions : సీఎం రేవంత్‌ అధ్యక్షతన జరిగిన కేబినెట్ భేటీ ముగిసింది. ఇందులో పలు కీలక నిర్ణయాలు తీసుకున్నారు. హైడ్రాకు విస్తృత అధికారాలు కల్పించేందుకు మంత్రివర్గం ఆమోదముద్ర వేసింది. సన్నవడ్లకు రూ.500 బోనస్ ఇవ్వాలని మంత్రివర్గం నిర్ణయించింది.

కోఠి మహిళా యూనివర్సిటీకి చాకలి ఐలమ్మ పేరును ఖరారు చేశారు. తెలుగు విశ్వవిద్యాలయానికి సురవరం ప్రతాపరెడ్డి పేరును ప్రతిపాదిస్తూ మంత్రివర్గం ఆమోదముద్ర వేసింది. హ్యాండ్లూమ్ టెక్నాలజీ ఇనిస్టిట్యూట్ కి కొండా లక్ష్మణ్ బాపూజీ పేరు ఖరారైంది.

మంత్రివర్గం నిర్ణయాలను మంత్రి పొంగులేటి, కోమటిరెడ్డి వెంకట్ రెడ్డి వెల్లడించారు. మంత్రి పొంగులేటి మాట్లాడుతూ… హైడ్రాకు చట్టబద్ధత కల్పించే విషయంపై నిర్ణయం తీసుకున్నామని చెప్పారు.కోఠి మహిళా యూనివర్సిటీకి చాకలి ఐలమ్మ పేరు, తెలుగు విశ్వవిద్యాలయానికి సురవరం ప్రతాపరెడ్డి పేరును ఖరారు చేస్తూ క్యాబినెట్ ఆమోదముద్ర వేసిందని పేర్కొన్నారు.

తెలంగాణ కేబినెట్ నిర్ణయాలు :

• ఖరీఫ్ సీజన్ నుంచి సన్నవడ్లకు రూ.500 బోనస్ ఇవ్వాలని మంత్రివర్గం నిర్ణయం
• కోటి మహిళా యూనివర్సిటీకి చాకలి ఐలమ్మ పేరు ఖరారు.
• తెలుగు విశ్వవిద్యాలయానికి సురవరం ప్రతాపరెడ్డి పేరుకు కేబినెట్ ఆమోదం.
• హ్యాండ్లూమ్ టెక్నాలజీ ఇనిస్టిట్యూట్ కి కొండా లక్ష్మణ్ బాపూజీ పేరు ఖరారు.
• ట్రిపుల్ఆర్ అలైన్ మెంట్ ఖరారు చేసేందుకు అధికారులతో ప్రత్యేక కమిటీ.
• ఎస్ఎల్ బీసీ ప్రాజెక్ట్ రివైజ్డ్ అసెస్ మెంట్ పనుల ప్రతిపాదనలకు ఆమోదం.
• హైదరాబాద్‌లో చెరువులు, కుంటలు, నాలాలు, ప్రభుత్వ ఆస్తుల పరిరక్షణకు ఏర్పాటు చేసిన హైడ్రాను బలోపేతం చేయడం, వాల్టా చట్టంతో పాటు హెచ్ఎండీఏ, జీహెచ్ఎంసీ, మెట్రో వాటర్ బోర్డుకు ఇప్పుడున్న అధికారాలను హైడ్రా కమిషనర్‌కు అప్పగించడం.
•  తెలంగాణ కోర్ అర్బన్ రీజియన్ (ఓఆర్ఆర్ లోపల ఉన్న హైదరాబాద్ సిటీ ఏరియా) పరిధిలో ప్రభుత్వ స్థలాలు, చెరువులు, కుంటలు, నాలాలన్నీ పరిరక్షించే బాధ్యతలను హైడ్రా తీసుకుంటుంది.
•  కోర్ అర్బన్ రీజియన్‌లో జీహెచ్ఎంసీతో పాటు 27 అర్బన్ లోకల్ బాడీస్, 51 గ్రామ పంచాయతీలు ఉన్నాయి. వీటిలో హైడ్రా కమిషనర్‌కు అవసరమైన అధికారాలు కల్పించేలా చట్ట సవరణకు కేబినేట్ ఆమోదం.
• కోర్ అర్బన్ సిటీలోని అన్ని చెరువులు, కుంటలు ఆక్రమణలకు గురి కాకుండా సీసీ కెమెరాలతో నిఘా పెట్టి ఇంటిగ్రేటేడ్ కమాండ్ కంట్రోల్ సెంటర్‌తో అనుసంధానం చేయడం.
•  హైడ్రాకు అవసరమైన దాదాపు 169 మంది అధికారులు, 946 మంది అవుట్ సోర్సింగ్ ఉద్యోగులను వివిధ విభాగాల నుంచి డిప్యూటేషన్ మీద నియమించుకునేందుకు అనుమతి.
•  ప్రస్తుతం అమల్లో ఉన్న పోలీస్ ఆరోగ్య భద్రత స్కీమును ఎస్పీఎఫ్‌కు కూడా వర్తింపజేయడం.
•  తెలంగాణ ట్రేడ్ ప్రమోషన్ కార్పొరేషన్ ఆధ్వర్యంలో మనోహరాబాద్ మండలంలో మల్టీ మోడల్ లాజిస్టిక్ పార్క్‌కు భూమి కేటాయింపు.
•  ఖమ్మం జిల్లా ఎర్రపాలెం మండలంలో ఇండస్ట్రియల్ పార్కు ఏర్పాటుకు 58 ఎకరాల భూమి కేటాయింపు.
•  ములుగు జిల్లాలోని ఏటూరునాగారంలో ఏర్పాటు చేసిన ఫైర్ స్టేషన్‌కు 34 మంది సిబ్బంది మంజూరు.
•  రాష్ట్రంలో కొత్తగా అనుమతి పొందిన 8 మెడికల్ కాలేజీలకు అవసరమైన బోధన, బోధనేతర సిబ్బందికి సంబంధించిన దాదాపు 3 వేల పోస్టుల మంజూరు
•  ఎస్‌ఎల్‌బీసీ ప్రాజెక్టు పనులను రెండేండ్లలో పూర్తి చేసి నల్గొండ జిల్లాలో 4 లక్షల ఎకరాలకు సాగునీటిని అందించేందుకు నిర్ణయం.
•  కోస్గి ఇంజనీరింగ్ కాలేజీకి, హకీంపేటలో జూనియర్ కాలేజీకి అవసరమైన పోస్టులు మంజూరు