Bigg Boss Elimination: బిగ్‍బాస్ నుంచి శోభాశెట్టి ఎలిమినేట్.. నెటిజన్లు ఎలా స్పందిస్తున్నారంటే!

Shobha Shetty elimination Reactions: బిగ్‍బాస్ తెలుగు 7వ సీజన్ ముగింపునకు వచ్చేస్తోంది. ఈ క్రమంలో 14వ వారంలో సీరియల్ నటి శోభా శెట్టి హౌస్ నుంచి ఎలిమినేట్ కానున్నారని లీకులు బయటికి వచ్చాయి. ఈ ఎలిమినేషన్ ప్రక్రియ నేటి (డిసెంబర్ 10) ఎపిసోడ్‍లో ఉండనుంది. అందరి కంటే ఓటింగ్ తక్కువగా వచ్చిన శోభ హౌస్ నుంచి బయటికి వెళ్లిపోనున్నారని లీక్‍లు వెల్లడిస్తున్నాయి. అయితే, శోభా శెట్టి ఎలిమినేషన్ గురించి ఇప్పటికే సోషల్ మీడియాలో రియాక్షన్లు వస్తున్నాయి.

బిగ్‍బాస్ హౌస్‍లో మొదటి నుంచి శోభా శెట్టి కాస్త నెగెటివిటీ తెచ్చుకున్నారు. కొన్నిసార్లు ఆమె మాట్లాడే తీరు, వెటకారం, తరచూ అరవడం, ఇతర కంటెస్టెంట్లను రెచ్చగొట్టడం, గ్రూపిజం ఇలా చాలా విషయాల్లో శోభపై వ్యతిరేకత వస్తోంది. సోషల్ మీడియాలో ఎక్కువ మంది ఆమెకు వ్యతిరేకంగా పోస్టులు పెట్టారు. ఇప్పుడు శోభా శెట్టి ఎలిమినేట్ అవుతున్నారంటే కూడా అలాంటి రియాక్షన్లే వస్తున్నాయి. శోభ ఇప్పటికైనా ఎలిమినేట్ అవుతున్నారని కొందరు సంతోషం కూడా వ్యక్తం చేస్తున్నారు.

కొన్ని వారాలు ఓటింగ్ తక్కువగా వచ్చినా శోభను స్టార్ మా యాజమాన్యం ఎలిమినేట్ కాకుండా కాపాడిందని ఆరోపణలు వచ్చాయి. అయితే, ఇప్పటికైనా శోభను ఎలిమినేట్ చేసి మంచి పని చేశారని, కొన్ని రోజులైన హౌస్‍లో ప్రశాంతత ఉంటుందని కొందరు నెటిజన్లు కామెంట్లు చేస్తున్నారు. ఎప్పుడో ఎలిమినేట్ కావాల్సిన కంటెస్టెంట్‍ను కావాలానే ఇప్పటి వరకు తెచ్చారని మరికొందరు ట్వీట్లు చేస్తున్నారు. శోభ శెట్టి ఎలిమినేషన్ గురించి చాలా మీమ్స్ కూడా వస్తున్నాయి.

మరోవైపు శోభా శెట్టికి సపోర్టుగా కూడా కొందరు సోషల్ మీడియాలో పోస్టులు చేస్తున్నారు. శివాజీ, ప్రిన్స్ యావర్‌, పల్లవి ప్రశాంత్‍తో శోభ బలంగా పోరాడిందని కొందరు స్పందిస్తున్నారు. వారి ప్రవర్తనను శోభ చాలాసార్లు బయటికి తీసుకొచ్చారని అంటున్నారు. మొత్తానికి శోభా శెట్టి ఎలిమినేట్ కానున్నారన్న లీకులు రాగా.. చాలా మంది నెటిజన్లు రకరకాలుగా స్పందిస్తున్నారు. చాలా మంది శోభ వెళ్లిపోతున్నందుకు సంతోషం వ్యక్తం చేస్తుంటే.. మరికొందరు ఆమెకు మద్దతుగా స్పందిస్తున్నారు.

బిగ్‍బాస్ 14వ వారంలో అంబటి అర్జున్ మినహా మిగిలిన ఆరుగురు నామినేషన్లలో ఉన్నారు. చివరికి నేడు శోభా శెట్టి ఎలిమినేట్ అయినట్టు తెలుస్తోంది. ఈ ఎలిమినేషన్‍పై స్పష్టం నేటి ఎపిసోడ్‍లో రానుంది.

మరోవైపు, బిగ్‍బాస్ తెలుగు 7వ సీజన్ గ్రాండ్ ఫినాలే డిసెంబర్ 17న జరగనుందని దాదాపు ఖరారైంది. అంటే.. 15వ వారమే ఫైనల్ వీక్‍గా ఉండనుంది.