Mumbai hit and run case: ‘పబ్ లో 12 లార్జ్ పెగ్ ల విస్కీ తాగి..’ - ముంబై హిట్ అండ్ రన్ కేసులో నిందితులు-mihir shah friends drank 12 large whisky pegs why mumbai pub served him liquor ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  Mumbai Hit And Run Case: ‘పబ్ లో 12 లార్జ్ పెగ్ ల విస్కీ తాగి..’ - ముంబై హిట్ అండ్ రన్ కేసులో నిందితులు

Mumbai hit and run case: ‘పబ్ లో 12 లార్జ్ పెగ్ ల విస్కీ తాగి..’ - ముంబై హిట్ అండ్ రన్ కేసులో నిందితులు

HT Telugu Desk HT Telugu
Jul 11, 2024 03:14 PM IST

Mumbai hit and run case: ముంబైలో సంచలనం సృష్టించిన హిట్ అండ్ రన్ కేసులో కీలక విషయాలు వెల్లడవుతున్నాయి. ప్రధాన నిందితుడు, శివసేన నేత కొడుకు అయిన మిహిర్ షా, అతని స్నేహితులు ఆదివారం తెల్లవారుజామున 1:30 గంటల వరకు జుహు పబ్ లో మద్యం తాగుతూ ఉన్నారని తేలింది. ఆదివారం ఉదయం 5 గంటల సమయంలో ఈ ప్రమాదం జరిగింది.

ప్రధాన నిందితుడు మిహిర్ షా, అతడు నడిపిన బీఎండబ్ల్యూ కారు
ప్రధాన నిందితుడు మిహిర్ షా, అతడు నడిపిన బీఎండబ్ల్యూ కారు

Mumbai hit and run case: వర్లీ (ముంబై) హిట్ అండ్ రన్ కేసులో అరెస్టయిన ప్రధాన నిందితుడు మిహిర్ షా, అతని ఇద్దరు స్నేహితులు కారు ప్రమాదం జరిగిన రోజు మొత్తం 12 లార్జ్ పెగ్స్ విస్కీ (సుమారు నాలుగు పెగ్స్ చొప్పున) తాగినట్లు బార్ బిల్లును ఉటంకిస్తూ ఎక్సైజ్ అధికారులు తెలిపారు. ఈ క్వాంటిటీ ఆల్కహాల్ ఎనిమిది గంటల వరకు మత్తుకు కారణమవుతుందని ఎక్సైజ్ అధికారులు తెలిపారు.

తెల్లవారుజామున 1:30 వరకు

స్థానిక శివసేన నాయకుడి కుమారుడైన మిహిర్ షా, అతని స్నేహితులు ఆదివారం తెల్లవారుజామున 1:30 గంటలకు బార్ నుండి బయలుదేరారని, వారు మద్యం తాగిన నాలుగు గంటల్లోపు ఈ ప్రమాదం జరిగిందని ఎక్సైజ్ అధికారుల నివేదిక తెలిపింది. మిహిర్ షా వెళ్లిన జుహూ బార్ లో అక్రమ నిర్మాణాలను బృహన్ ముంబై మున్సిపల్ కార్పొరేషన్ (బీఎంసీ) బుధవారం కూల్చివేసింది. ముంబైలోని జుహు శివారులో ఉన్న వైస్ గ్లోబల్ తపస్ బార్ పై బీఎంసీ చర్యలు తీసుకుందని, ఈ సందర్భంగా 3,500 చదరపు అడుగుల అక్రమ నిర్మాణాన్ని కూల్చివేసిందని వారు తెలిపారు.

చట్ట విరుద్ధంగా మద్యం సరఫరా

25 ఏళ్ల లోపు వయసున్న మిహిర్ కు మద్యం సరఫరా చేసిన జుహు బార్ లైసెన్స్ ను రాష్ట్ర ఎక్సైజ్ యంత్రాంగం సస్పెండ్ చేసింది. డోన్ గియోవన్నీ రెస్టారెంట్, జోబెల్ హాస్పిటాలిటీస్ ప్రైవేట్ లిమిటెడ్ వంటి బార్లలో వంటి ఇతర బార్లలో కూడా ఇలాంటి అవకతవకలను ఎక్సైజ్ శాఖ గుర్తించింది. అయితే, మిహిర్ షా పబ్ లో తన వయస్సును 27గా చూపించే తప్పుడు గుర్తింపు కార్డును ఉపయోగించినట్లు ఆ పబ్ సిబ్బంది తెలిపారు. అధికారిక రికార్డుల ప్రకారం మిహిర్ షా వయస్సు 23 సంవత్సరాలు. మహారాష్ట్రలో కనీస చట్టబద్ధమైన మద్యపాన వయస్సు 25 సంవత్సరాలు. అతనితో పాటు పబ్ కు వెళ్లిన ముగ్గురు స్నేహితులు 30 ఏళ్లకు పైబడిన వారని పోలీసులు తెలిపారు.

ప్రధాన నిందితుడు మిహిర్ షా

మిహిర్ షా నడుపుతున్న బీఎండబ్ల్యూ కారు దక్షిణ మధ్య ముంబైలోని వర్లీ ప్రాంతంలో ఆదివారం ఉదయం ద్విచక్రవాహనాన్ని వెనుక నుంచి ఢీకొనడంతో బైక్ పై వెళ్తున్న కావేరి నఖ్వా (45) మృతి చెందగా, ఆమె భర్త ప్రదీప్ గాయాలతో బయటపడ్డాడని పోలీసులు తెలిపారు. కావేరి నఖ్వాను వేగంగా వచ్చిన కారు సుమారు 1.5 కిలోమీటర్లు ఈడ్చుకెళ్లిందని, ఆ తరువాత మిహిర్ షా కారును నిలిపేసి, తన డ్రైవర్ తో సీటు మార్చుకుని మరో వాహనంలో పారిపోయాడని వారు తెలిపారు. ప్రమాదం జరిగినప్పటి నుంచి పరారీలో ఉన్న మిహిర్ షాను మంగళవారం అరెస్టు చేశారు. ఈ నెల 16వ తేదీ వరకు పోలీసు కస్టడీకి అప్పగిస్తూ కోర్టు బుధవారం ఆదేశాలు జారీ చేసింది.

టైర్ లో ఇరుక్కుపోయి..

ప్రమాదం జరిగిన సమయంలో తాను బిఎమ్ డబ్ల్యూ కారును నడుపుతున్నానని పోలీసు మిహిర్ వారికి చెప్పాడు. ఆదివారం తెల్లవారు జామున దంపతుల స్కూటర్ ను ఢీకొట్టిన తర్వాత లగ్జరీ కారు టైర్లలో ఒకదానిలో మహిళ ఇరుక్కుపోయిందని షాకు బాగా తెలుసునని, అయినా అతను నిర్లక్ష్యంగా డ్రైవ్ చేశాడని, అటుగా వెళ్తున్న వాహనదారులు ఆపాలని సైగ చేసి కేకలు వేసినా ఆగలేదని ఓ అధికారి బుధవారం తెలిపారు. ప్రమాదం అనంతరం మిహిర్ షా తన గర్ల్ ఫ్రెండ్ కు 40 సార్లు ఫోన్ చేశాడని, ఆమెను కూడా విచారిస్తామని పోలీసులు తెలిపారు.

WhatsApp channel