Shivam Dube on Dhoni: ధోనీ సలహా నాలో అగ్గి రగిల్చింది.. మహీపై చెన్నై స్టార్ ప్రశంసల వర్షం

Shivam Dube on Dhoni: మహేంద్ర సింగ్ ధోనీ కెప్టెన్సీలో నాలుగు సార్లు ఐపీఎల్ విజేతగా నిలిచిన చెన్నై సూపర్ కింగ్స్ ఈ సీజన్‌లోనూ దుమ్మురేపుతోంది. గతేడాది పేలవ ప్రదర్శనతో ప్లే ఆఫ్స్ చేరుకోలేకపోయిన సీఎస్‌కే ఈ సారి మాత్రం అద్భుతంగా ఆడుతోంది. ఆడిన ఐదు మ్యాచ్‌ల్లో మూడింటిలో గెలిచి ఆకట్టుకుంటోంది. ఈ సీజన్‌లో చెన్నై తరఫున ఆల్ రౌండర్ శివమ్ దూబే అత్యంత నిలకడగా ఆడుతున్నాడు. తన ప్రదర్శనతో చెన్నై విజయాల్లో కీలక పాత్ర పోషిస్తున్నారు. తను ఈ విధంగా సత్తా చాటడానికి ప్రధాన కారణమని కెప్టెన్ ఎంఎస్ ధోనీనే అని దూబే చెప్పాడు. తళా.. తనకు మద్దతుగా నిలిచి సీజన్‌లో మెరుగైన ప్రదర్శన చేసేలా తోడ్పడ్డాడని మిస్టర్ కూల్‌కు క్రెడిట్ ఇచ్చాడు.

"మహీ భాయ్(MS Dhoni) నన్ను ప్రోత్సహిస్తూ నాలో స్పూర్తి నింపే మాటలు చెప్పాడు. నువ్వు బాగా ఆడుతున్నావ్.. నిర్భయంగా ఉండు అని ధోనీ సలహా ఇచ్చాడు. ఫలితంగా నాలో మార్పు వచ్చింది. మెరుగైన ప్రదర్శన చేస్తున్నాను" అని శివమ్ దూబే తెలిపాడు.

గత ఐపీఎల్‌లో తన కెరీర్‌లోనే అత్యుత్తమ టోర్నీ అని దూబే అన్నాడు. "నా ఐపీఎల్ కెరీర్‌లో గత సీజన్‌లో అత్యుత్తమంగా ఆడాను. నాకు వచ్చిన ఛాన్స్‌తో నేనేమి చేయగలను చూపించాను. లక్నో తరఫున ఆడుతున్నప్పుడు నాలో ఆత్మవిశ్వాసం వచ్చి ఈ విధమైన ప్రదర్శన చేయగలిగాను. క్రికెటర్‌గా నేను ఆ విధంగా ఆడగలనని భావించాను. నేను బ్యాటింగ్ చేసే స్థానం నాకు తగినంత సమయాన్ని ఇస్తుంది. నాకు చాలా అవకాశాలు ఉన్నాయి. అవి నాకు చాలా ఆత్మవిశ్వాసాన్ని ఇచ్చాయి. ఆర్సీబీపై నేను చేసిన 95 పరుగుల ఇన్నింగ్స్ ఆ నమ్మకాన్ని మరింత పెంచేలా చేశాయి." అని శివమ్ దూబే స్పష్టం చేశాడు.

శివమ్ దూబే చాలా ఏళ్లుగా ఐపీఎల్ ఆడుతున్నప్పటికీ.. చెన్నై సూపర్ కింగ్స్ తరఫున ఆడటం మొదలుపెట్టినప్పటి నుంచి ధోనీ శిక్షణలో బాగా రాటుతేలాడు. గతేడాది అద్భుతమైన ఆటతీరుతో తనేంటో నిరూపించాడు. ఈ సీజన్‌లోనూ అత్యుత్తమంగా ఆడుతూ సీఎస్‌కే విజయాల్లో కీలక పాత్ర పోషిస్తున్నాడు.