Unified Pension Scheme : యూనిఫైడ్ పెన్షన్ స్కీమ్‌కు మహారాష్ట్ర ఆమోదం.. పథకం అమలుపై తమిళనాడు అధ్యయనం
Unified Pension Scheme : యూనిఫైడ్ పెన్షన్ స్కీమ్‌ను మోదీ ప్రభుత్వం ప్రకటించిన 24 గంటల్లోనే మహారాష్ట్ర కేబినెట్ ఆమోదం తెలిపింది. దీంతో యూపీఎస్‌ను ఆమోదించిన మెుదటి రాష్ట్రంగా మహారాష్ట్ర నిలిచింది. వచ్చే ఏడాది నుంచి ఈ పథకం అమలులోకి రానుంది. మరోవైపు తమిళనాడు ప్రభుత్వం ఈ పథకం అమలుపై అధ్యయనం చేస్తోంది.
ఏప్రిల్ 1, 2025 నుండి ప్రారంభమయ్యే కేంద్ర ప్రభుత్వ యూనిఫైడ్ పెన్షన్ స్కీమ్ పథకానికి మహారాష్ట్ర క్యాబినెట్ ఆమోదం తెలిపింది. ఈ పథకం పాత, కొత్త పెన్షన్ విధానాలను కలిపి హామీ ఇచ్చిన పెన్షన్ మొత్తాన్ని అందజేస్తుంది. 25 సంవత్సరాల కంటే ఎక్కువ సర్వీస్ ఉన్న ఉద్యోగులు వారి చివరి జీతంలో 50 శాతంతో అందుకుంటారు.
మహారాష్ట్ర ఆమోదం
మోదీ ప్రభుత్వం కొత్తగా ఆమోదించిన పెన్షన్ పథకాన్ని అమలు చేయాలని ఉద్యోగుల సంఘాలు రాష్ట్రాలను డిమాండ్ చేసిన కొన్ని గంటల తర్వాత మహారాష్ట్ర ప్రభుత్వం ఈ చర్య తీసుకుంది. ఈ నిర్ణయం గుర్తింపు పొందిన, గ్రాంట్-ఎయిడెడ్ విద్యా సంస్థలు, వ్యవసాయేతర విశ్వవిద్యాలయాలు, వాటి అనుబంధిత ప్రభుత్వేతర కళాశాలలు, వ్యవసాయ విశ్వవిద్యాలయాలు, అలాగే జిల్లా పరిషత్ ఉద్యోగులకు కూడా వర్తిస్తుంది.
శనివారం నాడు ఎన్‌పీఎస్‌ను సమీక్షించడానికి, సిబ్బంది సంస్థలతో చర్చలు జరిపిన ప్యానెల్‌కు క్యాబినెట్ సెక్రటరీ నియుక్త TV సోమనాథన్ నాయకత్వం వహించిన విషయం తెలిసిందే. అయితే కేంద్రం యూపీఎస్‌ను రాష్ట్రాలు ప్రతిరూపం చేయవచ్చని ఈ సందర్భంగా ఆయన చెప్పారు. ఎన్‌పీఎస్ పరిధిలోకి వచ్చిన 99 శాతం మంది ఉద్యోగులు యూపీఎస్‌కి మారడం ప్రయోజనకరంగా ఉంటుందని అన్నారు.
23 లక్షల మందికి ప్రయోజనం
23 లక్షల మంది కేంద్ర ప్రభుత్వ ఉద్యోగులకు ప్రయోజనం కల్పించే లక్ష్యంతో యూపీఎస్ పథకాన్ని ఆగస్టు 24న కేంద్ర ప్రభుత్వం ఆమోదించింది. నేషనల్ పెన్షన్ సిస్టమ్ (ఎన్‌పిఎస్) కింద జనవరి 1, 2004 తర్వాత సర్వీసులో చేరిన వారికి ప్రాథమిక వేతనంలో 50 శాతం పెన్షన్‌గా యూపీఎస్ హామీ ఇస్తుంది.
కనీస పెన్షన్
యూపీఎస్ చందాదారులు ఈ పథకం కింద హామీతో కూడిన పెన్షన్ పొందుతారు. పదవీ విరమణకు ముందు గత 12 నెలల్లో తీసుకున్న సగటు మూలవేతనంలో 50 శాతం వీరికి అందుతుంది. కనీసం 25 ఏళ్ల సర్వీసు ఉన్న ఉద్యోగులకు ఇది అందుబాటులోకి వస్తుంది. 25ఏళ్ల సర్వీసు పూర్తికాకుండా పదవీ విరమణ చేసే ఉద్యోగులకు కూడా యూపీఎస్ కింద పెన్షన్లు దక్కుతుంది. కనీసం పదేళ్ల సర్వీసు తర్వాత పదవీ విరమణ చేసిన వారికి నెలకు రూ.10,000 కనీస పెన్షన్ ప్రయోజనం పొందుతారు.
కేంద్ర ప్రభుత్వ ఉద్యోగులకు యూనిఫైడ్ పెన్షన్ స్కీమ్‌ను ప్రధాని నరేంద్ర మోదీ నేతృత్వంలోని క్యాబినెట్ శనివారం ప్రకటించింది. పాత పెన్షన్ పథకం (OPS) ప్రయోజనాలను ప్రస్తుత జాతీయ పెన్షన్ పథకం (NPS)తో కలపడానికి యూపీఎస్ ద్వారా ప్రభుత్వం ప్రయత్నించింది.
తమిళనాడు ప్రభుత్వ అధ్యయనం
మరోవైపు తమిళనాడు ప్రభుత్వం యూనిఫైడ్ పెన్షన్ స్కీమ్ అమలుపై చర్చలు చేస్తోంది. రాష్ట్రంలో పథకాన్ని ఆమోదించిన సందర్భంలో వచ్చే చిక్కులపై అధ్యయనం చేసే పనిని ప్రారంభించింది. ముఖ్యమంత్రి ఎంకే స్టాలిన్ మూడు వారాల సుదీర్ఘ పర్యటనలో భాగంగా అమెరికా వెళ్తున్నారు. ప్రస్తుతం ఎటువంటి నిర్ణయం తీసుకునే అవకాశం లేదు. ఏదైనా నిర్ణయం తీసుకునే ముందు ఉద్యోగ సంఘాలతో సంప్రదింపులు జరపాలని ప్రభుత్వం అనుకుంటోంది.
