Veera Simha Reddy Trailer Launch: వీర సింహా రెడ్డి ట్రైలర్‌కు ముహూర్తం, వేదిక ఫిక్స్‌

Veera Simha Reddy Trailer Launch: ఈసారి సంక్రాంతి బరిలో ఉన్న పెద్ద సినిమాల్లో ఒకటి వీర సింహా రెడ్డి. బాలయ్య బాబు నటించిన ఈ సినిమాపై భారీ అంచనాలే ఉన్నాయి. అఖండ సూపర్‌ సక్సెస్‌ తర్వాత వస్తున్న బాలకృష్ణ మూవీ, అందులోనూ సంక్రాంతి సినిమా కావడంతో బాక్సాఫీస్‌ దగ్గర ఎలాంటి సంచలనాలు సృష్టిస్తుందో అన్న ఆసక్తి నెలకొంది.

ఈ సినిమా జనవరి 12న రిలీజ్‌ కాబోతోంది. అయితే ఆ మరుసటి రోజే చిరంజీవి నటించిన వాల్తేర్‌ వీరయ్య కూడా రానుండటంతో వీర సింహా రెడ్డికి గట్టి పోటీ నెలకొనే అవకాశం ఉంది. ఈ ఇద్దరు స్టార్ హీరోల మధ్య పోరులో పైచేయి ఎవరిది అనే ఆసక్తి కూడా సహజంగానే ఉంటుంది. ఈ నేపథ్యంలో వీర సింహా రెడ్డి ట్రైలర్‌ లాంచ్‌కు ముహూర్తం ఫిక్స్‌ చేశారు.

ఈ మూవీ ట్రైలర్‌ను జనవరి 6న లాంచ్‌ చేయనున్నట్లు మేకర్స్‌ అనౌన్స్‌ చేశారు. ఒంగోలును ట్రైలర్‌ లాంచ్‌కు వేదికగా ఖరారు చేశారు. డైరెక్టర్‌ గోపీచంద్‌ మలినేని తన గత సినిమాల్లోనూ టీజర్‌లో కాకుండా అసలు విషయాన్ని ట్రైలర్‌తోనే చెప్పాడు. ఇప్పుడు కూడా వీర సింహా రెడ్డి ట్రైలర్‌తో ఎలాంటి మ్యాజిక్‌ చేస్తాడో అని ఫ్యాన్స్‌ ఆతృతగా ఎదురు చూస్తున్నారు.

ఇప్పటికే ఈ సినిమా నుంచి వచ్చిన బాలయ్య లుక్స్‌ హైప్‌ను క్రియేట్‌ చేశాయి. ఇక టైటిల్‌లో రెడ్డి ఉంటే బంపర్‌ హిట్‌ అన్న సెంటిమెంట్‌ కూడా ఉండటంతో బాలకృష్ణ ఫ్యాన్స్‌లో ఉత్సాహం కనిపిస్తోంది. కేవలం మాస్‌ యాక్షన్‌ ఎంటర్‌టైనర్‌గానే కాకుండా ఫ్యామిలీ ఎమోషన్స్‌, సెంటిమెంట్‌ను కూడా మేళవించి వీర సింహా రెడ్డి ప్రేక్షకుల ముందుకు వస్తున్నాడు.

ముఖ్యంగా సినిమా సెకండాఫ్‌లో బాలకృష్ణ, వరలక్ష్మి శరత్‌కుమార్‌ మధ్య వచ్చే సీన్లు మూవీకే హైలైట్‌ అని భావిస్తున్నారు. ఇక వీర సింహా రెడ్డి సినిమా నుంచి వచ్చిన జై బాలయ్య, సుగుణ సుందరి, మా బావ మనోభావాల్‌ పాటలు ఫ్యాన్స్‌కు తెగ నచ్చేశాయి.