Sai Rajesh vs Vishwak Sen: విశ్వ‌క్ సేన్ "నో" చెప్పిన విధానం న‌చ్చ‌లేదు - గొడ‌వ‌పై క్లారిటీ ఇచ్చిన బేబీ డైరెక్ట‌ర్‌

Sai Rajesh vs Vishwak Sen: ఈ ఏడాది టాలీవుడ్‌ బిగ్గెస్ట్ బ్లాక్‌బ‌స్ట‌ర్‌ల‌లో ఒక‌టిగా బేబీ సినిమా నిలిచింది. దాదాపు ఐదు కోట్ల బ‌డ్జెట్‌తో ఎలాంటి అంచ‌నాలు లేకుండా ప్రేక్ష‌కుల ముందుకొచ్చిన ఈ ఈ చిన్న సినిమా 80 కోట్ల‌కుపైగా క‌లెక్ష‌న్స్ రాబ‌ట్టింది. 2023లో నిర్మాత‌ల‌కు అత్య‌ధిక లాభాల్ని మిగిల్చిన సినిమాగా మిగిలింది. తొలుత ఈ సినిమాలో హీరోగా విశ్వ‌క్‌సేన్ తీసుకోవాల‌ని ద‌ర్శ‌కుడు సాయిరాజేష్ అనుకున్న‌ట్లుగా వార్త‌లు వ‌చ్చాయి.

కానీ విశ్వ‌క్‌సేన్‌ క‌థ విన‌డానికి తిర‌స్క‌రించిన‌ట్లు ప్ర‌చారం జ‌రుగుతోంది. ఇటీవ‌లే ఓ సినిమా వేడుక‌లో అంద‌రిని ఆనందంగా ఉంచేందుకు నేనే బిర్యానీని కాదంటూ ద‌ర్శ‌కుడు సాయిరాజేష్‌పై ఇన్‌డైరెక్ట్‌గా సెటైర్స్ వేశాడు విశ్వ‌క్‌సేన్‌.

తాజాగా ఈ గొడ‌వ‌పై ద‌ర్శ‌కుడు సాయిరాజేష్ కూడా స్పందించాడు. విశ్వ‌క్‌సేన్‌కు క‌థ వినించాల‌ని అనుకున్న‌ది నిజ‌మేన‌ని తెలిపాడు. కానీ అత‌డు విన‌లేద‌ని పేర్కొన్నాడు. విశ్వ‌క్‌సేన్ నా క‌థ‌ను విన‌క‌పోవ‌డానికి కార‌ణం ఏమిటో కూడా త‌న‌కు తెలియ‌ద‌ని సాయిరాజేష్ అన్నాడు. విశ్వ‌క్‌సేన్‌ ప్ర‌యారిటీ లిస్ట్ డైరెక్ట‌ర్స్‌లో తాను లేక‌పోయుండ‌క‌పోవ‌చ్చున‌ని సాయిరాజేష్ తెలిపాడు.

విశ్వ‌క్‌సేన్ బేబీ సినిమాకు నో చెప్పిన విధానం త‌న‌కు న‌చ్చ‌లేద‌ని పేర్కొన్నారు. తాను నో చెప్పిన సినిమా హిట్ట‌యింది. ఆ హిట్టును ఎంజాయ్ చేయాలి కానీ ఎదుటివారిని ఇన్‌స‌ల్ట్ చేయొద్ద‌ని విశ్వ‌క్‌సేన్ అన్న మాట‌లు త‌న‌ను బాధించాయ‌ని సాయిరాజేష్ పేర్కొన్నాడు.

బేబీ సినిమాను విశ్వ‌క్ సేన్ తిర‌స్క‌రించాడ‌ని అత‌డి పేరు కూడా తాను ఎక్క‌డ‌ చెప్ప‌లేద‌ని తెలిపాడు. హీరోల రిజెక్ష‌న్ రెస్పెక్ట‌బుల్‌గా ఉండే బాగుంటుంద‌ని సాయిరాజేష్ అన్నాడు. ఈ గొడ‌వ‌ విష‌యంలో విశ్వ‌క్‌సేన్‌పై త‌న‌కు ఎలాంటి కోపం లేద‌ని తెలిపాడు.

విశ్వ‌క్‌సేన్ ఫ‌స్ట్ సినిమా వెళ్లిపోమాకే రిలీజ్ కావ‌డానికి తాను ఎంతో క‌ష్ట‌ప‌డ్డామ‌ని, అల్లు అర‌వింద్‌, దిల్‌రాజుతో పాటు అంద‌రికి ఈ సినిమాను చూపించి రిలీజ్ చేయించాన‌ని సాయిరాజేష్ చెప్పాడు. కాగా బేబీ సినిమాలో ఆనంద్ దేవ‌ర‌కొండ‌, విరాజ్ అశ్విన్‌, వైష్ణ‌వి చైత‌న్య హీరోహీరోయిన్లుగా న‌టించారు.