KCR Oath: నేడు ఎమ్మెల్యేగా ప్రమాణం చేయనున్న కేసీఆర్

KCR Oath: బిఆర్‌ఎస్‌ అధ్యక్షుడు, మాజీ ముఖ్యమంత్రి కేసీఆర్‌ గురువారం ఎమ్మెల్యేగా ప్రమాణ స్వీకారం చేయనున్నారు. గత ఏడాది జరిగిన తెలంగాణ శాసనసభ ఎన్నికల్లో గజ్వేల్‌ నుంచి శాసన సభ్యుడిగా కేసీఆర్‌ గెలుపొందారు. ఆ తర్వాత అసెంబ్లీ సమావేశాలకు ముందే ప్రమాదవశాత్తు జారిపడి తుంటి ఎముకకు గాయం కావడంతో ఆపరేషన్‌ నిర్వహించారు. దాదాపు రెండు నెలలుగా విశ్రాంతికి పరిమితం అయ్యారు. దీంతో కేసీఆర్‌ ఎమ్మెల్యేగా ప్రమాణ స్వీకారం చేయలేదు.

ఇటీవల కేసీఆర్ కాస్త కోలుకున్నారు. చేతికర్ర సాయంతో అడుగులు వేస్తున్నారు. గురువారం మధ్యాహ్నం 12 గంటలకు అసెంబ్లీకి కేసీఆర్‌ చేరుకోనున్నారు. మధ్యాహ్నం 12.45 గంటలకు శాసన సభాపతి కార్యాలయంలో ప్రమాణ స్వీకారం చేస్తారని బిఆర్‌ఎస్‌ పార్టీ వర్గాలు తెలిపాయి.

ప్రమాణ స్వీకారం చేసిన తర్వాత శాసన సభ పక్ష కార్యాలయంలో ప్రత్యేక పూజలు నిర్వహించి, ప్రతిపక్ష నేతగా బాధ్యతలు స్వీకరిస్తారు. కేసీఆర్‌ ప్రమాణం సందర్భంగా పార్టీ ఎమ్మెల్యేలు, ఎమ్మెల్సీలు హాజరు కానున్నారు.

రాష్ట్రంలో కాంగ్రెస్‌ ప్రభుత్వం అధికారం చేపట్టిన రెండో రోజే కేసీఆర్‌ బాత్రూంలో జారి పడటంతో తుంటి ఎముక విరిగింది. హైదరాబాద్‌లోని ఓ ప్రైవేటు ఆసుపత్రిలో కేసీఆర్‌కు శస్త్ర చికిత్స జరిగింది. డాక్టర్ల సూచన మేరకు కేసీఆర్‌ గత కొంతకాలంగా విశ్రాంతి తీసుకుంటున్నారు. ఇటీవల కర్ర సాయంతో మెల్లగా నడవగలుగుతున్నారు.

ఎమ్మెల్యేగా కేసీఆర్‌ ప్రమాణ స్వీకారం నేపథ్యంలో పెద్ద సంఖ్యలో బీఆర్‌ఎస్‌ ఎమ్మెల్యేలు, ఎమ్మెల్సీలు అసెంబ్లీకి తరలిరానుండటంతో అసెంబ్లీ వర్గాలు భద్రతా ఏర్పాట్లపై దృష్టి సారించాయి. పార్లమెంటు బడ్జెట్ సమావేశాలు, లోక్‌సభ ఎన్నికలు సమీపిస్తున్న నేపథ్యంలో బిఆర్‌ఎస్‌ కార్యక్రమాలను యాక్టివేట్ చేసేందుకు కేసీఆర్ సన్నాహాలు చేస్తున్నారు.

ఫలితాలు వెలువడిన రోజుల్లోనే…

తెలంగాణ అసెంబ్లీ ఎన్నికల ఫలితాలు వెలువడిన కొద్ది రోజులకే డిసెంబర్ 7వ తేదీ రాత్రి కేసీఆర్‌ ఫాం హౌస్‌లో కాలు జారి పడిపోయారు. అర్థరాత్రి ఇంట్లో కాలు జారి పడటంతో కుటుంబ సభ్యులు హుటాహుటిన ఆస్పత్రికి తరలించారు.

సోమాజిగూడ యశోదా ఆస్పత్రిలో కేసీఆర్‌కు నిర్వహించిన ప్రాథమిక పరీక్షల్లో కేసీఆర్‌కు తుంటి ఎముక విరిగినట్టు గుర్తించారు. కేసీఆర్‌కు శస్త్ర చికిత్స చేయాలని నిర్ణయించి, అదే రోజు సాయంత్రం కేసీఆర్‌ ఎడమ తుంటి మార్పిడికి శస్త్ర చికిత్స నిర్వహించారు.

తెలంగాణ అసెంబ్లీ ఎన్నికల ఫలితాలు వెలువడిన తర్వాత డిసెంబర్‌ 3వ తేదీ మధ్యాహ్నం నుంచి కేసీఆర్‌ ఎర్రవెల్లిలోని ఫాం హౌస్‌లో ఉంటున్నారు. తెలంగాణ అసెంబ్లీ ఎన్నికల ఫలితాలు వెలువడిన వెంటనే ప్రగతి భవన్‌ విడిచి వెళ్లిపోయారు. అప్పటి నుంచి ఫాం హౌస్‌లోనే ఉంటున్నారు. ఆ తర్వాత బిఆర్‌ఎస్‌ తరపున ఎన్నికైన ఎమ్మెల్యేలతో ఫాంహౌస్‌లోనే భేటీ అయ్యారు.

ఫలితాలు వెలువడిన తర్వాత స్వగ్రామం చింతమడకకు చెందిన ప్రజలతో కూడా కేసీఆర్ భేటీ అయ్యారు. 7వ తేదీ రాత్రి పొద్దు పోయిన తర్వాత కేసీఆర్ కాలు జారి పడిపోయినట్టు తెలుస్తోంది. ఆ వెంటనే ఆయన్ని ఆస్పత్రికి తరలించారు. తాజాగా కోలుకోవడంతో తిరిగి పొలిటికల్ యాక్టివిటీ ప్రారంభించేందుకు రెడీ అవుతున్నారు.