Jani Master : పరారీలో జానీ మాస్టర్, పోక్సో యాక్ట్ కింద కేసు నమోదు!

Jani Master : డాన్స్ మాస్టర్ షేక్ జానీ బాషాపై నార్సింగి పోలీసులు పోక్సో కేసు నమోదు చేశారు. బాధితురాలు మైనర్‌గా ఉన్న సమయంలోనే లైంగిక దాడి జరిగిందన్న ఆరోపణలతో పోలీసులు పోక్సో చట్టం కింద కేసు నమోదు చేశారు. ముంబయి హోటల్ లో జానీ మాస్టర్ తనపై లైంగిక దాడి చేశారని బాధిత యువతి పోలీసులకు ఫిర్యాదు చేసింది. దీంతో పోలీసులు పోక్సో యాక్ట్ ను ఎఫ్‌ఐఆర్‌లో యాడ్‌ చేశారు. జానీ మాస్టర్ ప్రస్తుతం పరారీలో ఉన్నారని, ఆయన్ని పట్టుకునేందుకు పోలీసులు గాలిస్తు్న్నారని సమాచారం.

హైదరాబాద్‌‌లో జానీ మాస్టర్‌పై అత్యాచారం కేసు నమోదు అయ్యింది. జానీ మాస్టర్‌ తనను లైంగికంగా వేధిస్తున్నాడని రాయదుర్గం పీఎస్‌లో ఓ యువతి కంప్లైంట్ ఇచ్చింది. తనపై అత్యాచారం చేశాడని, బెదిరించి గాయపరిచాడని ఆరోపించింది. రాయదుర్గం పోలీస్ స్టేషన్ లో జానీ మాస్టర్‌పై జీరో ఎఫ్‌ఐఆర్ నమోదు చేసిన పోలీసులు... కేసును నార్సింగి పీఎస్ కు బదిలీ చేశారు. అవుట్‌ డోర్‌ షూటింగ్ సమయాల్లో జానీ మాస్టర్ తనను లైంగికంగా వేధించాడని యువతి ఫిర్యాదు చేసింది. నార్సింగిలోనూ తనపై లైంగిక దాడి జరిగిందని ఆమె ఫిర్యాదులో పేర్కొంది. 2017లో ఒక టీవీ షోలో జానీ మాస్టర్ తనకు పరిచయమైనట్లు బాధితురాలు తెలిపింది. ఆ తర్వాత జానీ మాస్టర్ టీమ్ లో అసిస్టెంట్ కొరియోగ్రాఫర్ చేరానన్నారు. ఒక షో కోసం జానీకో కలిసి తాను ముంబయికి వెళ్లానని, అక్కడి హోటల్లో జానీ మాస్టర్ తనపై అత్యాచారానికి పాల్పడ్డాడని బాధితురాలు ఫిర్యాదులో తెలిపింది.

పరారీలో జానీ మాస్టర్

అత్యాచారం ఆరోపణలు ఎదుర్కొంటున్న జానీ మాస్టర్ పరారీలో ఉన్నట్లు పోలీసులు తెలిపారు. ఆయన ఇంటి వద్ద లేకపోవడంతో పాటు ఫోన్ కు కూడా అందుబాటులోకి రాలేదని పోలీసులు అంటున్నారు. దీంతో జానీ మాస్టర్ కోసం నార్సింగి పోలీసులు గాలింపు చేపట్టారు. జానీ మాస్టర్ లద్దాక్ లో ఉన్నారన్న సమాచారంతో నాలుగు టీమ్ లు ఆయన కోసం బయలుదేరారని సమాచారం. ముందు ఆయన నెల్లూరులో ఉన్నట్లు ప్రచారం జరిగింది. అయితే అక్కడ లేరని స్థానిక పోలీసుల నుంచి సమాచారం వచ్చిందని నార్సింగి పోలీసులు తెలిపారు.