Sanjay Raut : కోర్టుకు సంజయ్​ రౌత్​.. శివసేన నిరసనలు

Sanjay Raut : శివసేన ఎంపీ, ప్రముఖ రాజకీయ నేత సంజయ్​ రౌత్​ను ముంబైలోని ప్రత్యేక పీఎంఎల్​ఏ కోర్టులో సోమవారం ఉదయం హాజరుపరిచారు ఈడీ అధికారులు. పత్రాచల్​ కుంభకోణం కేసులో సంజయ్​ రౌత్​ను కస్టడీలోకి తీసుకునేందుకు కోర్టును ఈడీ అధికారులు అభ్యర్థించనున్నారు.

సంజయ్​ రౌత్​ అరెస్ట్​ నేపథ్యంలో.. కోర్టు, ఈడీ కార్యాలయం వద్ద పటిష్ఠ భద్రతా ఏర్పాట్లు చేసింది రాష్ట్ర ప్రభుత్వం. ఎలాంటి అవాంఛనీయ ఘటనలు జరగకుండా జాగ్రత్తలు తీసుకుంది. సంజయ్​ రౌత్​ మద్దతుదారులు, శివసేన కార్యకర్తలు.. ఈడీ కార్యాలయం, కోర్టుకు భారీగా తరలివెళ్లి నిరసన తెలిపారు.

అంతకుముందు.. ఆదివారం ఉదయం 7 గంటల సమయంలో ముంబైలోని సంజయ్​ రౌత్​ నివాసానికి వెళ్లిన అధికారులు.. సాయంత్రం వరకు సోదాలు నిర్వహించారు. సంజయ్​ రౌత్​ నివాసంలో నుంచి లెక్కల్లో చూపించని రూ. 11.15లక్షలను స్వాధీనం చేసుకున్నారు. అనంతరం.. సాయంత్రం ఆయన్ని అదుపులోకి తీసుకుని ఈడీ కార్యాలయానికి తరలించారు. కాగా.. సోమవారం తెల్లవారుజామున సంజయ్​ రౌత్​ను అరెస్ట్​ చేసినట్టు ఈడీ అధికారులు వెల్లడించారు. ఇక సోమవారం మధ్యాహ్నం 12:30 గంటల సమయంలో.. సంజయ్​ రౌత్​ను ఈడీ కార్యాలయం నుంచి జేజే హాస్పిటల్​కు తీసుకెళ్లి.. వైద్య పరీక్షలు నిర్వహించారు. అక్కడి నుంచి కోర్టుకు తరలించారు.

Sanjay Raut ED : మురికివాడను పునర్నిర్మించే ప్రాజెక్టులో అక్రమాలు జరిగాయని ఆరోపణులు ఉన్నాయి. ఈ క్రమంలో.. సంజయ్​ రౌత్​ మనీలాండరింగ్​కు పాల్పడ్డారన్న కేసులో ఈడీ అధికారులు దర్యాప్తును ముమ్మరం చేశారు.

మరోవైపు తాను ఎలాంటి తప్పు చేయలేదని సంజయ్​ రౌత్​ చెబుతున్నారు. శివసేన నుంచి తనను వేరు చేసేందుకు కొందరు ప్రయత్నిస్తున్నారని ఆరోపించారు. మరణానికైనా సిద్ధమని, కానీ శివసేన నుంచి బయటకు రానని సంజయ్​ రౌత్​ స్పష్టం చేశారు.

సంజయ్​ రౌత్​ నివాసానికి ఉద్ధవ్​ ఠాక్రే..

శివసేన అధ్యక్షుడు ఉద్ధవ్​ ఠాక్రే.. ముంబైలోని సంజయ్​ రౌత్​ నివాసానికి వెళ్లారు. ఆయన కుటుంబసభ్యులకు మద్దతు ప్రకటించారు. సంజయ్​ రౌత్​కు అండగా ఉంటానని హామీనిచ్చారు.

శివసేన అధ్యక్షుడు ఉద్ధవ్​ ఠాక్రేకు సంజయ్​ రౌత్​ అత్యంత సన్నిహితుడు అని గుర్తింపు ఉంది.