TS Sankranti Holidays : జనవరి 13 నుంచి జూ.కాలేజీలకు సంక్రాంతి సెలవులు, ప్రకటించిన ఇంటర్ బోర్డు

TS Sankranti Holidays : తెలంగాణ రాష్ట్ర వ్యాప్తంగా జూనియర్ కళాశాలలకు ఇంటర్ బోర్డు సంక్రాంతి సెలవులను ప్రకటించింది. జనవరి 13 నుంచి 16వ తేదీ వరకు సంక్రాంతి సెలవులుగా ప్రకటించింది. జనవరి 17వ తేదీన జూనియర్ కళాశాలలు తిరిగి ప్రారంభం అవుతాయని ఇంటర్ బోర్డు తెలిపింది. సంక్రాంతి సెలవుల సమయంలో ఎలాంటి తరగతులు నిర్వహించరాదని ఇంటర్ బోర్డు స్పష్టం చేసింది.

స్కూళ్లకు హాలీడేస్

తెలంగాణ ప్రభుత్వం పాఠశాలలకు సంక్రాంతి సెలవులు ప్రకటించింది. జనవరి 12 నుంచి 17 వరకు సెలవులు ఉంటాయని వెల్లడించింది. ఈ మేరకు ఇటీవల ఉత్తర్వులను జారీ చేసింది. రాష్ట్రంలోని మిషనరీ స్కూళ్లకు మినహా అన్ని బడులకు ఈ సెలవులు వర్తిస్తాయని ప్రభుత్వం వెల్లడించింది. జనవరి 13న రెండో శనివారం ఉండగా…. 14వ తేదీన భోగి ఉంది. ఇక 15వ తేదీన సంక్రాంతి, 16న కనుమ పండుగలు ఉన్నాయి. 18వ తేదీన బడులన్నీ తిరిగి పునఃప్రారంభమవుతాయని సర్కార్ వెల్లడించింది.

ఏపీలో సంక్రాంతి సెలవులు

ఆంధ్రప్రదేశ్ లో జ‌న‌వ‌రి 13వ తేదీ నుంచే సెలవులు ప్రారంభం కానున్నాయి. జనవరి 13 రెండో శనివారం కాగా…. జ‌న‌వ‌రి 14వ తేదీన భోగి పండ‌గ, 15న ఆదివారం వ‌చ్చింది. జ‌న‌వ‌రి 15వ తేదీన సంక్రాంతి పండ‌గ‌ సాధార‌ణంగా సెల‌వులు ఉంటుంది. అలాగే జ‌న‌వ‌రి 16వ తేదీన ఆప్షన‌ల్ హాలీడే ఇవ్వనున్నారు. దీంతో పాటు స్కూల్స్‌, కాలేజీల‌కు మ‌రో రెండు రోజులు పాటు అద‌నం సెల‌వులు ఇచ్చే అవ‌కాశం ఉంది. ఫలితంగా ఏపీలో బడులు, కాలేజీల‌కు దాదాపు ఆరు రోజులు పాటు సెలవులు వచ్చే అవకాశం ఉంది. దీనిపై అధికారికంగా ఉత్తర్వులు రావాల్సి ఉంది. జనవరిలో నాలుగు ఆదివారాలు కలిపితే చాలా సెలవులు రానున్నాయి. జనవరి 25న ఆదివారం, జనవరి 26న రిపబ్లిక్ డే రావడంతో మరోసారి వరుస సెలవులు రానున్నాయి. ఏపీలో విద్యార్థులకు 2024 జనవరి నెలలో దాదాపు 11 నుంచి 13 రోజులు పాటు సెలవులు వస్తున్నాయి.

కాలేజీలకు సెలవులు

ఏపీలోని ఇంటర్ కాలేజీలకు ఈసారి నాలుగు రోజులపాటు సంక్రాంతి సెలవులు రానున్నాయి. జనవరి 13 నుంచి 16 వరకు సంక్రాంతి సెలవులు ఇవ్వనున్నారు. ఈ మేరకు ఏపీ ఇంటర్ బోర్డు నుంచి అధికారిక ప్రకటన రావాల్సి ఉంది. ఇంటర్ అకడమిక్ క్యాలెండర్ ప్రకారం జనవరి 11 నుంచి 17 వరకు జూనియర్ కళాశాలలకు సంక్రాంతి సెలవులు ప్రకటించారు. అయితే వారం రోజులకు బదులుగా కేవలం నాలుగు రోజులు మాత్రమే సెలవులు ఉండే అవకాశం ఉందని తెలుస్తోంది.