Sanjay Raut : ఈడీ అధికారుల అదుపులో సంజయ్​ రౌత్​

Sanjay Raut : శివసేన ఎంపీ, ప్రముఖ రాజకీయ నేత సంజయ్​ రౌత్​ను ఈడీ అధికారులు ఆదివారం సాయంత్రం అదుపులోకి తీసుకున్నారు. పత్రాచల్​ భూకుంభకోణం కేసు విచారణలో భాగంగా.. ఉదయం నుంచి ఆయన ఇంట్లో సోదాలు నిర్వహించిన అధికారులు.. ఈ చర్యలు చేపట్టారు.

కొంతకాలం క్రితం.. విచారణకు హాజరుకావాలని సంజయ్​ రౌత్​కు రెండుసార్లు నోటీసులు జారీచేసింది ఈడీ. వివిధ కారణాలు చెప్పి.. ఆయన ఈడీ వద్దకు వెళ్లలేదు. ఈ క్రమంలోనే ఈడీ.. ఆదివారం ఉదయం 7గంటలకు.. ముంబైలోని సంజయ్​ రౌత్​ నివాసం తలుపు తట్టింది. ఈడీ వెంట సీఐఎస్​ఎఫ్​ అధికారులు కూడా వెళ్లారు.

భూకుంభకోణం కేసులో భాగంగా.. అనేక గంటలు పాటు సంజయ్​ రౌత్​ నివాసంలో సోదాలు నిర్వహించింది ఈడీ. వివిధ అంశాలపై ప్రశ్నల వర్షం కురిపించింది. అవన్నీ తప్పుడు ఆరోపణలని సంజయ్​ రౌత్​ తేల్చిచెప్పారు.

"తప్పుడు ఆరోపణలు, తప్పుడు చర్యలు. నేను శివసేనను విడిచిపెట్టాను. మరణించినా సరే.. నేను లొంగను. స్కామ్​తో నాకు సంబంధం లేదు. శివసేన వ్యవస్థాపకుడు బాలాసాహెబ్​ ఠాక్రే మీద ఒట్టేసి చెబుతున్నా.. నాకు సంబంధం లేదు. పోరాడాలని బాలాసాహెబ్​ మాకు చెప్పారు. శివసేన కోసం పోరాడుతూనే ఉంటాను," అని.. ఈడీ సోదాల మధ్యలోనే సంజయ్​ రౌత్​ ట్వీట్​ చేశారు.

ఇటీవలే పదవి కోల్పోయిన మహారాష్ట్ర మాజీ ముఖ్యమంత్రి ఉద్ధవ్​ ఠాక్రేకు.. సంజయ్​ రౌత్​ అత్యంత సన్నిహితుడు. తాజా పరిణామాలతో ఉద్ధవ్​ ఠాక్రే వర్గానికి భారీ షాక్​ తగిలినట్టు అయ్యింది.

రూ. 11.5లక్షలు జప్తు..

సంజయ్​ రౌత్​ నివాసం నుంచి ఈడీ అధికారులు.. రూ. 11.5లక్షలను జప్తు చేసినట్టు తెలుస్తోంది. ప్రస్తుతానికైతే స్టేట్​మెంట్​ నమోదు చేసేందుకు ఆయన్ని అదుపులోకి తీసుకున్నట్టు.. తర్వాత సంజయ్​ రౌత్​ను అరెస్ట్​ చేసే అవకాశం కూడా ఉన్నట్టు సమాచారం.