CCL 2023 Telugu Warriors: నాలుగోసారి సీసీఎల్ విజేత‌గా తెలుగు వారియ‌ర్స్ - ప్లేయ‌ర్ ఆఫ్ ది సిరీస్‌గా అఖిల్ అక్కినేని

CCL 2023 Telugu Warriors: సెల‌బ్రిటీ క్రికెట్ లీగ్ 2023 విజేత‌గా తెలుగు వారియ‌ర్స్ టీమ్ నిలిచింది. శ‌నివారం జ‌రిగిన ఫైన‌ల్‌లో భోజ్‌పురి ద‌బాంగ్స్‌పై ఆరు వికెట్ల తేడాతో విజ‌యాన్ని సాధించిన తెలుగు వారియ‌ర్స్ నాలుగోసారి టైటిల్‌ను సొంతం చేసుకున్న‌ది. సీసీఎల్‌లో అదిరిపోయే బ్యాటింగ్ ప్ర‌ద‌ర్శ‌న‌తో ఆక‌ట్టుకున్న తెలుగు వారియ‌ర్స్ కెప్టెన్ అఖిల్ అక్కినేని ప్లేయ‌ర్ ఆఫ్ ది మ్యాచ్‌, ప్లేయ‌ర్ ఆఫ్ ది సిరీస్ అవార్డుల‌ను సొంతం చేసుకున్నాడు.

ఫైన‌ల్ మ్యాచ్‌లో తొలుత బ్యాటింగ్ చేసిన భోజ్‌పురి ద‌బాంగ్స్ ఫ‌స్ట్ ఇన్నింగ్స్‌లో ప‌ది ఓవ‌ర్ల‌లో 72 ర‌న్స్ మాత్ర‌మే చేసింది. అఖిల్ అక్కినేని 32 బాల్స్‌లో 67 ర‌న్స్‌తో చెల‌రేగ‌డంతో తెలుగు వారియ‌ర్స్ ఫ‌స్ట్ ఇన్నింగ్స్‌లో 104 ర‌న్స్ చేసింది. తొలి ఇన్నింగ్స్‌లో తెలుగు వారియ‌ర్స్‌కు భారీ ఆధిక్యం ల‌భించింది. సెకండ్ ఇన్నింగ్స్‌లో భోజ్‌పురి ద‌బాంగ్స్ 89 ర‌న్స్ చేసింది.

తెలుగు వారియ‌ర్స్ ముందు 58 ప‌రుగుల ల‌క్ష్యాన్ని విధించింది. ఈ సింపుల్ టార్గెట్‌ను మ‌రో నాలుగు ఓవ‌ర్లు మిగిలుండ‌గానే తెలుగు వారియ‌ర్స్ చేధించింది. గ‌తంలో 2015, 16, 17 ల‌లో తెలుగు వారియ‌ర్స్ సీసీఎల్ విజేత‌గా నిలిచింది. లాంగ్ గ్యాప్ త‌ర్వాత మ‌రోసారి క‌ప్ సొంతం చేసుకున్న‌ది. వైజాగ్ వేదిక‌గా జ‌రిగిన ఈ మ్యాచ్‌లో అగ్ర హీరో వెంక‌టేష్‌తో పాటు ప‌లువురు టాలీవుడ్ స్టార్స్ సంద‌డిచేశారు.