Jammu Kashmir Terror attack : తెగించిన ఉగ్రవాదులు- జమ్ముకశ్మీర్​లోని ఆర్మీ క్యాంప్​పై దాడి!

జమ్ముకశ్మీర్​లోని రాజౌరీలో సోమవారం ఉదయం కాల్పుల మోతమోగింది. గుంధ్వ ఖవాస్​ ప్రాంతంలోని ఆర్మీ క్యాంప్​పై ఉగ్రవాదులు దాడి చేశారు. ఉగ్ర దాడిని భారత సైన్యం సమర్థవంతంగా తిప్పికొట్టింది. అంతేకాకుండా ఉగ్రవాదుల ఏరివేత కోసం భారీస్థాయిలో ఆపరేషన్​ని చెపట్టింది.

“రాజౌరీలోని ఓ గ్రామంలో ఉగ్రవాదులు ప్లాన్​ చేసిన భారీ స్థాయి దాడిని సైన్యం తిప్పుకొట్టింది,” అని డిఫెన్స్​ ప్రతినిధి లెఫ్టినెంట్​ కల్నల్​ సునీల్​ భర్త్​వాల్​ తెలిపారు. ఆ ప్రాంతంలో ప్రస్తుతం ఎదురుకాల్పులు కొనసాగుతున్నట్టు వెల్లడించారు.

ఆర్మీ చీఫ్​ జనరల్​ ఉపేంద్ర ద్వివేది శనివారం జమ్ముకశ్మీర్​కి వెళ్లి అక్కడి భద్రతా పరిస్థితులను సమీక్షించిన ఒక రోజు వ్యవధిలోనే ఈ ఘటన జరగడం గమనార్హం. నాటి సమావేశంలో జమ్ముకశ్మీర్​ పోలీసులు, పారామిలిటరీ దళాలు, నిఘా ఏజెన్సీలు పాల్గొన్నాయి.

తాజాగా ఘటన.. గురువారం దొడా జిల్లాలో జరిగిన ఉగ్రదాడిని గుర్తు చేస్తోంది. తెల్లవారుజామున 2 గంటల ప్రాంతంలో జడ్డన్​ బాటా గ్రామంలోని తాత్కాలిక సైనిక క్యాంప్​పై ఉగ్రవాదులు దాడి చేశారు. ఈ ఘటనలో ఒక జవాను తీవ్రంగా గాయపడ్డాడు.

బుధవారం రాత్రి మరో ఘటనలో రాజౌరీ జిల్లాలోని సుందేర్​బానీ సెక్టార్​ వద్ద ఉన్న ఎల్​ఓసీ వెంబడి భారత సైనికులు అనుమానాస్పద కదలికలను గుర్తించారు. గురువారం గాలింపు చర్యలు చేపట్టగా ఎలాంటి ఆధారాలు లభించలేదు.

మంగళవారం దోడా జిల్లాలో జరిగిన ఎన్​కౌంటర్​లో నలుగురు జవాన్లు ప్రాణాలు కోల్పోయారు.

అంతకన్నా ముందు కథువా జిల్లాలోని మచేడీ అటవీ ప్రాంతంలో జరిగిన ఉగ్రదాడిలో ఐదుగురు జవాన్లు మరణించారు. మరో ఐదుగురు గాయపడ్డారు.

ఇవన్నీ జమ్ముకశ్మీర్​లో పెరుగుతున్న ఉగ్రవాదానికి సంకేతాలుగా మారాయి.

ఈ ఏడాది మొదటి నుంచి ఇప్పటివరకు జమ్ములోని ఆరు జిల్లాల్లో 10కిపైగా ఉగ్రదాడులు జరిగాయి. వీటిల్లో 27మంది ప్రజలు, 11 మంది భద్రతా సిబ్బంది, ఐదుగురు ఉగ్రవాదులు మరణించారు.

భారీ భద్రతకు భారత సైన్యం ఏర్పాట్లు..

జమ్ముకశ్మీర్​లో పెరుగుతున్న ఉగ్ర కార్యకలాపాలకు చెక్​ పెట్టేందుకు భారత సైన్యం అన్ని విధాలుగా కృషి చేస్తోంది. ఉగ్రవాదుల ఏరివేతకు భారీ ప్రణాళికలు రచించింది. 50-55 మంది ఉగ్రవాదుల వేట కోసం 500కుపైగా మంది పారా స్పెషల్​ ఫోర్స్​ కమాండోలను భారత సైన్యం జమ్ముకశ్మీర్​లో మోహరించినట్టు తెలుస్తోంది. ఆ ప్రాంతంలో నిఘా వ్యవస్థల ఫోకస్​ మరింత పెరిగినట్టు, ఉగ్రవాదులకు సహాయం చేసే వారిని, అండర్​గ్రౌండ్​ వర్కర్లను పట్టుకునే పనిలో ఉన్నట్టు సంబంధిత వర్గాలు వెల్లడించాయి. పాకిస్థాన్​ చర్యలను అడ్డుకునేందుకు ఇప్పటికే 3,500-4000 మంది అదనపు భద్రతా బలగాలను జమ్ముకశ్మీర్​లో మోహరించినట్టు స్పష్టం చేశాయి. పూర్తి వివరాల కోసం ఇక్కడ క్లిక్​ చేయండి.