Tiger 3 Trailer: అదిరిపోయే స్టంట్స్, సల్మాన్.. అందమైన కత్రినా.. టైగర్ 3 ట్రైలర్ వచ్చేసింది

Tiger 3 Trailer: సల్మాన్ ఖాన్, కత్రినా కైఫ్ కలిసి నటించిన టైగర్ 3 ట్రైలర్ సోమవారం (అక్టోబర్ 16) రిలీజైంది. వచ్చే నెల దీపావళి సందర్భంగా ప్రేక్షకుల ముందుకు రానున్న సల్లూ భాయ్.. టైగర్ 3లో మరింత పవర్‌ఫుల్ గా కనిపించబోతున్నాడు. అతనికితోడు కత్రినా కూడా తన అందం, స్టంట్స్ తో ఆకట్టుకుంది. ఇప్పుడీ ట్రైలర్ మూవీపై అంచనాలను భారీగా పెంచేసింది.

యశ్ రాజ్ ఫిల్మ్స్ స్పై యూనివర్స్ నుంచి వస్తున్న టైగర్ 3 మూవీతో మరోసారి సల్మాన్ ఖాన్ ప్రేక్షకుల ముందుకు రాబోతున్నాడు. 2017లో వచ్చిన టైగర్ జిందా హై, వార్ (2019), పఠాన్ (2023) తర్వాత యశ్ రాజ్ ఫిల్మ్స్ స్పై యూనివర్స్ నుంచి వస్తున్న నాలుగో సినిమా ఈ టైగర్ 3. ఈసారి సల్మాన్ తన దేశంతోపాటు కుటుంబం కోసం ఫైట్ చేయనున్నాడు.

ఒక దశలో తన దేశం కావాలో, కుటుంబంలో కావాలో తేల్చుకోవాల్సిన సంకట స్థితిలో అతడు పడిపోతాడు. ఈ మూవీలో జోయా అనే ఏజెంట్, సల్మాన్ భార్య పాత్రలో కత్రినా కైఫ్ నటించింది. ఇక విలన్ గా బాలీవుడ్ ప్రముఖ హీరో ఇమ్రాన్ హష్మి నటించడం విశేషం. ట్రైలర్ మొత్తం మధ్యమధ్యలో షాడోలో కనిపించే ఇమ్రాన్ ను.. చివర్లో పరిచయం చేసిన తీరు బాగుంది.

వెల్‌కమ్ టు పాకిస్థాన్ టైగర్ అంటూ సల్మాన్ కు స్వాగతం పలుకుతాడు ఇమ్రాన్. ప్రతిసారీ ఈద్ సమయంలో ఓ భారీ మూవీని రిలీజ్ చేసే సల్మాన్ ఖాన్.. ఈసారి దీపావళికి ప్రేక్షకుల ముందుకు వస్తున్నాడు. టైగర్ 3 మూవీ నవంబర్ 12న రిలీజ్ కానుంది. తెలుగులో రానున్న ఈ సినిమా ట్రైలర్ ను హిందీతోపాటు సోమవారం (అక్టోబర్ 16) రిలీజ్ చేశారు.

మొత్తంగా టైగర్ 3 ట్రైలర్ చాలా ఆసక్తికరంగా సాగింది. మూవీలోని యాక్షన్ సీన్స్ ను యాక్షన్ లవర్స్ బాగా ఎంజాయ్ చేసే అవకాశం కనిపిస్తోంది. ట్రైలర్ మొత్తం యాక్షన్ తో నింపేశారు. ముఖ్యంగా సల్మాన్, కత్రినా చేసిన స్టంట్స్ చాలా బాగున్నాయి.