The Marvels: ఆ మార్వెల్ సినిమా కోసం ఇండియాలో నలుగురు స్టార్ హీరోయిన్లు మళ్లీ ప్రచారం చేస్తారా?

The Marvels: కెప్టెన్ మార్వెల్ చిత్రానికి సీక్వెల్ అయిన ‘ది మార్వెల్స్’ ఈ ఏడాది ఎట్టకేలకు విడుదల కానుంది. నాలుగేళ్ల సందిగ్ధత తర్వాత ఈ చిత్రం ఈ ఏడాది రిలీజ్ కానుంది. మార్వెల్ సినిమాటిక్ యూనివర్స్ (MCU)లో భాగంగా ‘ది మార్వెల్స్’ చిత్రం రానుంది. ఈ సినిమాలో కెప్టెన్ మార్వెల్‍గా బ్రీ లార్సన్, మిస్ మార్వెల్‍గా ఇమాన్ వెల్లనీ, మొనికా రంబెయూగా తెయోనా పారిస్ నటించారు. ఇటీవలే విడుదలైన ట్రైలర్‌కు మంచి రెస్పాన్స్ వచ్చింది. ఇండియాలోనూ ది మార్వెల్స్ చిత్రంపై బజ్ నెలకొని ఉంది. అయితే, ఇండియాలో నలుగురు ప్రముఖ హీరోయిన్లు ది మార్వెల్స్ చిత్ర ప్రమోషన్ల కోసం ఒకే వేదికపైకి వస్తారన్న సమాచారం తాజాగా చక్కర్లు కొడుతోంది.

ది మార్వెల్స్ చిత్రం కోసం స్టార్ హీరోయిన్లు తమన్నా భాటియా, కాజల్ అగర్వాల్, రకుల్ ప్రీత్ సింగ్, సమంత రూత్ ప్రభు ఇండియాలో ప్రమోషన్లో పాల్గొంటారని ఊహాగానాలు వినిపిస్తున్నాయి. 2019లో కెప్టెన్ మార్వెల్ సినిమా కోసం ఈ నలుగురు హీరోయిన్లు ప్రమోషన్ కార్యక్రమాలు చేశారు. మహిళా శక్తిని చాటేలా ఉండే ఆ సూపర్ హీరోయిన్స్ మూవీని ప్రమోట్ చేశారు. చెన్నైలో జరిగిన ఈవెంట్లో అప్పట్లో నలుగురు హీరోయిన్లు ఒకే వేదికను పంచుకున్నారు. కెప్టెన్ మార్వెల్ చిత్రాన్ని ప్రమోట్ చేశారు. అయితే, ఇప్పుడు ఈ ఏడాది ‘ది మార్వెల్స్’ చిత్రం కోసం ఆ నలుగురు హీరోయిన్లు ఒకే వేదికపైకి వస్తారని టాక్.

ఈ ఏడాది నవంబర్ 10వ తేదీన ‘ది మార్వెల్స్’ చిత్రం విడుదల కానుంది. ఈలోగా తమన్నా భాటియా, కాజల్ అగర్వాల్, రకుల్ ప్రీత్ సింగ్, సమంతతో చర్చించి ప్రమోషన్లలో పాల్గొనేలా ఈ చిత్ర యూనిట్ ప్రణాళికలు చేస్తోందని సమాచారం. ప్రపంచానికి హాని చేయాలని ప్రత్నించే విలన్లపై సూపర్ హీరోయిన్లు కెప్టెన్ మార్వెల్, మిస్ మార్వెల్, మొనికా పోరాడే కథాంశంతో ది మార్వెల్స్ వస్తోంది. దీంతో మహిళా శక్తికి సింబల్‍గా ఇండియాలో స్టార్ హీరోయిన్లతోనే ప్రమోట్ చేయించాలని మార్వెల్ భావిస్తోంది. ది మార్వెల్స్ చిత్రానికి నియా డకోస్టా దర్శకత్వం వహించారు.

తమన్నా భాటియా ఇటీవల ఓటీటీ సిరీస్‍లు, సినిమాలతో ఫుల్ బిజీగా ఉంటోంది. టాలీవుడ్ నుంచి వెళ్లి బాలీవుడ్‍పై ఫోకస్ పెట్టింది రకుల్. మరోవైపు కాజల్ సెలెక్టివ్‍గా సినిమాలు చేస్తోంది. ఇక, సమంత ప్రస్తుతం మూవీస్ నుంచి బ్రేక్ తీసుకుంది. మరి, ది మార్వెల్స్ చిత్రం కోసం ఈ నలుగురు స్టార్ హీరోయిన్లు మళ్లీ ప్రచారం చేస్తారా.. ఇది సాధ్యపడుతుందా అన్నది చూడాలి.